ភ្នំពេញ៖ ដើម្បីរឹតចំណងមេត្រីភាព ជាប្រពៃណីរវាងព្រះជាណាចក្រកម្ពុជា និង​ព្រះរាជាណា​ចក្រ​​​ ជប៉ុន សម្តេចរាជ​បុត្រី ព្រះអនុជ នរោត្តម អរុណរស្មី ប្រធានគណបក្ស ហ៊្វុនស៊ិនប៉ិច និង​ស្វាមី កាលពីរាត្រីថ្ងៃទី១០ខែកុម្ភៈកន្លង​ទៅ​នេះ បានយាងនិងអញ្ជើញ ទៅទស្សនកិច្ចរយៈ​ពេល​១​សប្តាហ៍នៅប្រទេសជប៉ុន ដើម្បីចូលរួមខួប​អនុស្សាវរីយ៍លើក​ទី​​៦០ នៃទំនាក់ទំនងការ​ទូត​កម្ពុជា - ជប៉ុន និងបន្តពង្រីកពង្រឹងចំណងមេត្រីភាពដែលមានល្អស្រាប់ ឲ្យកាន់តែ​ប្រសើរ​​​ជានិច្ចនិរន្ធ។

ជូនដំណើរដល់ព្រលានយន្តហោះអន្តរជាតិភ្នំពេញ គេឃើញមាន លោក ញឹក ប៊ុនឆៃ អគ្គលេខាធិការ គណបក្ស និងថ្នាក់ដឹកនាំ សមាជិក សមាជិការបក្សជាច្រើនរូបទៀត។មុនពេលចេញដំណើរសម្តេចព្រះអនុជ នរោត្តម អរុណ​រស្មី បានមានសុវណីយ៍ថា ក្នុងនាម​ជាព្រះអនុជ នៃព្រះករុណា ព្រះមហាក្សត្រ នៃព្រះរាជាណាចក្រកម្ពុជា សម្តេច យាងទៅ​ប្រទេសជប៉ុននេះ​ តបតាមការអញ្ជើញរបស់ក្រសួងការបរទេសនៃព្រះរាជាណាចក្រ​ជប៉ុន ដើម្បីបំពេញ​ទស្សនកិច្ចជាផ្លូវការ និងចូលរួមក្នុងឱកាសខួបអនុស្សាវរីយ៍លើកទី៦០ នៃទំនាក់​ទំនងការទូត  និងបន្តពង្រឹងពង្រីក​ចំណងមេត្រីភាព ដែលមានស្រាប់រវាង​ព្រះរាជវង្សានុវង្ស​នៃប្រទេសទាំងពីកម្ពុជា-ជប៉ុន។

សម្តេចមានសុវនីយ៍ទៀតថា ក្នុងដំណើរយាងបំពេញទស្សនកិច្ចនេះនឹងមានព្រះរាជសវនា​ការ​ជាមួយសមាជិក​រាជ​វង្សានុវង្ស ព្រះរាជាណាចក្រជប៉ុន ជំនួបជាមួយរដ្ឋមន្រ្តីការបរទេស  ជំនួបជាមួយ​មន្រ្តីការបរទេសទទួល​បន្ទុកកិច្ចការ​អាស៊ី និងទស្សនកិច្ចនៅទីក្រុងតូត្យូ  និង ខេត្ត គីយ៉ូដូ ។សូបជម្រាបថា សម្តេចព្រះអនុជ នរោត្តម អរុណរស្មី និងស្វាមី ទៅបំពេញទស្សនកិច្ចរយៈ​ពេល១សប្តាហ៍ គឺចាប់ពីរាត្រីថ្ងៃទី១០ខែកុម្ភៈនេះតទៅ ហើយគ្រោងនឹងយាងនិវត្តមក​មាតុប្រទេសវិញនៅថ្ងៃអាទិត្យទី១៦ ខែកុម្ភៈឆ្នាំ២០១៤ខាងមុខនេះ៕

ដោយ៖ ស.ស្អាត