ភ្នំពេញ៖  ប្រជាជននៅក្នុងបណ្តាប្រទេសជាសមាជិកអាស៊ាន មិនថាប្រទេសអភិវឌ្ឍន៍ ឬក៏ប្រទេសកំពុងអភិវឌ្ឍន៍នោះទេគឺ​មាន​​ប្រជាជនដែលប្រឈម ឬក៏អត់ការងារធ្វើមានស្ទើរ​គ្រប់​ប្រទេសគ្រាន់តែអត្រាអត់ការងារធ្វើនោះមានតិចតួច​ឬច្រើនជាងកម្ពុជា​តែប៉ុណ្ណោះ គឺ​អាស្រ័យទៅលើរបបដឹកនាំប្រទេស ថាតើមេដឹកនាំប្រទេសនោះមានភាពឈ្លាសវៃ មាន​ឆន្ទះជាតិ​កម្រិតណា បូករួមទាំងកត្តាធនធានមនុស្សនៃប្រទេសនោះផងដែរ។

លោកទេសរដ្ឋមន្រ្តី ឆាយ ថន រដ្ឋមន្រ្តីក្រសួងផែនការ បានមានប្រសាសន៍ឲ្យដឹងនៅក្នុងកម្ម​វិធីផ្សព្វផ្សាយលទ្ធផល​នៃអង្កេត​កម្លាំង​ព​លកម្ម និងពលកម្មកុមារឆ្នាំ២០១២ដែលបានធ្វើ​នៅ​សណ្ឋាគារកាំបូឌីយ៉ាណា នាព្រឹកថ្ងៃទី២៧ វិថ្ឆិការ ឆ្នាំ​២០១៣​នេះ​ថា អត្រាអត់ការងារធ្វើ​របស់​ប្រជាជននៅក្នុងបណ្តាប្រទេសក្នុងតំបន់មានកម្រិតប្រហាក់ប្រហែលគ្នា ពិសេសប្រទេសកំពុង អភិវឌ្ឍន៍។

លោកទេសរដ្ឋមន្រ្តីបានលើកឡើងថា នៅក្នុងប្រទេសជសមាជិកអាស៊ានយើងនេះ អត្រា​ប្រជាជនពេញកម្លាំងអត់​ការងារធ្វើ​មាន៖ ប្រទេសប៊្រុយណេ អត្រាប្រជាជនអត់ការងារធ្វើចំនួន​២,៦​ភាគ​រយ មានន័យថា ក្នុងចំណោមប្រជាជនពេញ​កម្លាំង​១០០០នាក់​គឺអត់ការងារ​ធ្វើ​២៦​នាក់ ប្រទេសឥណ្ឌូនេស៊ីមានចំនួន៦,១ភាគរយ ប្រទេសឡាវមានចំនួន២,៥ភាគរយប្រទេស​ម៉ាឡេស៊ី មានចំនួន៣,៣ភាគរយ ប្រទេសហ្វីលីពីន មានចំនួន៧,១ភាគរយ ប្រទេស​សឹង្ហបូរី មានចំនួន១,៨ភាគរយ ប្រទេស​ថៃ​មានចំនួន០,៨ភាគរយ ប្រទេសវៀតណាម​មាន​ចំនួន២,១ភាគរយ និងព្រះរាជាណាចក្រកម្ពុជាមាន​ចំនួន២,៧ភាគរយ​នៃ​ចំនួនប្រជាពលរដ្ឋ​ពេញកម្លាំងសរុប។លោកទេសរដ្ឋមន្រ្តីបញ្ជាក់ថា នៅក្នុងប្រទេសកម្ពុជាយើង តាមលទ្ធផលនៃការអង្កេត​កម្លាំង​ពលកម្ម និងពលកម្មកុមារឆ្នាំ​២០១២​​​បានរកឃើញថា ប្រជាជនប៉ាន់ស្មាននៅឆ្នាំ២០១២មាន​១៤,៩លាននាក់ក្នុង​នោះ​៧,៦លាន​នាក់ជាស្រ្តី។ ចំពោះ​លទ្ធផល​ពលកម្មកុមារបង្ហាញថា កុមារ​ដែលមានអាយុ៥-១៧ឆ្នាំ មានជិត៤​លាននាក់​ស្មើនឹង​២៦,៦ភាគរយនៃប្រជាជនទាំង​អស់ ក្នុងនោះកុមារីមាន១,៩លាននាក់ស្មើនឹង៤៨,៨ភាគរយនៃកុមារទាំងអស់។

ក្នុងចំណោមកុមារអាយុ៥-១៧ឆ្នាំនៅឆ្នាំ២០១២ មាន៧៩ភាគរយកំពុងរៀននៅពេលអង្កេត ប្រមាណ១១ភាគរយនៃ​ពួកគេ​បានរៀន​ពីមុន ហើយបានបោះបង់ការសិក្សានៅពេលអង្កេត និង១០ភាគរយមិនដែលបានរៀនសោះ។ ការអង្កេតខាងលើ​បានបង្ហាញទៀតថា ប្រមាណ​១៩,១ភាគរយនៃកុមារទាំងអស់ជាកុមារធ្វើការងារ និង៨០,៩ភាគរយជាកុមារមិនធ្វើការងារ។ ក្នុងនោះ១០,៩ភាគរយជាពលកម្មកុមារ ៤,៩ភាគរយជាកុមារក្នុងពលកម្មមិនប្រកបដោយ​គ្រោះថ្នាក់ និង៦ភាគរយជាកុមារក្នុង​ពលកម្ម​ប្រកបដោយគ្រោះថ្នាក់។

លោកទេសរដ្ឋមន្រ្តីបន្តថា ប្រជាជនដែលមានអាយុ១៥ឡើងទៅមានប្រមាណជិត១០,៨​លាននាក់ស្មើនឹង៧២,២ភាគរយ នៃ​ប្រ​ជាជន​ទាំងអស់ ក្នុងនោះស្រ្តីមានចំនួន៥,៦ភាគរយ​ស្មើនឹង៥២,១ភាគរយ។ ដោយឡែក​អត្រាចូលរួមក្នុងពលកម្ម​នៅឆ្នាំ​២០១២មានប្រមាណ​៦៨,៨ភាគរយ ៧៥,៨ភាគរយសម្រាប់​បុរសនិង៦២៤ភាគរយសម្រាប់ស្រ្តី។សូមបញ្ជាក់ថា តាមការប៉ាន់​ប្រមាណនៅកម្ពុជា អត្រាប្រជាជនមានការងារធ្វើ៧៩,៣ភាគរយ និងអត្រាគ្មានការងារធ្វើមាន​២,៧ភាគរយនៃកម្លាំង​ពលកម្ម​សរុប​៕ ដោយ​ ៖សស្អាត