ភ្នំពេញ ៖ តារាសម្តែង និងជាតារាបង្ហាញម៉ូដ ប្រចាំក្រុម Sun Super Model សម្បូរមន្តស្នេហ៍ កញ្ញា សុខ មុន្នីពិសី ចាប់តាំងពីចូលប្រឡូកក្នុងវិថីសិល្បៈរហូតមកដល់ពេលបច្ចុប្បន្ននេះ ប្រជាប្រិយភាពតារារូបនេះ ហាក់ដូចជាមានភាព លេចធ្លោគួរសម តាមរយៈការបញ្ចេញសមត្ថភាព ផ្ទាល់ខ្លួន និងរូបសម្រស់ដ៏ស្រស់សោភា។ មិនត្រឹមតែប៉ុណ្ណោះ នាងក៏តារាស្រី តែងធ្វើឲ្យក្រុមកន្លង់ៗទាំងក្នុង និងក្រៅស្រុកប៉ងប្រាថ្នា ចង់ក្រេបក្លិនថ្ពាល់ក្រពុំ ដ៏សែនក្រអូបរបស់នាងទៀតផង។
ទន្ទឹមនឹងអាជីពការងារសិល្បៈ កាន់តែមានសន្ទុះជាងមុនបន្តិចនេះ ក៏មានព័ត៌មាន អំពីរឿងរ៉ាវជីវិត ស្នេហាឯកជន របស់តារាស្រីរូបនេះថា នាងបាននឹងកំពុងតែមានទំនាក់ទំនងយ៉ាងជិតស្និទ្ធ ជាមួយបុរសអាណិកជន ក្រៅស្រុកម្នាក់ ទើបធ្វើឲ្យមានការសង្ស័យថា សុខ មុន្នីពិសី អាចកំពុងផ្តើមស្នេហ៍ដំបូង។ ស្របគ្នានេះ ក៏ធ្លាយដំណឹងមកទៀតថា រាល់ថ្ងៃតារាវ័យក្មេងរូបនេះ បានលួចលាក់បង្កើតស្នេហ៍ដ៏ផ្អែមល្ហែមជាមួយបុរសអាណិកជនខ្មែរ រស់នៅលើទឹកដីសហរដ្ឋអាមេរិក ។ប្រភពពីរង្វង់អ្នកសិល្បៈ បានឲ្យដឹងថា សព្វថ្ងៃតារាសម្តែង និងជាអ្នកបង្ហាញម៉ូដ វ័យក្មេងរូបស្រស់ កញ្ញា សុខ មុន្នីពិសី កំពុងតែសម្ងំ សាងសម្ព័ន្ធភាពស្នេហ៍ ដ៏ផ្អែមល្ហែម ជាមួយបុរសវ័យជាង៤០ឆ្នាំ ដែលជាអាណិកជនខ្មែរ រស់នៅសហរដ្ឋអាមេរិក។ ចំពោះទំនាក់ទំនងស្នេហ៍ រវាងតារាសម្តែងនាង សុខ មុន្នី ពិសី និង បុរសអាណិកជនឆ្លងទ្វីប ត្រូវបានប្រភពខាងលើ និយាយថា រហូតមកដល់ពេលនេះ មានរយៈពេលជិត២ឆ្នាំ មកហើយ ។
ប្រភពបន្ថែមថា សុខ មុន្នីពិសី និងគូស្នេហ៍ តែងតែទាក់ទង រកគ្នាជាប្រចាំ តាមរយៈ ការ និយាយទូរស័ព្ទឆ្លងឆ្លើយគ្នា ទៅវិញទៅមកហើយ។ ម្យ៉ាងទៀតបុរសម្នាក់នោះ តែងជួយផ្គត់ផ្គង់ឧបត្ថម្ភ ដល់ជីវភាពរស់នៅ ប្រចាំថ្ងៃរបស់នាងទៀតផង។កញ្ញា សុខ មុន្នីពិសី គឺជាតារាសម្តែង និងតារាបង្ហាញម៉ូដ ប្រចាំក្រុម Sun Super Model នាងក៏ជា តារាស្រីមួយដួង ដែលមានសម្រស់ស្រស់ស្អាត ឆើតឆាយ ធ្វើឲ្យបុរសៗជាច្រើន បានឈ្លក់វង្វេង រហូតមានអ្នកខ្លះព្យាយាម តាមទាក់ទងសុំ ធ្វើជាម្ចាស់គ្រងបេះដូង របស់នាងទៀតផង៕ ភីនរ៉ា