ភ្នំពេញ៖ ប្រទេសកម្ពុជាបានចាប់ផ្តើមបើក ដាក់ឲ្យដំណើរការជាផ្លូវការនូវស្ថានីយថាមពលដើរដោយធ្យូងថ្មជាលើកដំបូង ដើម្បីបង្កើនការផ្គត់ផ្គង់ដល់កំណើនតម្រូវការផ្នែកថាមពលដែលចេះតែ កើនឡើងជាលំដាប់។ស្ថានីយផលិតអគ្គិសនីដែលជាការវិនិយោគរបស់ក្រុមហ៊ុនមកពីប្រទេសម៉ាឡេស៊ីមួយនេះមានកម្លាំង១០០មេហ្គាវ៉ាត់។បើតាមប្រសាសន៍របស់សម្តេច នាយករដ្ឋមន្ត្រី ហ៊ុន សែន ដែលចូលរួមសម្ពោធស្ថានីយមានទីតាំងនៅក្នុងខេត្តព្រះសីហនុ បានថ្លែងថា ស្ថានីយនេះនឹងចូលរួមចំណែកមួយយ៉ាងសំខាន់ក្នុងការបំពេញបន្ថែមនូវ កង្វះខាតបានមួយចំនួនសម្រាប់ការផ្គត់ផ្គង់អគ្គិសនី នៅក្នុងប្រទេសកម្ពុជា។
សម្តេចតេជោបានបន្តថា ការមានវារីអគ្គិសនីដើរដោយកម្លាំងទឹកតែមួយមុខមិនអាចផ្គត់ផ្គង់ អគ្គិសនីបានគ្រប់គ្រាន់នោះទេ ដែលកត្តានេះទាមទារឲ្យមានការផ្គត់ផ្គង់អគ្គិសនីដើរដោយធ្យូងថ្ម។ លើសពីនេះទៅទៀតវារីអគ្គិសនី អាតៃ ដែលមានអានុភាពផលិតអគ្គិសនី ១២០ មេហ្គាវ៉ាត់ ដែលនឹងបើកដំណើរការនៅខែ មីនា នឹងរួមចំណែកពង្រឹងសមត្ថភាពផ្គត់ផ្គង់អគ្គិសនីបានកាន់តែប្រសើរ។
លោក ស៊ុយ សែម រដ្ឋមន្រ្តីក្រសួង រ៉ែ និងថាមពល បានឲ្យដឹងថា រហូតមកទល់ពេលនេះ កម្ពុជាបានចុះកិច្ចព្រមព្រៀងអភិវឌ្ឍន៍ប្រភពអគ្គិសនីចំនួន ១១ រួចហើយ ដោយមិនបានរាប់បញ្ចូលស្ថានីយអគ្គិសនីដើរដោយប្រេងខ្មៅដែលមានស្រាប់នោះទេ។គួរបញ្ជាក់ដែរថា ក្រុមហ៊ុនLeaderនេះបោះទុនវិនិយោគ ចំនួន ជិត២០០លានដុល្លារសហរដ្ឋអាម៉េរិក ដែលមានរយៈពេល២៥ឆ្នាំ សម្រាប់ប្រតិបត្តិការរបស់ខ្លួន។ ផែនការជាតិរបស់រដ្ឋាភិបាល កម្ពុជា គឺធ្វើយ៉ាងណាឲ្យមានការផ្គត់ផ្គង់ចរន្តអគ្គិសនីឲ្យដល់គ្រប់ឃុំ នៅទូទាំងប្រទេសត្រឹមឆ្នាំ២០១៥៕ ដោយ៖ភីនរ៉ា