ភ្នំពេញ៖ ក្រសួងយុត្តិធម៌គ្រោងពង្រីកមណ្ឌលសេវាកម្មយុត្តិធម៌នៅកម្ពុជាឲ្យបានគ្រប់សុ្រក ក្រុងខណ្ឌ ទូទាំងប្រទេសនាពេល ឆាប់ៗនេះដើម្បីធានាឲ្យប្រជាពលរដ្ឋកាន់តែ​មានភាព​ងាយ​ស្រួលក្នុងការទទួលសេវាយុត្តិធម៌ តាមរយៈការដោះស្រាយវិវាទ ក្រៅប្រពន្ធ័តុលាការ។

តាមផែនការគ្រោងទុករបស់ក្រសួងយុត្តិធម៌ នឹងបង្កើតមណ្ឌលសេវាកម្មយុត្តិធម៌​ឲ្យបាន​គ្រប់ក្រុង ស្រុក ខណ្ឌនៅទូទាំងប្រទេស ប៉ុន្តែជាជំហាននៅឆ្នាំ២០១៤ខាងមុខនេះ​នឹងបង្កើត​ចំនួន៥មណ្ឌលបន្ថែមទៀតនៅក្នុងរាជធានីភ្នំពេញ បន្ទាប់ពីរាជរដ្ឋាភិបាល មានគម្រោងបង្កើត​ខណ្ឌថ្មីចំនួន៥បន្ថែមទៀតដែរនោះ ។

ជាមួយគ្នានឹងការបង្កើត៧មណ្ឌលទៀត នៅតាមបណ្តាលខេត្តមួយចំនួនដែលមិនទាន់​មានមណ្ឌលសេវាកម្មនេះ ដូចជានៅ ខេត្តបន្ទាយមានជ័យ កំពង់ចាម កំពង់ធំ និងស្វាយរៀង​ ។ ការពង្រីកគម្រោងមណ្ឌលសេវាកម្មយុត្តិធម៌នេះ ធ្វើឡើង ខណៈ​ពេល​វាកំពុងទទួលបានការ​គាំទ្រយ៉ាងខ្លាំងពីប្រជាពលរដ្ឋ បើទោះជាមណ្ឌលនេះនៅមានកម្រិតតិចតួចនៅឡើយ​ ពោល​គឺ​ទើបតែមានចំនួន៣១មណ្ឌល ស្ថិតក្នុងរាជធានីខេត្តចំនួន៩ក្នុងនោះមាននៅរាជធានីភ្នំពេញ ខេត្តកំពង់ស្ពឺ កំពង់ឆ្នាំង
បាត់ដំបង សៀមរាប រតនគីរី មណ្ឌលគីរី កំពត និងខេត្តព្រៃវែង។

លោក ហ៊ី សោភា រដ្ឋលេខាធិការក្រសួងយុត្តិធម៌នៅព្រឹកថ្ងៃទី២៥ ខែវិច្ឆិកានេះ មានប្រសាសន៍ថា ការពង្រីកមណ្ឌល​សេវាកម្ម​យុត្តិធម៌នៅតា មបណ្តាលខេត្តបន្ថែមទៀតនេះ គឺពិនិត្យឃើញពីឧបសគ្គនានា របស់ប្រជាពលរដ្ឋក្នុង​ការស្វែងរកយុត្តិធម៌​តាម​ផ្លូវតុលាការ ពិសេសលើពលរដ្ឋក្រីក្រ ស្រ្តី និងជនជាតិដើមភាគតិច។ លោកបន្តថា គម្រោងនេះ នឹងបង្ខិតសេវាយុត្តិធម៌​ឲ្យនៅ​ជិតប្រជាពលរដ្ឋ នឹងរួមចំណែកកាត់បន្ថយភាពក្រីក្រ និង កាត់បន្ថយសំណុំរឿងតូចតាចនៅតាមសាលាដំបូងរាជធានីខេត្ត។

លោក ប៊ុនយ៉ៃ ណារិន ​អគ្គនាយករងនិងជាប្រធានគម្រោងសិទ្ធិទទួលបានយុត្តិធម៌​នៃក្រសួងយុត្តិធម៌ បានមានប្រសាសន៍ថា មណ្ឌលសេវាកម្មយុត្តិធម៌ គឺស្ថិតក្នុងគម្រោងសិទ្ធិ​ទទួលបានយុត្តិធម៌ ដែលទទួលបានថិកាពីរាជរដ្ឋាភិបាល ដោយមានស្នាក់​ការនៅតាម​បណ្តាល​ក្រុងស្រុកខណ្ឌក្នុងនោះអនុវត្តដោយមន្រ្តីក្រសួងយុត្តិធម៌ និងមន្រ្តីនគរបាល នៃ​ក្រសួង​មហាផ្ទៃ។

ចូលរួមជាមួយគ្នានោះ លោក ឃួង ស្រេង ​អភិបាលរងរាជធានីភ្នំពេញ​បានថ្លែងថា មណ្ឌលសេវាកម្មយុត្តិធម៌ទាំង៩ ខណ្ឌ នៃ​រាជ​ធានីភ្នំពេញកំពុងមានប្រជាបិ្រយភាព​ដោយ​ទទួល​បានការគាំទ្រយ៉ាងខ្លាំងពីប្រជាពលរដ្ឋ ព្រោះវាបានផ្តល់សេវា កម្មយ៉ាង​មានប្រសិទ្ធិភាព​ដោយមិនយកកម្រៃសេវាក្នុងរយៈពេលកន្លងមកនេះ។សូមបញ្ជាក់ថា តាមស្ថិតិមណ្ឌលសេវាយុត្តិធម៌​ទាំង៣១​មណ្ឌល នៃរាជធានីខេត្ត ក្នុងរយៈ៩ខែ ឆ្នាំ២០១៣នេះ ការដោះស្រាយ​វិវាទមានចំនួន២៥១៤ករណី ក្នុងនោះសម្រេច​បាន​១២១២​​ករណី តម្កល់១០៦ករណី នីតិវិធីបន្ត១៣៦កណី និងកំពុងចាត់​ការ​ចំនួន១០៦០ករណី ក្នុងនោះ​ក៏មានការ​ប្រឹក្សា​យោបល់​មានចំនួន១១១២ករណីផងដែរ៕ ដោយ៖ សស្អាត