ភ្នំពេញ៖ រាជរដ្ឋាភិបាលកម្ពុជាបានសម្រេចទំលាក់កញ្ចប់ថវិកា បង្កើតពន្ធនាគារថ្មីចំនួន២​កន្លែង​​នៅ​ក្នុងខេត្តចំនួន​២​នៅភាគ​ខាង​លិចនៃប្រទេសកម្ពុជា ដើម្បីធានាឲ្យការគ្រប់គ្រង​ទណ្ឌិត​ឲ្យត្រូវតាមបទដ្ឋានអន្តរជាតិ មានសន្តិសុខ អនាម័យ សុវត្ថិភាព។

លោក នុត សាអាន រដ្ឋលេខាធិការក្រសួងមហាផ្ទៃមានប្រសាសន៍នៅ​ក្នុងសិក្ខាសាលា​នៅព្រឹកថ្ងៃទី៥ខែធ្នូនេះថា ពន្ធនាគារ​​ដែលគ្រោងនឹងបង្កើតថ្មីនេះ ទី១ស្ថិតនៅក្នុងខេត្ត​ឧត្តរមានជ័យ និងមួយកន្លែងស្ថិតនៅក្នុងខេត្តប៉ៃលិន ហើយពន្ធនា​គារ​នីមួយៗ​គ្រោងនឹង​ចំណាយ​ថវិកាជាង១៤០០លានរៀលជាថវិការបស់រាជរដ្ឋាភិបាល។

លោករដ្ឋលេខាធិការបន្តថា ពន្ធនាគារទាំង២នេះនឹងត្រូវសាង សង់នៅក្នុងរង្វង់ឆ្នាំ​ក្រោយ​នេះ បន្ទាប់ពីក្រសួងសេដ្ឋកិច្ច​និង​ហិរញ្ញ​វត្ថុ​បានចេញលិខិតបញ្ជារ ចំណាយរួច​ហើយ​នោះ​។ ការសម្រេចបង្កើតពន្ធនាគារថ្មីនេះ ដោយសារតែខេត្ត ទាំង២ពុំទាន់​មានពន្ធនាគារ​ផ្ទាល់ខ្លួននៅឡើយក្នុងនោះ ខេត្តឧត្តរមានជ័យ កន្លងមកបានផ្ញើរអ្នកទោ សនៅស្នងការដ្ឋាន​នគរបាលខេត្ត ចំណែក​​​ខេត្តប៉ៃលិនវិញអ្នកទោសត្រូវបានដាក់នៅក្នុងរោងកុន ដែលបាន​បោះបង់ចោលមួយកន្លែង។

លោក នុត សាអាន បន្ថែមថា នេះជាគម្រោងមួយដ៏មានសារៈសំខាន់ដើម្បីធានា​ឲ្យអ្នក​ទោសកាន់តែទទួលបាន​ស្ថានភាពល្អ​ប្រសើរ​​ជាងមុន បើទោះបីជាពួកគេត្រូវបានដកហូត​សិទ្ធិសេរីភាពក៏ដោយ ក្នុងនោះនឹងបង្កើតឲ្យមានការអប់រំ​ជំនាញ​វិជ្ជាជីវៈ​ផ្សេងៗដល់ពួកគេ​ដូចនៅមណ្ឌលអប់រំដ៏ទៃទៀតដែរ ។

លោកស្រី វ៉ាន់ ហៀលី​តំណាងឧត្តមស្នងការសិទ្ធិមនុស្ស​នៃអង្គការសហប្រជាជាតិ​ប្រចាំកម្ពុជា បានវាយតម្លៃពីស្ថានភាព​ពន្ធនា​គានៅកម្ពុជាបច្ចុប្បន្ននេះ កំពុងឈានទៅ​រកស្ថានភាពល្អប្រសើរទៅមុខ ដោយទណ្ឌិតនីយមួយៗរស់នៅក្នុងបរិស្ថានល្អ ហូប​ចុក​គ្រប់​គ្រាន់ទទួលបានការអប់រំ និងមានឱកាសជួបជាមួយក្រុមគ្រួសារ។

លោកស្រីតំណាងឧត្តមស្នងការសិទ្ធិមនុស្ស​បញ្ជាក់ថា នេះជាការប្តេជ្ញាចិត្តខ្ពស់របស់​រាជរដ្ឋាភិបាល ក្នុងការកែលម្អលើ​បញ្ហា​នេះ​។ តែទោះជាយ៉ាងនេះក្តីពន្ធនាគារនៅតាម​ខេត្ត​ដ៏ទៀតក៏ត្រូវកែលម្អផងដែរ ព្រោះថានៅមានបញ្ហាប្រឈមមួយចំនួន ដូចជាការ​យឹតយ៉ាវ​​ក្នុងការបញ្ជូនអ្នកទោសទៅសាលាឧទ្ធរណ៍ កង្វះហេដ្ឋារចនាសម្ពន្ធ័ដែលពន្ធនាគារមាន​ភាពចង្អៀត និងការអនុវត្ត​ច្បាប់ឲ្យបានពេញលេញ ដែលនេះជាយន្តការដោះស្រាយមួយ ដើម្បីឲ្យស្របតាមបទដ្ឋានសិទ្ធិមនុស្សអន្តរជាតិ។

សូមបញ្ជាក់ថា នៅកម្ពុជានាពេលបច្ចុប្បន្នមានទណ្ឌិតទាំងអស់ចំនួន១៤.៥៦៨នាក់ ក្នុងនោះ​បានលើកលែង​ទោសចំនួនជាង​៥០០នាក់ នៅក្នុងព្រឹត្តការណ៍ធំៗចំនួន២លើក ដែលលើក​ទី១នៅក្នុងថ្ងៃថ្វាយព្រះភ្លើង ព្រះបរមរតនកោដ្ឋ​ មានចំនួន៤០៥​នាក់ និងនៅថ្ងៃចំរើនព្រះជន្ម​ព្រះករុណា​ព្រះបាទសម្តេចព្រះបរមនាថ នរោត្តម ​សីហមុនី ​ព្រះមហាក្សត្រនៃព្រះរាជា​ណាចក្រ​កម្ពុជាមានចំនួនជាង១០០នាក់៕ ដោយ ៖ សស្អាត