ប្រទេសចិន៖ សារព័ត៌មានប្រទេសចិនបានអោយដឹងថា មនុស្សយ៉ាងហោចណាស់ ៧០នាក់បានបាត់ ខ្លួនបន្ទាប់ពីព្យុះទីហ្វុងបានធ្វើអោយទូកនេសាទបីបានលិចនៅក្នុងសមុទ្រចិន ភាគខាងត្បូង។ សារព័ត៌មាន ស៊ិនហ៊ួបានប្រាប់អោយដឹងថា កាលពីថ្ងៃអាទិត្យទូកចំនួនប្រាំ ដែលបានដឹកអ្នកដំណើរជាង ១៥០ នាក់ត្រូវ បានខ្យល់ព្យុះទីហ្វុង Wutip បោកបក់យ៉ាងខ្លាំង។ ប្រតិបត្តការជួយសង្រ្គោះកំពុងតែចាប់ផ្តើមហើយបានរាយ ការណ៍ថា មនុស្ស១៤នាក់ត្រូវបានរកឃើញ។ កាលពីថ្ងៃច័ន្ទខ្យល់ព្យុះបានធ្វើអោយមានការបាក់ដីយ៉ាងខ្លាំង នៅវៀតណាមកណ្តាល ហើយមនុស្សជាច្រើននាក់ត្រូវបានជម្លៀសចេញពីទីនោះ។
មន្រ្តីប៉ូលីស បានបន្តទៀតថាទូកនេសាទទាំងនោះបានបើកបរទៅកាន់កោះ Paracel ដែលមានចំងាយ ប្រហែលជា ៣៣០គីឡូម៉ែតពីឈូងសមុទ្រចិនភាគខាងត្បូង។ សារព័ត៌មានចិនបានបន្តទៀតថាទូក ទាំងបីត្រូវបានលិចកាលពីថ្ងៃអាទិត្យ។ មន្រ្តីប៉ូលីសបាននិយាយទៀតថាមាននាវាសង្រ្គោះយ៉ាងហោច
ណាស់ ១០គ្រឿងនិងឧទ្ធម្ភាគចក្រ ៦គ្រឿងគឺកំពុងតែចេញដំណើរទៅកន្លែងកើតហេតុនោះ។ កាលពី
ថ្ងៃច័ន្ទ ប្រទេសវៀតណាមបានជួបគ្រោះទឹកជំនន់និងការបាក់ដីយ៉ាងខ្លាំងដែលបណ្តាលមកពីទីហ្វុង Wutip។អ្នកព្យាករណ៍បានអោយដឹងថា ព្យុះទីហ្វុងនេះនឹងនាំមកទឹកភ្លៀងយ៉ាងខ្លាំង រីឯល្បឿន ខ្យល់វិញឡើងដល់ ១៥០គីឡូម៉ែតក្នុងមួយម៉ោង។ អ្នករាយការណ៍បានបន្តទៀតថា អ្នកស្រុកជាង ៤០០០០នាក់ បានចេញពីទី នោះដោយសុវត្ថិភាព។ កាលពីសប្តាហ៍មុន ព្យុះទីហ្វុង Usagi បានសំលាប់ មនុស្សជាង ២៥នាក់ នៅក្នុង ប្រទេសចិននិងប៉ះពាល់ដល់ប្រជាជនជាង ១ម៉ឺននាក់នៅក្នុងតំបន់ដីគោក។ ព្យុះនេះបានធ្វើអ្នកដំណើរ ជាច្រើននាក់ត្រូវខកចិត្តយ៉ាងខ្លាំងដែលធ្វើអោយពួកគេមិនអាចទៅចូលរួមក្នុងពីធីបុណ្យជាតិក្នុងរដូវស្លឹក ឈើជ្រុះបាន។ ដោយ៖ តុលា