ភ្នំពេញ៖ យោងតាមសេចក្តីប្រកាសព័ត៌មាន របស់មជ្ឈមណ្ឌលកំចាត់មីនកម្ពុជា ហៅកាត់ថា (CMAC)បានបង្ហាញឱ្យដឹងថា គិតត្រឹមរយៈពេល១០ខែ ឆ្នាំ២០១៣ ចាប់ពីខែមករា ដល់ខែ តុលា មានប្រជាពលរដ្ឋកម្ពុជា បានស្លាប់ដោយសារគ្រាប់មីនចំនួន៦២នាក់ ហើយចំពោះតួលេខនេះដែល គឺ មានការថយចុះ៨ភាគរយ បើប្រៀបធៀបទៅនឹងរយៈពេលដូចគ្នា កាលពីឆ្នាំទៅមុន មានអ្នកស្លាប់ ចំនួន៦៨នាក់។
.jpg)
ដោយឡែក ចំពោះអ្នករបួសវិញមានចំនួន៩៥នាក់ មានការធ្លាក់ចុះ៤១ភាគរយបើធៀបនឹងរយៈពេលដូចគ្នាកាលពីឆ្នាំ ២០១២ មានចំនួន១៦២នាក់ ។បើយោងតាមរបាយការណ៍បានដដែលបញ្ជាក់ទៀតថា រហូតមកដល់នាពេលបច្ចុប្បន្ននេះ កម្ពុជានៅមានផ្ទៃដី ដែលមានមីនប្រហែលជាង១ពាន់គីឡូម៉ែត្រក្រឡាទៀត និង ពីរពាន់គីឡូម៉ែត្រក្រឡា សរុបទាំងមីននិងគ្រាប់មិនទាន់ផ្ទុះ ហើយក្នុងនោះស្រុករតនមណ្ឌលខេត្តបាត់ដំបងនៅសល់ច្រើនជាងគេ។
គ្រាប់មីនជាអាវុធមួយសម្លាប់មនុស្ស ដែលនៅតែបង្កការភ័យខ្លាច សម្រាប់ខេត្តមួយចំនួន នៅប្រទេសកម្ពុជា ហើយវាបានបន្សល់ទុក បន្ទាប់ពីសង្គ្រាមរាប់ទសវត្សរ៍។របាយការណ៍ខាងលើនេះបានបន្ថែមថា គ្រោះថ្នាក់បណ្តាលមកពីគ្រាប់មីន សល់ពីសម័យសង្គ្រាម ចាប់តាំងពីឆ្នាំ១៩៧៩-២០១៣បានបណ្ដាលឲ្យមានអ្នក ស្លាប់ និងរបួសមានចំនួន៦៤.២៩៨នាក់។
គ្រាប់មីនគ្រប់ប្រភេទ ប្រមាណ៤ ទៅ ៦លានគ្រាប់ បានស្ថិតនៅពាសពេញ ប្រទេសកម្ពុជា បន្ទាប់ពីសង្គ្រាម បានបញ្ចប់ទាំងស្រុង កាលពី១៩៩៨នោះ។
ជាក់ស្តែង បញ្ហាគ្រាប់មីន និងគ្រាប់មិនទាន់ផ្ទុះនេះ ប្រមុខរាជរដ្ឋាភិបាលកម្ពុជា តែងតែបានក្រើនរំលឹកដល់ប្រជាពលរដ្ឋខ្មែរទាំងអស់ ឲ្យប្រុងប្រយ័ត្នដោយមូលហេតុថា កាកសំណល់សង្គ្រាមនេះហើយដែលបានធ្វើឲ្យប្រជាពលរដ្ឋរងផលប៉ះពាលមានសោកនាដកម្មដ៏ធ្ងន់ធ្ងររហូតដល់បច្ចុប្បន្ន។ដើម្បីបន្តការកាត់បន្ថយចំនួនគ្រោះថ្នាក់ឲ្យបានច្រើន ជាអតិបរមាបន្តទៀត ប្រមុខរាជរដ្ឋាភិបាលកម្ពុជា បានអំពាវនាវដល់ ប្រតិបត្តិករសកម្មភាពមីន ទាំងអស់ឲ្យខិតខំបន្ថែមទៀតក្នុងការបោសសំអាតមីនដើម្បីឆ្លើយតបទៅនឹងប្រជាពលរដ្ឋនិងអាជ្ញាធរមូលដ្ឋាន។
កន្លងមក បញ្ហាគ្រាប់មីន និងគ្រាប់សំណល់មិនទាន់ផ្ទុះ បានកើតឡើងពាស់ពេញលើផ្ទៃដីកម្ពុជា ចាប់តាំងសម័យពីសង្គ្រាម ឥណ្ឌូចិន និងជម្លោះផ្ទៃក្នុងរបស់កម្ពុជារយៈពេលបីទសវត្សន៍កន្លងមកនេះ ហើយបានបង្កឲ្យប្រទេសកម្ពុជាមានសោកនាដកម្មយ៉ាងធ្ងន់ធ្ងរ ជាពិសេសបានធ្វើឲ្យអាយុជីវិតរបស់ប្រជាពលរដ្ឋខ្មែរនិងជនបរទេសមួយចំនួនបានបាត់បង់និងពិការភាពជាច្រើទៀតផង។
ហើយមិនតែប៉ុណ្ណោះគ្រាប់មីនមិនត្រឹមតែបង្ករឲ្យប៉ះពាល់អាយុជីវិត និងពិការដល់ប្រជាពលរដ្ឋតែប៉ុណ្ណោះទេ វាថែមទាំងជាឧបសគ្គសម្រាប់ស្តារ និងអភិវឌ្ឍន៍ជីវភាពគ្រួសារ និងសេដ្ឋកិច្ចរបស់ខ្មែរផងដែរ។សូមរំលឹកដែរថា កាលពីថ្ងៃទី២៦ ខែវិច្ឆិកា ២០១៣ ប្រទេសស្វីស បានផ្តល់ជំនួយសម្រាប់គម្រោង បោសសំអាតមីន ដំណាក់កាលទី២ ចំនួន៣លានដុល្លារអាម៉េរិក។ ក្រៅពីស្វីស ប្រទេសជប៉ុន ក៏ជាម្ចាស់ជំនួយដ៏ធំ សម្រាប់កម្ពុជាផងដែរ ក្នុងសកម្មភាពបោសសម្អាតមីនសល់ពីសម័យសង្គ្រាម៕ ដោយ ៖ ភីនរ៉ា