ភ្នំពេញ៖ ឣនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី២២ បានជម្រុញឲ្យមានការពង្រឹងការឣនុវត្តរចនាសម្ព័ន្ធដឹកនាំគ្រប់គ្រង និងលិខិតបទដ្ឋានគតិយុត្តិ ដើម្បីធានាឲ្យ វិស័យព្រះពុទ្ធសាសនាមានភាពរីកចម្រើន សក្តិសមជាទីគោរពបូជារបស់ពុទ្ធបរិស័ទ្ធ និង ពង្រឹងគុណភាពពុទ្ធិកសិក្សា ដើម្បីអភិវឌ្ឍន៍ធនធានបព្វជិកឲ្យកាន់តែមានសុក្រិត្យភាព និង គុណភាពខ្ពស់។
.jpg)
ពិធីនេះបានធ្វើឡើងនៅព្រឹកថ្ងៃទី១៧ ខែធ្នូ ឆ្នាំ២០១៣ នាសាលសន្និសីទចតុមុខ ក្រោមវត្តមានសម្តេចឣគ្គមហាពញាចក្រី ហេង សំរិន ប្រធានរដ្ឋសភា និងជាព្រះរាជតំណាងដ៏ខ្ពង់ខ្ពស់ព្រះករុណា ព្រះមហាក្សត្សនៃព្រះរាជាណាចក្រកម្ពុជា និងមានកិច្ចសហការ ពីគណៈសង្ឃនាយកទាំងពីរគណៈ ក្រសួងធម្មការនិងសាសនា ព្រមទាំងមានការយាង និមន្ត អញ្ជើញចូលរួមពីសំណាក់សម្តេច ព្រះរាជាគណៈ ព្រះថេរានុថេរៈ ព្រះមេគណ ព្រះឣនុគណ ព្រះចៅ ឣធិការ ថ្នាក់ដឹកនាំក្រសួង ស្ថាប័នពាក់ព័ន្ធ ឣភិបាល ឣភិបាលរងគ្រប់ខេត្ត រាជធានី ប្រធានឣនុប្រធានមន្ទីរធម្មការ និងសាសនាគ្រប់ខេត្ត\រាជធានី ព្រមទាំងមន្រីរាជការគ្រប់ជាន់ថ្នាក់ នៃក្រសួងធម្មការ និងសាសនាចំនួន ៨៥០នាក់។
.jpg)
លោក មិន ឃិន រដ្ឋមន្ត្រីក្រសួងធម្មការ និងសាសនា ថ្លែងថា ពិធីឣនុសំវច្ឆរៈមហាសន្និបាតមន្រីសង្ឃទូទាំប្រទេសលើកទី២២ ប្រារព្វធ្វើនាឆ្នាំនេះប្រព្រឹត្តទៅរយៈពេល០២ថ្ងៃ ពីថ្ងៃទី១៧-១៨ខែធ្នូឆ្នាំ២០១៣ ដើម្បីបូកសរុបនិងពិនិត្យមើលលទ្ធផលនៃការឣនុវត្តសង្ឃប្រកាសរបស់ឣនុសំវច្ឆរៈមហាសន្និបាតមន្ត្រីសង្ឃក្នុងឆ្នាំកន្លងទៅ ដោយមានកិច្ចពិភាក្សាផ្លាស់ប្តូរយោបល់លើការងារព្រះពុទ្ធសាសនានាពេលបច្ចុប្បន្ន និងលើកទិសដៅសម្រាប់ឣនុវត្តបន្ត សំដៅពង្រឹងការឣនុវត្តរចនាសម្ព័ន្ធដឹកនាំគ្រប់គ្រង និងរាល់លិខិតបទដ្ឋានគតិយុត្តិ ដែលមានស្រាប់ធ្វើឲ្យវិស័យព្រះពុទ្ធសាសនាមានភាពរីកចម្រើន សក្តិសមជាទីគោរពបូជារបស់ពុទ្ធបរិស័ទ្ធ និងពង្រឹងគុណភាពពុទ្ធិកសិក្សា ដើម្បីអភិវឌ្ឍន៍ធនធានបព្វជិកឲ្យកាន់តែមានសុក្រិត្យភាព និងគុណភាពខ្ពស់។
លោក មិន ឃិន បានបញ្ជាក់ថា ជាការពិតណាស់ ការរីកចម្រើនរបស់ពុទ្ធចក្រ និងអាណាចក្រ ត្រូវដើរទន្ទឹមគ្នា និងផ្តល់ដល់គ្នាទៅវិញទៅមកជាចាំបាច់ ជាក់ស្តែងវិស័យព្រះពុទ្ធសាសនា បានរួមចំណែកយ៉ាងច្រើនក្នុងការលើកកម្ពស់ការអប់រំចរិយាធម៌ សីលធម៌សង្គម និងកសាងសមិទ្ធិផលផ្សេងៗជូនសង្គមជាតិ។
