ភ្នំពេញ៖ មន្ត្រីជាន់ខ្ពស់គណបក្សប្រជាជនកម្ពុជា លោក ខៀវ កាញារីទ្ធ បានលើកឡើងថា សម្តេចក្រុមព្រះ នរោត្តម រណឫទ្ធិ ដែលបានប្រកាសថា នឹងវិលចូលធ្វើនយោបាយឡើងវិញ នាពេលនេះ មិនមែនជាការគំរាមកំហែងអ្វី ដល់គណបក្សកាន់អំណាចទេ។លោក ខៀវ កាញារីទ្ធ ដែលជាអ្នកនាំពាក្យគណបក្សប្រជាជនកម្ពុជា បានថ្លែងថា ជាសិទ្ធិរបស់លោក ហើយខ្ញុំឃើញថា លោកក៏នៅមានឥទ្ធិពលមួយចំនួនដែរ ក្នុងការងារនយោបាយ។ យើងមិនមានការបារម្ភអីទេ និយាយរួម នេះជាការសាកល្បងជាថ្មីឡើងវិញរបស់លោក។
អំពីទំនាក់ទំនងរវាងសម្តេច ហ៊ុន សែន និងសម្តេចក្រុមព្រះ នរោត្តម រណឫទ្ធិ ត្រូវបានលោក ខៀវ កាញារីទ្ធ បានបន្ថែមថា ទំនាក់ទំនងជាបុគ្គល រវាងសម្តេចហ៊ុនសែន និងសម្តេចក្រុមព្រះ គឺជិតស្និទ្ធល្អណាស់ ក៏ប៉ុន្តែតែងតែមានការរង្គោះរង្គើបន្តិច បន្តួច ប្រៀបដូចជា អណ្តាត និងធ្មេញ។ យ៉ាងណាទាំងពីរនាក់ ជាមនុស្ស ដែលមានមនោសញ្ចេតនាល្អជាមួយគ្នា និងតែងតែមានការយោគយល់គ្នា។
កាលពីថ្ងៃទី២៤ ខែកុម្ភៈ ឆ្នាំ២០១៤ សម្តេចក្រុមព្រះ នរោត្តម រណឫទ្ធិ អតីតប្រធានគណបក្សហ្វ៊ុនស៊ិនប៉ិច បានប្រកាសប្រាប់អ្នកកាសែតថា ព្រះអង្គនឹងវិលចូលក្នុងឆាកនយោបាយឡើងវិញ តាមរយៈការបង្កើតគណបក្សថ្មីមួយ មិនមែនហ្វ៊ុនស៊ិនប៉ិច ឬក៏គណបក្សជាតិនិយម ដែលព្រះអង្គ ធ្លាប់ដឹកនាំកន្លងមកទេ។ នោះគឺគណបក្ស សង្គមរាស្ត្ររាជាធិបតេយ្យ ដែលព្រះអង្គ នឹង ដាក់ពាក្យស្នើសុំទៅកាន់ក្រសួងមហាផ្ទៃ ដើម្បីបង្កើតជាផ្លូវការ នៅក្នុងឆ្នាំ២០១៤នេះ។
មូលហេតុ នៃការសម្រេចព្រះទ័យ វិលមកក្នុងឆាកនយោបាយជាថ្មីឡើងវិញ ពេលនេះ ត្រូវបានសម្តេចក្រុមព្រះ នរោត្តម រណ ឫទ្ធិ អះអាងថា មកពីបញ្ហានយោបាយ នៅកម្ពុជា ពិសេសក្រោយការបោះឆ្នោត កាលពីខែកក្កដា ដែលគណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ មិនបានដោះស្រាយ។ព្រះអង្គបានបញ្ជាក់ថា គណបក្ស ដែល បង្កើតថ្មីនេះ គឺស្ថិតនៅកណ្តាល មិនប្រឆាំង ហើយក៏មិនគាំទ្ររដ្ឋាភិបាលរបស់គណបក្សប្រជាជនកម្ពុជាដែរ ៕
ដោយ៖ ស ស្អាត