ភ្នំពេញ៖ លោក Howard’s Bamsey អគ្គនាយកវិទ្យាស្ថានសកលអភិវឌ្ឍន៍បៃតងហៅកាត់ថា Global Green Growth Institut (GGGI )បានសន្យាបន្តសហប្រតិបត្តិការល្អជាមួយរាជរដ្ឋាភិបាលកម្ពុជា ក៏ដូចសភាជាតិកម្ពុជាគាំទ្រការអនុវត្តនយោបាយយុទ្ធសាស្រ្តអភិវឌ្ឍន៍បៃតងជាតិ ដោយវិទ្យាស្ថានជួយស្វែងរកមូលធនផ្តល់ជូនការកសាង សមត្ថភាព បច្ចេកវិទ្យាបៃតង រួមជាមួយដៃគូអភិវឌ្ឍន៍ឯទៀត ព្រមទាំងជួយចលនាប្រភពទុន ទ្វេភាគី ពហុភាគី រួមអភិវឌ្ឍន៍បៃតង តាមផែនការយុទ្ធសាស្រ្តអភិវឌ្ឍន៍បៃតងជាតិ។
លោក Howard’s Bamsey បានមានប្រសាសន៍យ៉ាងដូច្នេះ ក្នុងឱកាសដែលលោក ដឹកនាំគណៈប្រតិភូចូលជួបជាមួយលោកបណ្ឌិត ម៉ុក ម៉ារ៉េត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា នៅវិមានរដ្ឋសភា នារសៀលថ្ងៃទី៣១ ខែតុលា ឆ្នាំ២០១៣ ដើម្បីសម្តែងការគួរសម និងពិភាក្សាការងារក្នុងពេលដែលលោក បណ្ឌិតបានផ្ទេរភារកិច្ចពីក្រសួងបរិស្ថាន មកទទួលជាប្រធានគណៈកម្មការទី៣ នៃរដ្ឋសភា។
ជាមួយនោះ លោកបណ្ឌិត ម៉ុក ម៉ារ៉េត បានជម្រាបជូនគណៈប្រតិភូពីរចនាសម្ព័ន្ធរដ្ឋសភា និងតួនាទីភារកិច្ចរបស់គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា ព្រមទាំងបង្ហាញពីការគាំទ្ររបស់សភាជាតិទាំងមូល ដោយអនុម័តផ្តល់សច្ចាប័ណ្ណដល់រាជរដ្ឋាភិបាលទទួលស្គាល់វិទ្យាស្ថានសកលអភិវឌ្ឍន៍បែតង ដែលពិតជាការឆ្លើយតបទៅនឹងសំណូមពរនៃការអភិវឌ្ឍន៍ប្រទេសជាតិ ប្រកបដោយចីរភាព កាត់បន្ថយបានភាពក្រីក្រជាជំហានៗជូនប្រជាជនកម្ពុជា ព្រមទាំងការការពារបរិស្ថាន វប្បធម៌ និងសង្គម កាន់តែមានស្ថេរភាពជៀសផុតបានភាពវឹកវរក្នុងសង្គម។លោកបណ្ឌិតបន្តថា រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ កំពុងចាត់តាំងអនុវត្តផែនការយុទ្ធសាស្រ្តអភិវឌ្ឍន៍បៃតង ដែលបានអនុម័តរួចក្នុងដើមឆ្នាំ២០១៣មកនេះ។ លោកបណ្ឌិតបានសម្តែងអំណរគុណ លោក Howard’s Bamsey ចំពោះឆន្ទះនយោបាយ និងបំណងល្អចូលរួមយ៉ាងសកម្មក្នុងការអភិវឌ្ឍន៍បៃតងនៅកម្ពុជាក៏ដូចជាក្នុងក្របខ័ណ្ឌសកលលោក៕
ដោយ៖ ស.ស្អាត