ភ្នំពេញ៖ អង្គការសង្គមស៊ីវិលសំខាន់ៗចំនួន៣ ផ្តើមធ្វើសន្និសីទកាសែតនៅថ្ងៃតែមួយ​​តែ​ទីកន្លែង​ផ្សេងគ្នា នា​ព្រឹក​ថ្ងៃ​ចន្ទ ទី​២៥ ខែ វិច្ឆិកា ឆ្នាំ​២០១៣នេះ ក្នុងរាជធានី​ភ្នំពេញ ​​ពាក់ព័ន្ធ​នឹង​បញ្ហា​សិទ្ធិមនុស្ស បញ្ហា​កម្មករ​កម្មការិនីរោងចក្រកាត់ដេរ និង​កិច្ច​ការពារ​ព្រៃឈើ នៅក្នុង​ព្រះរាជាណាចក្រ​កម្ពុជា​។​

​សន្និសីទកាសែតទី​១ដែលក្រុមអង្គការ​សង្គម​ស៊ីវិលបានធ្វើនៅ​មជ្ឈមណ្ឌល​វប្បធម៌​កូរ៉េ​ ​គឺពាក់​ព័ន្ធ​ទៅលើ​បញ្ហា​សិទ្ធិមនុស្ស ដែលបានលើកនូវប្រធានបទស្ដីពី ការដាក់​របាយការណ៍ ទៅក្នុង​ដំណើរការ​នៃ​ការពិនិត្យ​មើល​ជា​សាកល តាម​កាលកំណត់ លើក​ទី​ពីរ​សម្រាប់​កម្ពុជា​។ សន្និសីទ​កាសែត​នេះ បានប្រព្រឹត្តទៅ​ក្នុងរយៈពេលពេញ​មួយ​ថ្ងៃទី​២៥​វិច្ឆិកា​នេះតែម្តង ។

​រីឯសន្និសីទទី​២ឯណេះវិញ គឺ​សហព័ន្ធ​សហជីព ដែលធ្វើកិច្ចការលើ​វិស័យ​ឧស្សាហកម្ម​កាត់ដេរ​ចំនួន​៤ ក៏​បានជួបជុំ​រួមគំនិតគ្នា​ធ្វើ​សន្និសីទកាសែត​មួយដែរ ដែលការជួបជុំគ្នានេះក្នុង​បំណង​បង្ហាញ​ពី​ដំណើរការ​នៃជំហរទាមទារ​ប្រាក់​ឈ្នួលកម្មករ​កម្មការិនី​រោងចក្រ ១៥៤ ដុល្លារ និង​គោលជំហរ​របស់​សហជីពទាំងមូល ព្រមទាំង​ផែនការ​យុទ្ធសាស្រ្តបន្ត សម្រាប់​ការងារ​សហជីពលើ​យុទ្ធនាការ​ទាមទារ​ប្រាក់​ឈ្នួល​សម្រាប់​កម្មករ និ​យោ​ជិត ក្នុង​ឆ្នាំ​២០១៤​ដែលនឹង​មកដល់ក្នុងដ៏ឆាប់ខាងមុខនេះ។

សន្និសីទ​កាសែតទី២​នេះ បាន​ប្រារព្ធ​ធ្វើ​នៅ​ការិយាល័យ​សម្ព័ន្ធ​សហជីព​ស៊ីខា​វឌូ របស់លោក អាត់ ធន់ ក្នុង​សង្កាត់​បឹងទំពុន ខណ្ឌ​មានជ័យ រាជធានី​ភ្នំពេញ​ ដោយមានការចូលរួមពី​អ្នកតំណាងក្នុងផ្នែកឧស្សាហកម្ម​កាត់ដេរ​ចំនួន​៤ និងភាគីពាក់ព័ន្ធ​លើ​កិច្ចការនេះមួយ​ចំនួន​ទៀត។​
ចំណែកឯសន្និសីទទី​៣ក៏បានធ្វើព្រមពេលជាមួយគ្នានេះដែរគឺនៅ​ ម៉ោង ៨ និង ៣០ នាទី ព្រឹក​ថ្ងៃ​ចន្ទទី​២៥​នេះ គឺ​នៅ​សមាគម​សិទ្ធិមនុស្ស អាដហុក ស្ថិតនៅ​ជាប់​របង​ខាងជើង​វិទ្យាល័យ វត្ត​កោះ ខាងត្បូង​ផ្សារ​ថ្មី ក្នុង​រាជធានី​ភ្នំពេញ ក៏​បាន​ធ្វើ​សន្និសីទ​កាសែត​មួយផ្សេងទៀតដែរ ដែល និយាយ​អំពី​ការស្នើ​សុំ​វិធានការណ៍ ក្នុងការ ការពារ​ព្រៃឈើ នៅក្នុង​ប្រទេស​កម្ពុជា​​។

ក្នុងសន្និសីទកាសែតទី៣នេះ មានអ្នក​តំណាង​ប្រជា​សហគមន៍មកពីខេត្តចំនួន៧ ដែលរងនូវ​ផលប៉ះពាល់ដោយការកាប់​បំផ្លាញ​ព្រៃឈើ រួម​ទាំង​តំណាង​អង្គការ​សិទ្ធិមនុស្ស ។ ​ជាមួយ​គ្នា​នោះ​ក្រុមអ្នកការពារ​ព្រៃឈើ អ្នក​តំណាង​ប្រជា​សហគមន៍មកពី៧ខេត្ត បាន​លើកមក​បង្ហាញ​ពី​វិនាសកម្ម​ព្រៃឈើនៅក្នុងដែនដីដែលធ្លាប់សម្បូរទៅដោយធនធានព្រៃឈើទាំងនោះ ព្រម​ទាំង​​បានលើក​នូវកិច្ចការពារ​ជាច្រើនដែលអង្គការសង្គមស៊ីវិល និង ដៃគូរពាក់ព័ន្ធ ក៏ដូច​ជា​ប្រជា​សហគម​ន៍ដែលរស់នៅតាម​សហគមន៍​និមួយ​ៗ​​មកបង្ហាញ និងរួមគ្នារិះរកនូវវិធាន​ការណ៍ថ្មីៗ​បន្តបន្ថែមទៀតក្នុងការរួមគ្នាទប់ស្កាត់ និងការការពារធនធានព្រៃឈើកម្ពុជា​ដែល​​សេស​សល់ឲ្យគង់វង្ស ប្រយោជន៍សម្រាប់ការធានានូវនិរន្តភាពបរិស្ថានធម្មជាតិ និង​កត្តារស់នៅជីវចម្រុះ ក៏ដូច​ជាជីវិតរស់​នៅរបស់មនុស្សជាតិ៕​ ដោយ ៖ សស្អាត