ភ្នំពេញ៖ ដោយសំឡឹងឃើញលទ្ធភាពថាអាចស្រូបយកសន្លឹកឆ្នោតនឹងទទួលបាន​កៅអីនៅ​ក្នុងរដ្ឋ​សភានា​អាណត្តិ​ទី​៥នៃការបោះឆ្នោតជ្រើសរើសអ្នកតំណាងរាស្រ្តនៅរាជធានី​ភ្នំពេញគណ​បក្សរាជានិយម​ហ៊្វុនស៊ិនប៉ិច​បានបន្តយុទ្ធនាការ​ឃោសនាស្វែងរកសំឡេងគាំទ្រ​របស់​ខ្លួន​ជា​លើកទី២បន្ទាប់ពីថ្ងៃ​បើកយុទ្ធនាឃោសនាចាប់​ផ្តើមមានរយៈពេល​១០ថ្ងៃ​មក​​ហើយ​នោះ។បើទោះ​ជាព្រះអង្គឈរជាបេក្ខជនលំដាប់លេខរៀងទី១​នៅខេត្ត​កំពង់ចាមក៏ដោយក៏សម្តេចព្រះអនុជនរោត្តម អរុណរស្មី​ បេក្ខភាពនាយករដ្ឋមន្រ្តីបានប្រឹង​ប្រែងយ៉ាង​ខ្លាំងក្លា​ក្នុងយុទ្ធនាការនេះ។

នៅវេលាម៉ោង៨;០០ព្រឹកថ្ងៃសៅរ៍ទី៦ខែកក្កដានេះគេឃើញសមាជិកសមាជិកាគណបក្ស​ហ៊្វុនស៊ិនបប៉ិច​ប្រមាណ​ជា៥០០​នាក់រួមទាំងរថយន្តនិងម៉ូតូជាច្រើនគ្រឿងបានមកជួបជុំគ្នា​នៅតាម​បណ្តោយ​ផ្លូវ​ខាងក្រោយ​សហគមន៍​បុរីកីឡាដើម្បីដង្ហែរក្បួនឃោសនារបស់ខ្លួនទៅ​តាមគោលដៅឬទីប្រជុំជន​មួយចំនួន​ក្នុង​រាជធានី​ភ្នំពេញ។​ រហូតដល់ម៉ោង១០និង៣៥នាទី​ក្បួនឃោសនារបស់គណបក្ស​នេះបានបន្តឆ្លងស្ពាន​ជ្រោយចង្វារ​ឆ្ពោះទៅសង្កាត់ក្បាលកោះក្នុងខណ្ឌឬស្សីកែវ។
បើតាមមន្រ្តីនៃនាយកដ្ឋានព័តមានរបស់គណបក្សលោកធៀងវណ្ណដារ៉ុងបានឲ្យដឹងថាក្បួនឃោសនារបស់គណបក្ស​ហ៊្វុនស៊ិនបប៉ិចនឹងបន្តដង្ហែរជុំវិញសង្កាត់ក្បាល់កោះនិងសង្កាត់​កោះដាច់ទើបត្រលប់ចូលមក​ក្រុងវិញបន្តទៅខណ្ឌមានជ័យនៅវេលាម៉ោង២រសៀល។
សូមបញ្ជាក់ថាគណបក្ស​ហ៊្វុនស៊ិនបប៉ិចបានចាប់ផ្ដើមយុទ្ធនាការឃោសនា​រកសំឡេងឆ្នោតក្នុង​ទ្រង់ទ្រាយ​ធំដែល​មានអ្នក​ចូលរួមយ៉ាងច្រើនកុះករនៅក្នុងខេត្តកំពង់ចាមនិងមានពិធី​ដង្ហែក្បួនតាមបណ្ដា​ស្រុកនានា​ក្នុងខេត្ត និងដោយមានអ្នកឈរតាមដងផ្លូវចាំទទួលអប​អរសាទរដែលជាថ្នាក់ដឹកនាំ​សមាជិកសមាជិកា​នៃគណបក្ស​​ហ៊្វុនស៊ិនបប៉ិចនិងបន្ត​ការឃោសនាជាបន្តបន្ទាប់រហូតដល់ថ្ងៃទី០៦ខែកក្កដាឆ្នាំ២០១៣នេះ។
នៅតាមក្បួនហែរគេឮសម្តេចព្រះអនុជនរោត្តមអរុណរស្មីមានសុវនីយ៍អំពីគោល​នយោ​បាយ​ចំនួន១៨ចំណុចរបស់បក្សក្នុងការដឹកនាំនៅពេលដែលទទួលបានជ័យជន្នះ។ក្រៅពី​នោះព្រះអង្គមានអំពាវនាវឲ្យពលរដ្ឋនាំគ្នាទៅបោះឆ្នោតឲ្យបានគ្រប់ៗគ្នានិងបោះឆ្នោតជូន​គណបក្ស​ហ៊្វុនស៊ិនបប៉ិចដែលមានរូបវិមានឯករាជ្យនិងមានលេខរៀងទី២នៅក្នុងសន្លឹក​ឆ្នោត៕

ដោយ៖សុវណ្ណរ័ត្ន