ក្រចេះ៖ នេះជាលើកទី២ហើយដែលមន្រ្តីខណ្ឌរដ្ឋបាលជលផលខេត្តនិងកំលំាងចំរុះចុះបង្រ្កាបនិងរឹបអូសឧបករណ៍អ្នកនេសាទខុសច្បាប់ នៅត្រង់ចំណុចបឹងរំលិច ក្នុងភូមិសាស្រ្ត ក្រុងក្រចេះ នៅក្នុងខែនេះ គិតទាំងប្រតិបត្តិការជាលើកទី២ នៅថ្ងៃទី២៣ ខែសីហា ឆ្នំា២០១៣ ។
ក្នុងការចុះបង្រ្កាបនោះ គេឃើញដឹកនំាដោយ លោក ខ័ណ្ឌ ចំណាន អនុប្រធានគណៈកម្មាធិការបង្រ្កាបបទល្មើសជលផលដែលសហការជាមួយសហគមន៍នេសាទអូរឫស្សីនិងរកាកណ្តាល។ ក្នុងនោះកំលំាងចំរុះរឹបអូសបានស្បៃមុងប្រវែង១៨០០ម៉ែត្រមាត់លូចំនួន៦៥មាត់ចម្រឹងឫស្សី៥០០ដើម និងចាក់លែងកូនត្រីគ្រប់ប្រភេទចូលក្នុងបឹងចំនួន២៥គីឡូក្រាមផងដែរ។ ទោះជាមានការហាមឃាត់ពីសំណាក់មន្រ្តីជលផល ដល់អ្នកនេសាទកុំឲ្យរកត្រីក្នុងរដូវត្រីពងកូនយ៉ាងណាក្តីក៏ប្រជាអ្នកនេសាទទាំងនោះ មិនយកចិត្តទុកដាក់ស្តាប់និងអនុវត្តតាមឡើយគឺពួកគេភ័យខ្លាចតែកំលំាងចំរុះចុះទៅចាប់ម្តងៗតែប៉ុណ្ណោះ ពោលគឺក្រោយពីសមត្ថកិច្ចទាំងនោះឡើងមកវិញពួកគេបន្តដាក់ស្បៃមុង និងមាត់លូដដែលជាដដែល គឺបានតែត្រឹមដូចវែកចកប៉ុណ្ណោះ។
ក្នុងរដូវបិទនេសាទមានប្រជាជនភាគច្រើនគេយល់ពីសារសំខាន់ ដោយមិនបានចុះទៅរកត្រីនោះទេ តែក៏មានអ្នកនេសាទមួយចំនួននៅតែលួចលាក់ចុះទៅរកត្រី។ ដូច្នេះហើយទើបប្រជាពលរដ្ឋនៅក្រុងក្រចេះ សូមឲ្យសមត្ថកិច្ចចំរុះបន្តចុះបង្រ្កាបឲ្យដូចភ្លៀងរលឹម បើមិនដូច្នេះទេគ្មានត្រីហូបសំរាប់ឆ្នំាក្រោយៗឡើយ។ ក្នុង ការចុះបង្រ្កាបទាំង២លើកពុំមានចាប់បានអ្នកនេសាទខុសច្បាប់ណាម្នាក់ឡើយ ដោយគ្រាន់តែរឹបអូសបាន ឧបករណ៍នេសាទខុសច្បាប់យកទៅរក្សាទុកនៅឯរដ្ឋបាលជលផលខេត្តប៉ុណ្ណោះ។
ពលរដ្ឋបានអំពាវនាវដល់មន្រ្តីរដ្ឋបាលជលផលមេត្តាចុះទៅមើលតាមដងទន្លេម្តុំថ្មគ្រែផង ព្រោះមានទូកអ្នកនេសាទខុសច្បាប់ច្រើនណាស់កំពុងធ្វើចរាចរណ៍រកត្រីក្នុងដែនអភិរក្សនៅទីនោះ។ នៅតាមដងទន្លេម្តុំថ្មគ្រែនោះមានទូកនេសាទចាប់ពី១០ទៅ១៥គ្រឿងចេញនេសាទត្រីក្នុងរដូវហាមឃាតជារៀងរាល់ថ្ងៃ ។ ហើយត្រីដែលគេនេសាទបានគឺមានពងពេញៗពោះនិងមានទម្ងន់ចាប់ពី៣គីឡូក្រាមដល់៧គីឡូក្រាមឯណោះ។
ប្រជាពលរដ្ឋសុំឲ្យមន្រ្តីជំនាញ ក៏ដូចជាអាជ្ញាធរមូលដ្ឋានសហការគ្នាទប់ស្កាត់ឲ្យបាននូវការធ្វើនេសាទខុសច្បាប់ និងនៅរដូវត្រីពងនេះ ដើម្បីឲ្យមច្ឆាជាតិមានការកើនឡើងនៅឆ្នាំក្រោយ។ ម៉្យាងទៀតពួកគាត់បានស្នើដល់មន្រ្តីពាក់ព័ន្ធគ្រប់ជាន់ថ្នាក់ពេលចុះអនុវត្តច្បាប់កុំឲ្យមានការយោគយល់ហើយបង្រ្កាបគ្នាគេទុកគ្នាឯងវាមិនល្អមើលនោះឡើយត្រូវអនុវត្តតាមច្បាប់ដែលកំណត់ដោយរាជរដ្ឋាភិបាលទើបប្រសើរ៕