ភ្នំពេញ៖ ប្រទេសឥណ្ឌូនេស៊ីកំពុងសំឡឹងឃើញសក្តានុពលកម្ពុជាលើវិស័យទេសចរណ៍ និងកសិកម្មនៅពេលប្រទេសមួយនេះ មិនទាន់មានទំនាក់ទំនងពាណិជ្ជកម្មទ្វេភាគីជាមួយប្រទេសកម្ពុជាណាមួយជាដុំកំភួននៅឡើយ។លោក កែវ ពិសិដ្ឋ នាយខុទ្ទការល័យសម្តេចអគ្គមហាពញាចក្រី ហេង សំរិន បានឲ្យអ្នកសារព័ត៌មានដឹងនៅក្រោយជំនួបនោះថា ក្នុងជំនួបជម្រាបលាសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី២៥ ខែធ្នូម្សិលមិញ លោក Seohardjono Sastromihardjo ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋឥណ្ឌូនេស៊ីប្រចាំនៅកម្ពុជា ដែលត្រូវបញ្ចប់អាណត្តិនៅកម្ពុជា បានបញ្ជាក់ថា ប្រទេសឥណ្ឌូនេស៊ីបានសំឡឹងឃើញសក្តានុពលនៃវិស័យទេសចរណ៍ និងកសិកម្មរបស់ប្រទេសកម្ពុជា។ ការចាប់អារម្មណ៍របស់ប្រទេសឥណ្ឌូនេស៊ីទៅលើវិស័យទាំងពីរនេះ គឺដោយសារឥណ្ឌូនេស៊ីមើលឃើញថា វិស័យទេសចរណ៍នៅកម្ពុជា គឺមានលក្ខណៈបែបធម្មជាតិ ចំណែកឯវិស័យកសិកម្ម គឺអង្កររបស់កម្ពុជាមានគុណភាពខ្ពស់ រស់ជាតិឆ្ងាញ់។
តាមប្រសាសន៍របស់លោក កែវ ពិសិដ្ឋ គឺលោកឯកអគ្គរដ្ឋទូតឥណ្ឌូនេស៊ី បានជម្រាបជូនសម្តេចពញាចក្រី ហេង សំរិន ថា កាលពីមុនមានប្រជាជនឥណ្ឌូនេស៊ីមករស់នៅកម្ពុជាប្រមាណ៧០០នាក់ប៉ុណ្ណោះ ប៉ុន្តែមកទល់នឹងពេលបច្ចុប្បន្ននោះ គឺមានការកើនឡើងប្រហែលជា១២០០នាក់។ កំណើននេះ គឺដោយសារប្រទេសកម្ពុជាមានសុខសន្តិភាព មានសុវត្ថិភាព ដែលបង្កលក្ខណៈងាយស្រួលក្នុងការប្រកបរបរអាជីវកម្ម។ដោយឡែក ក្នុងរយៈពេលបួនប្រាំឆ្នាំចុងក្រោយនេះ ទំហំដោះដូរពាណិជ្ជកម្មទ្វេភាគីរវាង ឥណ្ឌូនេស៊ី និងកម្ពុជា គឺមានប្រាក់ជាង៣០០លានដុល្លារអាម៉េរិក ដោយបានកើនឡើងចំនួន១៥ភាគរយ។ ទន្ទឹមគ្នានេះ ចំនួនវិនិយោគិនពីប្រទេសឥណ្ឌូនេស៊ីមកកាន់ប្រទេសកម្ពុជា ក៏មានការកើនឡើងផងដែរ។លោកបញ្ជាក់ថា ប្រទេសឥណ្ឌូនេស៊ី ចង់បង្កើតឲ្យមានការហោះហើរដោយត្រង់ពីកោះបាលី នៃប្រទេសឥណ្ឌូនេស៊ី មកកាន់ខេត្តសៀមរាប ក្នុងបំណងដើម្បីជាគោលដៅបង្កើនចំនួនទេសចរឥណ្ឌូនេស៊ីមកទស្សនានៅទីក្រុងសៀមរាបឲ្យបានច្រើនផង ក៏ដូចជាដើម្បីស្រូបយកចំនួនភ្ញៀវទេសចរពីប្រទេសកម្ពុជាទៅកាន់កោះបាលីដោយផ្ទាល់ ពោលគឺដើម្បីបង្កើនគោលដៅទេសចរណ៍ឲ្យគ្នាទៅវិញទៅមក។
ទាក់ទងនឹងការទិញអង្កររបស់កម្ពុជាវិញ លោក Seohardjono បានបញ្ជាក់ថា មូលហេតុដែលនាំឲ្យប្រទេសឥណ្ឌូនេស៊ីបានចុះហត្ថលេខាលើអនុសារណៈយោគយល់គ្នា(MoU)ក្នុងការទិញអង្ករពីកម្ពុជា គឺដោយសារកម្ពុជាមានអង្ករលើសពីតម្រូវការផ្គត់ផ្គង់ទីផ្សារក្នុងស្រុក ហើយអាចសល់នាំចេញទៅក្រៅប្រទេសបានយ៉ាងច្រើន។ កម្ពុជា ជាប្រទេសមួយក្នុងសហគមន៍អាស៊ាន ដែលញ៉ាំងឲ្យប្រទេសឥណ្ឌូនេស៊ីមិនចាំបាច់ទៅរកទិញអង្ករពីប្រទេសណាដែលនៅឆ្ងាយពីតំបន់នោះឡើយ។
កាលពីឆ្នាំ២០១២ ប្រទេសឥណ្ឌូនេស៊ី បានហត្ថលេខាលើMoUទិញអង្ករពីកម្ពុជាចំនួន១សែនតោន នៅក្នុង១ឆ្នាំៗលាសម្តេចអគ្គមហាពញាចក្រី ហេង សំរិន មានជំនឿយ៉ាងមុតមាំថា កិច្ចសហប្រតិបត្តិការរវាងកម្ពុជា និងប្រទេសឥណ្ឌូនេស៊ី នឹងត្រូវបានបន្តពង្រឹង និងពង្រីកឲ្យកាន់តែមានលក្ខណៈល្អប្រសើរជាងនេះទៀត។ប្រទេសឥណ្ឌូនេស៊ី បានចូលរួមចំណែកយ៉ាងសកម្មក្នុងការស្វែងរកសន្តិភាពជូនមាតុភូមិកម្ពុជា ដោយបានដើរតួជាអាជ្ញាកណ្តាលឲ្យអតីតភាគីជម្លោះកម្ពុជាចូលរួមតុចរចាសន្តិភាព។ ប្រទេសនេះ បាននាំមកនូវកិច្ចព្រមព្រៀងទីក្រុងប៉ារីសឆ្នាំ១៩៩១។ ជាបន្តបន្ទាប់មក ប្រទេសនេះ ក៏បានចូលរួមចំណែកអភិវឌ្ឍន៍នៅក្នុងប្រទេសកម្ពុជាដូចជា៖ ជំនួយអភិវឌ្ឍន៍ធនធានមនុស្ស ជំនួយលើកកម្ពស់សមត្ថភាពកងទ័ព ជំនួយផ្នែកកសិកម្ម និងជំនួយដល់ជនរងគ្រោះដោយទឹកជំនន់ ជាដើម៕ ដោយ៖ ស.ស្អាត