ភ្នំពេញ៖ ភ្ញៀវទេសចរអន្តរជាតិ ចូលមកទស្សនាកម្ពុជា តាមច្រកទ្វាអន្តរជាតិប៉ោយប៉ែត ខេត្តបន្ទាយមានជ័យ រយៈពេល១២ ខែឆ្នាំ២០១៣កន្លងទៅថ្មីៗនេះ មានទេសចរអន្តរជាតិជិត ៦ សែននាក់។ នេះបើយោងទៅតាមប្រសាសន៍របស់លោក ជង់ ឡឹម ប្រធានមន្ទីរទេសចរណ៍ខេត្តបន្ទាយមានជ័យ។ ចំនួននេះបានបង្ហាញពីការឡើងតិចតូច បើប្រៀបធៀបនឹងឆ្នាំមុន ដោយសារវិបត្តិនយោបាយនៅប្រទេសថៃ ដែលនាំឲ្យភ្ញៀវមានចំនួនថយចុះ។
លោកប្រធានមន្ទីរទេសចរណ៍ខេត្ត បានបន្ថែមថា ចំនួននេះមានការកើនឡើង០,៧២ ភាគរយ បើប្រៀបធៀបក្នុងរយៈពេលដូចគ្នាកាលពីឆ្នាំ២០១២ ដែលមានភ្ញៀវទេសចរអន្តរជាតិឆ្លងកាត់ជាង៥ សែននាក់។ ភ្ញៀវទេសចរទាំងនេះមកពី១៥៧ ប្រទេស ហើយភ្ញៀវទេសចរ ដែលមកកម្ពុជាមានចំនួន ១០ប្រទេស រួមមាន៖ ថៃ រុស្ស៊ី កូរ៉េខាងត្បូង អង់គ្លេស សហរដ្ឋអាមេរិក ចិន ជប៉ុន បារាំង អាល្លឺម៉ង់ និងប្រទេសឥណ្ឌូណេស៊ី។ ហើយចំនួនភ្ញៀវទេសចរដែលនាំមុខគេនោះមាន ថៃ រុស្ស៊ី និងប្រទេសកូរ៉េខាងត្បូង។
ប្រធានមន្ទីរទេសចរណ៍រូបនេះ បញ្ជាក់ថា យ៉ាងណាក៏ដោយមន្ត្រីទេសចរ កម្ពុជាបានរំពឹងទុកយ៉ាងមុះមុតថា នៅឆ្នាំបន្ទាប់កម្ពុជា នឹងមានភ្ញៀវទេសចរណ៍មានការកើនឡើង ជាពិសេសនៅខេត្តសៀមរាប បន្ទាយមានជ័យ កំពត កំពង់សោម និងខេត្តព្រះសីហនុជាដើម ដែលសុទ្ធតែមានតំបន់ទាក់ទាញភ្ញៀវទេសចរណ៍ទាំងក្នុង និងក្រៅស្រុកមកកម្សាន្តជាហូរហែរ។គួររំលឹកថា កាលពីពេលកន្លងមក លោក ថោងខុន រដ្ឋមន្ត្រីក្រសួងទេសចរណ៍ មានប្រសាសន៍ថា ប្រទេសកម្ពុជារំពឹងថា នឹងទទួលបានភ្ញៀវទេសចរបរទេស៤លាននាក់ ក្នុងឆ្នាំ២០១៣ ស្មើនឹងកំណើន១២% បើប្រៀបធៀបឆ្នាំ២០១២។
.jpg)
លោករដ្ឋមន្រ្តីក្រសួងទេសចរណ៍ បានប្រាប់ដល់អ្នកសារព័ត៌មាននៅក្នុងកិច្ចប្រជុំនៃក្រសួងទេសចរណ៍កាលពីឆ្នាំ២០១៣ថា “ឆ្នាំមុន យើងបានទទួលនូវភ្ញៀវទេសចរ អន្ដរជាតិ៣.៥៨លាននាក់ ស្មើនឹងកំណើន២៤% ហើយបាន ផ្ដល់ចំណូល២.២ពាន់លានដុល្លារសហរដ្ឋអាមេរិក”។ ឆ្នាំនេះ យើងជឿថាប្រទេសយើងនឹងអាចទទួលបានភ្ញៀវទេសចររហូតដល់៤លាននាក់”។លោកបញ្ជាក់ថា ប្រហែល៧៥%នៃភ្ញៀវទេសចរ គឺមកពីតំបន់អាស៊ីប៉ាស៊ីហ្វិក និងប្រហែល១៦%មកពីប្រទេសក្នុងតំបន់អឺរ៉ុប។ បើយោងតាមទិន្នន័យពីក្រសួងទេសចរណ៍បង្ហាញឱ្យដឹងថា ក្នុងរយៈពេល១០ខែដំបូងនៅឆ្នាំ២០១៣នេះ ភ្ញៀវទេសចរបរទេសមកទស្សនាកម្ពុជាមាន៣,៥ លាននាក់ ជាតួលេខដែលកើន១០,៥ ភាគរយ ធៀបនឹងឆ្នាំមុន៕ សេរីមករា