ចាប់ពីក្រោយថ្ងៃរំដោះ ៧មករា ឆ្នាំ១៩៧៩ វិស័យព្រះពុទ្ធសាសនា បានចាប់ផ្តើមចេញពីចំណុចសូន្យ មកទទួលបាននូវសិទ្ធិសេរីភាពពេញលេញ ក្នុងការគោរពកាន់ព្រះពុទ្ធសាសនាឡើងវិញ ដោយចាប់ផ្តើមចេញពីព្រះសង្ឃមានតែចំនួន៧អង្គប៉ុណ្ណោះ ហើយរហូតមកដល់បច្ចុប្បន្ននេះ ព្រះរាជាណាចក្រកម្ពុជា មានវត្តចំនួន៤.៦៧៦វត្តនិងមានព្រះសង្ឃចំនួន៥.៧៥៧៣អង្គ ក្នុងនោះគណៈមហានិកាយមាន ៤.៤៨៤វត្ត ព្រះសង្ឃមានចំនួន ៥២.៨២៤អង្គ និងគណៈធម្មយុត្តិកនិកាយមាន ១៨៨វត្ត និងព្រះសង្ឃមានចំនួន៤.៦៣០អង្គ។ ចំពោះវិស័យពុទ្ធិកសិក្សាវិញ បានបណ្តុះបណ្តាលព្រះសង្ឃ តាំងពីថ្នាក់ធម្មវិន័យ ថ្នាក់ពុទ្ធិកបឋមសិក្សា រហូតដល់ថ្នាក់ឧត្តមសិក្សា។
មកទល់នឹងពេលនេះយើងមានពុទ្ធិកសាកលវិទ្យាល័យចំនួន៣ គឺពុទ្ធិកសាកលវិទ្យាល័យព្រះសីហនុរាជ ពុទ្ធិកសាកលវិទ្យាល័យព្រះសីហមុនីរាជា និងពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន កំពង់ចាម។ ក្រៅពីនេះ ក្រសួងនៅមានសាខាពុទ្ធិកសាកលវិទ្យាល័យព្រះសីហនុរាជចំនួន ២ទៀត គឺពុទ្ធិកមហាវិទ្យាល័យខេត្តកំពង់ឆ្នាំង និងពុទ្ធិកមហាវិទ្យាល័យខេត្តបាត់ដំបង។
ទន្ទឹមនឹងការយកចិត្តទុកដាក់ខ្ពស់លើវិស័យព្រះពុទ្ធសាសនា ដែលជាសាសនារបស់រដ្ឋនោះវិស័យពាហិរសាសនាក៏ត្រូវបានយកចិត្តទុកដាក់ផងដែរ ពោលគឺក្រសួងបានបំពេញភារកិច្ចប្រកបដោយការទទួលខុសត្រូវខ្ពស់ ធ្វើឲ្យមានសុខដុមនីយកម្មវិស័យសាសនា បង្ករលក្ខណៈឲ្យប្រជាជនមានសិទ្ធិសេរីភាពពេញលេញខាងជំនឿសាសនា ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជាយើង។
វឌ្ឍនភាពក្នុងវិស័យព្រះពុទ្ធសាសនារហូតមកដល់បច្ចុប្បន្ននេះ ត្រូវបានក្រសួងធម្មការ និងសាសនា ក៏ដូចជាគណៈសង្ឃនាយកទាំងពីរគណៈ នៃព្រះរាជាណាចក្រកម្ពុជា យកចិត្តទុកដាក់ខ្ពស់អនុវត្តតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំ បានបង្កលទ្ធភាពគ្រប់បែបយ៉ាង ធ្វើឲ្យវិស័យព្រះពុទ្ធសាសនា កាន់តែមានជំនឿជឿជាក់ពីប្រជាពលរដ្ឋពីមួយថ្ងៃទៅមួយថ្ងៃឥតឈប់ឈរ។
ពោលគឺព្រះពុទ្ធសាសនា បានរួមចំណែកជាមួយកាកបាតក្រហមកម្ពុជា លើការងារសង្គមកិច្ចមានដូចជាការអប់រំសីលធម៌ ចរិយាធម៌ គុណធម៌ សុជីវធម៌ដល់ពុទ្ធបរិស័ទ ធ្វើឲ្យប្រសើរឡើងនូវស្ថានភាពជនចាស់ជរា ស្ត្រី និងកុមារ។ ជាមួយនេះក្រសួងធម្មការ និងសាសនាក៏បានខិតខំអនុវត្តយ៉ាងសកម្មតាមភារកិច្ច ដែលបានកំណត់ក្នុងផែនការយុទ្ធសាស្ត្រអភិវឌ្ឍន៍ជាតិរបស់រដ្ឋាភិបាលដោយទទួលបានលទ្ធផលគួរជាទីមោទនៈ។
