ភ្នំពេញ៖ អ្នកការទូតនៃសាធារណរដ្ឋបេឡារូសប្រចាំនៅកម្ពុជា ដែលមាន​និវេសនដ្ឋាន នៅសាធារណរដ្ឋ​​សង្គម​និយម​វៀតណាម បានបង្ហាញពីកិច្ចខិតខំព្យាយាមកែលំអរទំនាក់ទំនង និង​ធ្វើកិច្ចសហប្រតិបត្តិការជាមួយកម្ពុជា ជាច្រើនវិស័យ តាមរយៈការធ្វើទស្សនកិច្ចរបស់ រដ្ឋមន្រ្តីក្រសួងការបរទេស ដែលនឹងមកបំពេញទស្សនកិច្ច​នៅ​កម្ពុជា នាខែមីនា ឆ្នាំ២០១៤ ខាងមុខនេះ ។លោក Valary Sadokho ឯកអគ្គរដ្ឋ ទូតនៃសាធារណរដ្ឋបេឡារូស ប្រចាំ​នៅកម្ពុជា ដែលមាន​និវេសនដ្ឋាន នៅសាធារណរដ្ឋសង្គមនិយមវៀតណាមបានថ្លែងថា ដំណើរទស្សន​កិច្ច​ របស់រដ្ឋ​មន្រ្តីការបរទេសនេះ ក្នុងគោលបំណង​ពង្រឹងកិច្ចសហប្រតិបត្តិការទ្វេភាគីជាមួយ​នឹងកម្ពុជា លោកថ្លែងយ៉ាងដូច្នេះ កាលពីដើម​សប្តាហ៍កន្លងទៅនេះក្នុងកិច្ចជំនួបមួយ​ជាមួយ​នាយឧត្តមសេនីយ៍ នាង ផាត រដ្ឋលេខាធិការ​ក្រសួង​​ការ​ពារជាតិ ។

អ្នកការទូតរូបនេះបានបន្តថា ប្រទេសបេឡារូស កំពុងព្យាយាមកែលំអរទំនាក់ទំនង និង​ធ្វើកិច្ចសហ​ប្រតិបត្តិការ​​ជាមួយ កម្ពុជាជាច្រើនវិស័យ ហើយលោកថា ដំណើរទស្សនកិច្ច របស់លោករដ្ឋមន្រ្តីក្រសួងការបរទេសនាពេលនេះ គឺជាការបើកផ្លូវ ឲ្យរដ្ឋមន្ត្រីការបរទេស​បេឡារូស មកធ្វើទស្សនកិច្ចនៅកម្ពុជានាខែមិនាឆ្នាំនេះ ។ គ្រានោះដែរ លោក​ទូត ក៏បានថ្លែង​អំពីការរីកចម្រើននៅប្រទេសរបស់លោក លើវិស័យឧស្សាហកម្មកសិកម្ម យោធា សុខា​ភិបាល និង​វិស័យផ្សេងៗជាច្រើនទៀត។ក្នុងកិច្ចជំនួបនោះដែរ នាយឧត្តមសេនីយ៍ នាង ផាត ក៏បានសម្តែងការស្វាគមន៍ ចំពោះ​លោក វ៉ាឡារី សាដូខូ ដែលបានអញ្ជើញមកបំពេញ និងធ្វើការងារនៅកម្ពុជា។ លោក នាង ផាត បានលើកឡើងថា ក្នុងដំណើរទស្សនកិច្ច របស់រដ្ឋមន្រ្តី ក្រសួងការបរទេស នៃសាធារណ​រដ្ឋបេឡារូសនេះ នឹងធ្វើឲ្យកិច្ចសហ​​ប្រតិបត្តិ​ការ ជាទ្វេភាគីជាមួយកម្ពុជា កាន់តែល្អប្រសើរ​ថែមទៀត។លោកនាយឧត្តមសេនីយ៍បានបន្តថា រាជរដ្ឋាភិបាល​កម្ពុជា​​ក្នុងអាណត្តិទី៥ ក្រោមការដឹកនាំ​របស់សម្តេចតេជោ ហ៊ុន សែន ជានាយករដ្ឋមន្ត្រី មានគោលនយោបាយ​ទំនាក់​ទំនងក្នុង និងក្រៅប្រទេស កាន់តែទូលំទូលាយ ក្នុងនោះកម្ពុជាធ្វើការកែទម្រង់ ជាច្រើនវិស័យ រួមទាំង​វិស័យ​កងទ័ពផងដែរ ហើយសម្រាប់ដំណើរទស្សនកិច្ច របស់រដ្ឋមន្រ្តី នៃប្រទេសអតីត ក្រោមការគ្រប់គ្រង របស់សហ​ព័ន្ធសូវៀតនេះ នឹងធ្វើឲ្យទំនាក់ទំនងការបរទេសកម្ពុជា កាន់តែ​រីក​ធំធាត់បន្ថែមទៀត ហើយមិនតែប៉ុណ្ណោះ នឹង​ធ្វើ​ឲ្យ​​​ចំណងមិត្តភាពទ្វេភាគីកម្ពុជា និង​បេឡារូស កាន់តែខិតជិតគ្នាផងដែរ ទាំងវិស័យនយោបាយ សេដ្ឋកិច្ច និង​យោធា៕

ដោយ៖ ស.ស្អាត