ភ្នំពេញ៖ លោក ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ បានបញ្ជាក់ថា ស្ថានភាពនៅ តាមព្រំដែន កម្ពុជា-ថៃ មានសភាពស្ងប់ស្ងាត់ជាធម្មតា មិនមានអ្វីប្រែប្រួលគួរអោយកត់សម្គាល់នោះទេ បើទោះបីជា ថ្ងៃប្រកាសសាលក្រមរបស់តុលាការយុត្តិធម៌អន្តរជាតិទីក្រុងឡាអេ ស្តីពីសំណុំរឿងប្រាសាទព្រះវិហារកាន់តែខិតជិតចូលមកដល់ក៏ដោយ។ក្នុងឱកាសអញ្ជើញពិនិត្យការងារហ្វឹកហ្វឺន និងឧបករណ៍សម្ភារៈធម្យោបាយគ្រឿងបំពាក់ ត្រៀមចូលបេសកកម្មរក្សាសន្តិភាព នៅវិទ្យាស្ថានហ្វឹកហ្វឺនបណ្តុះបណ្តាលកងកម្លាំងរក្សាសន្តិភាព បោសសំអាត មីន និងកាក សំណល់សង្រ្គាមឧត្តុង្គ នាព្រឹកថ្ងៃទី០៦ ខែ វិច្ឆិកា ឆ្នាំ២០១៣នេះ លោក ឧបនាយករដ្ឋមន្រ្តី បានមានប្រសាសន៍ ថា កងទ័ព និងប្រជាជនកម្ពុជា-ថៃ នៅតែប្រាស្រ័យទាក់ទងគ្នាជាធម្មតា គ្មានបញ្ហាអ្វីនោះឡើយ។លោកថា បញ្ហាសំណុំរឿងប្រាសាទព្រះវិហារ ទោះស្ថិតក្នុងរូបភាពណាក៏ដោយ រដ្ឋាភិបាលប្រទេសទាំងពីរនឹងរក្សាសន្តិភាពអោយបាន ដោយការព្រមទទួលយកការសម្រេចរបស់តុលាការ។
.jpg)
លោកឧបនាយករដ្ឋមន្រ្តីក៏បានទទូចអោយភាគីទាំងពីរកុំស្តាប់លើការបកស្រាយនានា ដែលជាការញុះញង់របស់ពួកឆ្វេងនិយម និងពួកក្រុមជ្រុលនិយមសៀម ដែល កំពុងបំផុសចលនា និងការតវ៉ានានា ត្រៀមប្រឆាំងទៅនឹងលទ្ធផល នៃការប្រកាសសាលក្រមរបស់តុលាការឡាអេ លើសំណុំរឿងប្រាសាទព្រះវិហាររបស់ខ្មែរ ដែលនឹងធ្វើឡើងនាថ្ងៃទី១១ ខែវិច្ឆិកា ឆ្នាំ២០១៣ខាងមុខនេះ។គួរបញ្ជាក់ថា ដើមឆ្នាំ២០១៤នេះ កម្ពុជានឹងបញ្ជូនកងកម្លាំងរក្សាសន្តិភាព ៦៣៤នាក់ ក្រោមឆ័ត្រអង្គការសហប្រជាជាតិ ទៅកាន់ប្រទេសចំនួន៣ ក្នុងតំបន់អាហ្រ្វិក មានដូចជា ប្រទេសម៉ាលី ស៊ូដង់ខាងត្បូង និងប្រទេសលីបង់៕ ដោយ៖ រតនា