ក្នុងបរមនាមព្រះករុណា ព្រះមហាក្សត្រ នៃព្រះរាជាណាចក្រកម្ពុជា សម្តេចអគ្គមហាពញាចក្រី ហេង សំរិន បានថ្លែងនៅក្នុងមហាសន្និបាតប្រចាំឆ្នាំនេះថា ស្របទៅនឹងការរីកចំរើននេះ នៅមានបញ្ហាជាច្រើនទៀតដែលត្រូវដោះស្រាយដោយឈរលើទស្សនៈថា ព្រះពុទ្ធសាសនាគឺជាកម្លាំងដឹកនាំចរិយាធម៌សង្គម។ការពិគ្រោះការពិភាក្សាលើបច្ចុប្បន្នភាព ដែលមហាសន្និបាតបានលើកឡើង គឺជាប្រការសមស្រប និងចាំបាច់ត្រូវដោះស្រាយចំពោះមុខ។ សម្តេច បានកោតសរសើរដល់អង្គសន្និបាត ដែលចាប់អារម្មណ៍លើការពង្រឹងរចនាសម្ព័ន្ធគ្រប់គ្រងអភិបាលកិច្ច ការគោរពប្រណិបត្តិធម៌វិន័យ ចូលរួមការងារសង្គមជាមួយ
រាជរដ្ឋាភិបាលកម្ពុជា ពិសេសការអប់រំសីលធម៌សង្គមឲ្យល្អផូរផង់។
សម្តេចបន្តថា ការពង្រឹងគុណភាពលើអភិបាលកិច្ចគ្រប់លំដាប់ថ្នាក់ ក្នុងជួរមន្ត្រីសង្ឃត្រូវផ្សារភ្ជាប់នឹងបច្ចេកវិទ្យាទំនើប ដើម្បីឲ្យកិច្ចការព្រះពុទ្ធសាសនា មានសណ្តាប់ធ្នាប់ល្អ ធានាបាននូវសាមគ្គីភាពក្នុងជួរពុទ្ធសាសនិកជន ជាប្រការសំខាន់បំផុត។ តាមរយៈពុទ្ធិកសិក្សា ប្រទេសជាតិទទួលបាននូវអ្នកមានចំណេះដឹងជាច្រើន ដែលជាសសរទ្រូងដ៏រឹងមាំរួមចំណែកថែរក្សា ការពារវប្បធម៌ ប្រពៃណីជាតិ អរិយធម៌ តាមគន្លងធម៌ ដែលជាអត្តសញ្ញាណជាតិកម្ពុជាយើង។
ការយកចិត្តទុកដាក់ចំពោះពុទ្ធិកសិក្សា ជាការចាំបាច់ដែលត្រូវពង្រីក និងពង្រឹងពីទីក្រុង រហូតដល់ជនបទ ហើយចាប់ពីពេលនេះតទៅ ជាឱកាសដ៏ល្អសម្រាប់ប្រជាជាតិកម្ពុជាយើងរួមគ្នាយ៉ាងជិតស្និទ្ធ រក្សាការពារសេចក្តីសុខសាន្តជូនសង្គមជាតិ ដោយប្រកាន់យកព្រះពុទ្ធឱវាទជាប្រទីបបំភ្លឺផ្លូវសម្រាប់អប់រំ ចរិយាធម៌ និងស្មារតី ជំរុះចោលនូវការលោភលន់ ការច្រណែននិន្ទា គំនុំ និងអំពើហឹង្សាជាដើម។
សម្តេចប្រធានរដ្ឋសភា បានអំពាវនាវចំពោះពុទ្ធសាសនិក ទាំងបព្វជិក ទាំងគ្រសហ្ថ ឲ្យខិតខំប្រណិបត្តិខ្លួនឯងផង ជួយអប់រំពុទ្ធបរិស័ទ្ធសមស្របតាមលំអានខ្លឹមសារក្នុងព្រះត្រៃយ៍បីដកដែលជាព្រះធម៌របស់ព្រះសម្មាសម្ពុទ្ធ បានមន្សល់ទុកឲ្តយើងគ្រប់គ្នាសំអាតកាយវាចា ជម្រះនូវសេចក្តីសៅហ្មងទាំងឡាយ ធ្វើដំណើរតាមគន្លងព្រះធម៌ មានសេចក្តីជ្រះថ្លា ប្រមូលផ្តុំកម្លាំងកសាង អរិយធម៌ វប្បធម៌ ប្រជាធិបតេយ្យ សេរីពហុបក្សតាមគោលការណ៍នីតិរដ្ឋ និងចូលរួមបំពេញកុសលទាំងឡាយ ដើម្បីជាគុណប្រយោជន៍ដល់ការថែរក្សា ការពារ សេចក្តីសុខសន្តិភាព ស្ថេរភាព ក្តីសង្ឃឹម លើកស្ទួយការកសាងជាតិ ឆ្ពោះទៅរកសេចក្តីថ្កុំថ្កើង
រុងរឿងសម្បូរសប្បាយតរៀងទៅ៕ ដោយ ៖ សស្អាត