ខេត្តកំពង់ចាម ៖ ការប្រកួតកីឡាសិស្សមធ្យមសិក្សាជ្រើសរើសជើងឯកទូទាំងប្រទេស ប្រចាំឆ្នាំសិក្សា២០១២-
២០១៣ ក្នុងនោះមាន បាល់ទាត់ បាល់ទះ បាល់បោះ និងអត្តពលកម្ម ត្រូវបានប្រារព្ធពិធីបើកកាលពីរសៀលថ្ងៃ
ទី២៨ មីនា នៅទីលានបាល់ទាត់ស្ថិតក្នុងបរិវេណពហុកីឡដ្ឋាន សង្កាត់កំពង់ចាម ក្រុងកំពង់ចាម ក្រោមអធិបតី
ភាពលោកអឹុម សិទ្ធី រដ្ឋមន្ត្រីក្រសួងអប់រំ យុវជន និងកីឡា។
លោកដួង មាសចំរើន ប្រធាននាយកដ្ឋានអប់រំកាយ និងកីឡា និងជាប្រធានគណៈកម្មការរៀបចំការប្រកួតបាន
ថ្លែងអំណរគុណចំពោះ មន្ទីរអប់រំ យុវជន និងកីឡារាជធានីខេត្ត ដែលបានរៀបចំការប្រកួតកីឡាសិស្សមធ្យម
សិក្សាថ្នាក់រាជធានីខេត្ត ដើម្បីជ្រើសរើសក្រុមកីឡាមកចូលរួមប្រកួតតាមកាលបរិច្ឆេទដែល ក្រសួងបាន
កំណត់ និងបានអញ្ជើញមកចូលរួមយ៉ាងច្រើនកុះករ ។ការប្រកួតបានចាប់ផ្តើមធ្វើពីថ្ងៃទី២៥ មីនា និងគ្រោង
បញ្ចប់នៅថ្ងៃទី៨ មេសាខាងមុខ ។ ឆ្លងតាមការណែនាំរបស់ក្រសួង គណៈកម្មការរៀបចំការប្រកួតបានទទួល
ប្រតិភូកីឡាសិស្ស ដែលបានចុះឈ្មោះចូលរួមគ្រប់ចំនួនទាំង២៤មន្ទីរអប់រំ យុវជន និងកីឡា រាជធានី ខេត្ត ដូច
ដែលមន្ត្រីចាត់តាំងកម្មវិធីបានជម្រាបជូនរួច ។
ដកស្រងពីកោះសន្តិភាព
ចំពោះសមាសភាពក្រុមកីឡាចូលរួមមានដូចតទៅ ៖ បាល់ទាត់បុរសមាន២៤ក្រុម (ស្មើឆ្នាំមុន), បាល់ទាត់នារី
មាន២១ក្រុម (កើន១ក្រុម), បាល់ទះបុរសមាន២៤ក្រុម (ស្មើឆ្នាំមុន), បាល់ទះនារីមាន២២ក្រុម (កើន១ក្រុម),
បាល់បោះបុរសមាន២០ក្រុម (ស្មើឆ្នាំមុន), បាល់បោះនារីមាន១៩ក្រុម (ស្មើឆ្នាំមុន), អត្តពលកម្មបុរសមាន២៤
ក្រុម (ស្មើឆ្នាំមុន), អត្តពលកម្មនារីមាន២៤ក្រុម (ស្មើឆ្នាំមុន) សរុបអត្តពលិកទាំងអស់មាន២.១៣០នាក់ ក្នុងនោះ
នារី១.០២៦នាក់ ស្មើនឹង៤៨,១៦ភាគរយ បើប្រៀបធៀបនឹងឆ្នាំសិក្សា២០១១-២០១២ កើននារី២ក្រុម មានចំនួន
៤៩នាក់ ស្មើនឹង១,៦៨ភាគរយ ។
លោកអុឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ឱ្យដឹងដែរថា ក្រសួងអប់រំ យុវជន និង
កីឡា តែងតែយកចិត្តទុកដាក់លើការងារអប់រំកាយ និងកីឡា ដែលជាសមាសភាពមួយមិនអាចខ្វះបានក្នុង
ចំណោមសមាសភាព ទាំងប្រាំនៃវិស័យអប់រំ សំដៅកសាងកាយសម្បទារឹងមាំ មានសុខភាពល្អ ពន្លឿនការ
សិក្សាឱ្យមាននិរន្តរភាព ។ ម្យ៉ាងទៀតការប្រកួតកីឡាគឺជាពិធីជួបជុំគ្នាមួយរវាងកីឡាករ កីឡាការិនីដើម្បីផ្លាស់
ប្តូរនូវបទពិសោធន៍ពីគ្នាទៅវិញទៅមក ក្នុងន័យសាមគ្គីភាព និងចេះអធ្យាស្រ័យគ្នាទៅវិញទៅមក ។
លោករដ្ឋមន្ត្រីបានបញ្ជាក់បន្ថែមថា វិស័យកីឡាបានរួមចំណែកកាត់បន្ថយភាពអសកម្ម និងអំពើអបាយមុខក្នុង
សង្គមដូចជា ការសេពគ្រឿងញៀន ល្បែងស៊ីសង អំពើហិង្សាក្នុងគ្រួសារ និងក្នុងសង្គមជាតិ ។ វាជាប្រការ
សំខាន់ណាស់សម្រាប់ក្មួយៗស្ថិតក្នុងវ័យសិក្សាដែលចាំ បាច់ត្រូវកសាងខ្លួនឱ្យក្លាយជាកូនល្អ សិស្សល្អ និងមិត្ត
ល្អ ។ ដើម្បីក្លាយខ្លួនជាពលរដ្ឋល្អនៅថ្ងៃអនាគតនោះ ក្មួយៗត្រូវបណ្តុះឱ្យបាននូវសម្បត្តិទាំងបួនក្នុងជីវិតគឺ
១-សម្បត្តិផ្លូវកាយ ២-សម្បតិ្តបញ្ញា ៣-សម្បត្តិសីលធម៌ និង៤-សម្បត្តិទ្រព្យ ទើបឆ្លើយតបបានទៅនឹងការកសាងធនធានមនុស្សប្រកបដោយគុណភាព និងប្រសិទ្ធភាពខ្ពស់ស្របតាមយុទ្ធសាស្ត្រចតុកោណដំណាក់
កាលទី២ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ
ប្រទេសប្រកបដោយគតិបណ្ឌិតខ្ពស់ ៕