ភ្នំពេញ៖ ប្រជាជនក្នុងខេត្តទាំង៦ដែលគម្រោងយុទ្ធសាស្ត្រអភិវឌ្ឍន៍ប្រកបដោយនិរន្តរភាព​សម្រាប់គ្រួសារ​ទទួលដី​ពី​គម្រោងបែងចែកដីដើម្បីសង្គមកិច្ច និងការអភិវឌ្ឍន៍សេ​ដ្ឋកិច្ច ពុំទាន់មានជីវភាពនឹងនរ និងមានសុវត្ថិភាពស្បៀង​ពិត​​​​ប្រាកដនៅឡើយទេ។នេះបើតាមការលើកឡើងរបស់លោក ទេសរដ្ឋមន្ត្រី អ៊ឹម ឈុនលឹម រដ្ឋមន្ត្រី​ក្រសួង​រៀប​ចំ​ដែន​ដី។គម្រោងបែកចែកដីសង្គមកិច្ច និងការអភិវឌ្ឍន៍សេដ្ឋកិច្ចចាប់អនុវត្តពីឆ្នាំ២០០៨ មកទល់ពេលនេះ។ ជាលទ្ធ​ផល បែងចែកផ្ទៃដីបានចំនួន ១៤,១២៧ហិកតា នៅក្នុងឃុំចំនួន១៣ ស្មើនឹង១៥ទីតាំង នៅក្នុងខេត្តទាំង៦ គឺ ក្រចេះ កំពង់​ចាម កំពង់ធំ កំពង់ឆ្នាំង កំពង់ស្ពឺ និងបាត់ដំបង ដែលត្រូវចែកជូនប្រជាពលរដ្ឋចំនួន៤.៦៩៧គ្រួសារ ស្មើនឹង​មនុស្ស​​​ចំនួន២១.១២៧ និងបានទីតាំងសម្បទានដីសង្គមកិច្ចរួមមានសាលារៀន១០ខ្នង ប៉ុស្ដិ៍សុខភាព ៤ខ្នង់ ស្រះទឹក​៥៤​​ស្រះ អណ្ដូងស្នប់១៥២ អណ្ដូងចំហរ ៣២១ ផ្លូវលំសរុបចំនួនប្រវែង៥៦៩,៤៥គម មណ្ឌលសហគមន៍ចំនួន២ខ្នង រោង​​ប្រជុំ​សហគមន៍ចំនួន៧ខ្នង ទំនប់ទឹក១ ធ្វើលូបង្ហូរទឹកស្អុយប្រវែង៣៣៨ ម៉ែត្រ។

លោក ទេសរដ្ឋ​មន្ត្រី អ៊ឹម ឈុន​លឹម រដ្ឋមន្ត្រីក្រសួងរៀបចំដែនដី នគររូបនីយកម្មនិងសំណង់ និងជាប្រធាន គណៈ កម្មា​ធិការ​សម្បទានដីសង្គម​កិច្ច​ថ្នាក់​ជាតិបានមានប្រសាសន៍ប្រាប់អ្នកចូលរួមក្នុងសិក្ខាសាលានៅថ្ងៃនេះថា សិក្ខា​រយៈ​​ពេលពីរ​ថ្ងៃនេះ​ត្រូវពិនិត្យ​​ពិភាក្សា​​​ផ្លាស់ប្ដូរគ្នាអោយបានល្អិតល្អន់ ដោយស្មារតីទទួលខុសត្រូវ ដើម្បីរក​អោយ​ឃើញ​នូវគំនិតល្អៗ ទាក់ទង​​និង​ប្រធាន​​​​បទនៃ សិក្ខាសាលានេះរួមទាំងបច្ចេកទេសដាំដុះ ការគ្រប់​គ្រង​អាជីវ​កម្ម​ដាំ​ដុះ ការចិញ្ចឹមសត្វ បញ្ហា​ឧបករណ៍​​​​​​​សម្ភារ កសិកម្ម បញ្ហាទីផ្សារសម្រាប់ កសិផលដែលផលិតបាន បញ្ហាទុនគ្រប់​គ្រាន់ ដើម្បីធ្វើប្រពលវប្បកម្ម ការពង្រឹងសុវត្ថិភាព ស្បៀងនិងពង្រឹងសហគមន៍ រួមនិងការកសាង ផែនការអភិវឌ្ឍន៍​ថ្នាក់ជាតិ ឃុំ និងស្រុកអំពី តួនាទី​​​របស់តួអង្គ ទាំងអស់ដែល ពាក់ព័ន្ធរួមមាន រដ្ឋ ប្រជាពលរដ្ឋ សហគមន៍ វិស័យ​ឯក​ជន អង្គការ​មិនមែន​រដ្ឋា​ភិបាល​​​និងដៃគូរអភិវឌ្ឍន៍ជាដើម។

លោកបណ្ឌិត Franz Volker Muellerអ្នកគ្រប់គ្រងកម្មវិធីរបស់អង្គការ​GIZដែលចូល​រួម​​ធ្វើ​កិច្ចការនេះដោយផ្ទាល់​បាន​មាន​ប្រសាសន៍ថា សិក្ខាសាលាថ្ងៃនេះគឺជាកិច្ចពិភាក្សារកវិធីសាស្ត្រ និង យុទ្ធ​សាស្ត្រ​​​ក្នុងការគាំទ្រ ជីវភាពរស់នៅ​របស់ គ្រួសារទទួលដីប្រកបដោយនិរន្តរភាព និងរៀបចំផែនការសកម្មភាព រយៈពេល​​​​ខ្លីមធ្យម និងរយៈពេលវែង។គួរបញ្ជាក់ថា គម្រោងបែកចែកដីសង្គមកិច្ច និងការអភិវឌ្ឍន៍សេដ្ឋកិច្ចនេះ អនុវត្តន៍​រួមគ្នារវាងរដ្ឋាភិបាល និងអង្គ​ការ​ក្រៅ​រដ្ឋាភិបាល ដៃគូអភិវឌ្ឍន៍ថ្នាក់ជាតិ និងថ្នាក់ក្រោមជាតិ៕ ដោយ៖​ រតនា