ភ្នំពេញ៖ ក្រុមមនុស្សស្រីស្រឡាញ់ស្រី  ប្រុសស្រឡាញ់ប្រុស មនុស្សស្រឡាញ់ភេទទាំងពីរ និងមនុស្សប្ដូរភេទ (LGBT) ​បានប្រកាសពីការទាមទារសិទ្ធិស្របច្បាប់ ពីរាជរដ្ឋាភិបាល និង​ភាគី​ពាក់ព័ន្ធ ដទៃទៀត ដើម្បីទទួលបាន​សិទ្ធិពេញលេញក្នុងការជ្រើសរើសការស្រលាញ់​ដូច​មនុស្សធម្មតា។សកម្មជននៃសហគមន៍ឥន្ធនៈកម្ពុជា របស់​សហគមន៍មនុស្សប្តូរភេទ (LGBT) លោក ណយ ស៊ីថា បានលើកឡើងនៅក្នុងកិច្ចពិភាក្សាថ្នាក់ជាតិ ស្ដីពីការ​ស្រលាញ់​ភេទដូចគ្នា ស្រឡាញ់​ភេទ​ទាំងពីរ និងមនុស្សប្ដូរភេទ (LGBT) នៅព្រឹកថ្ងៃអង្គារ៍ទី២១ ខែមករា ឆ្នាំ២០១៤​នេះ នាសណ្ឋាគារអ៊ីមភើរៀ ហ្គាដិន វីឡាថា សហគមន៍ (LGBT) បានគាំទ្រទៅនឹងការលើកឡើង របស់សម្តេចនា​យក​រដ្ឋមន្ត្រី ហ៊ុន សែន កាលពីពេលកន្លងមក ដែលបានអំពាវនាវកុំ​ឲ្យមាន​ការរើសអើងចំពោះអ្នកស្រឡាញ់​​ភេទ​ដូចគ្នា។ ប៉ុន្តែអ្វីដែលសហគមន៍ ចង់បានបន្ថែមលើស​នេះទៅទៀតនោះ គឺការទាមទារសិទ្ធិស្របច្បាប់ដូច​​មនុស្ស​ធម្មតា ពោលគឺ មិនឲ្យមានការ​រើស​អើង សម្រាប់ក្រុមមនុស្ស (LGBT)នេះតទៅទៀត។

លោក ណយ ស៊ីថា បន្តថា កន្លងមកបញ្ហាប្រឈមរបស់ក្រុមអ្នកស្រឡាញ់ភេទដូចគ្នា មាន​គ្រប់​ទិដ្ឋភាពសង្គម ជាក់​ស្ដែងដូចជា គ្រួសារ កន្លែងធ្វើការ ការទទួលបានសេវាសុខភាព ការអប់រំ និងការរើសអើងវណ្ណៈជាដើម។ ទាំងនេះ​ហើយ ដែលយើងចង់ឲ្យរាជរដ្ឋាភិបាល​គិត​គូរ ព្រោះពួកយើងក៏មានសមត្ថភាព ចំណេះដឹងដូចមនុស្សធម្មតាដែរ គ្រាន់​តែនេះជាចរិត​ធម្មជាតិមួយដែលមិនអាចកែប្រែបានតែប៉ុណ្ណោះ។លោកស្រី Rebecca Black ប្រធានបេសកម្ម USAID ប្រចាំកម្ពុជា បានថ្លែងក្នុងកិច្ចពិភាក្សា នេះថា អាម៉េរិកស្វាគមន៍ ចំពោះការលើកយកបញ្ហានេះ (ក្រុមមនុស្ស​ស្រឡាញ់ភេទដូចគ្នា) មកពិភាក្សា ដើម្បីទាមទារសិទ្ធិជាមូលដ្ឋានរបស់ក្រុមមនុស្សស្រឡាញ់ភេទដូចគ្នា ខណៈ​ដែល​​​​ពួកគេ ត្រូវបានរើសអើងពីមជ្ឈដ្ឋាន ទូទៅ និងមិនទាន់មានសិទ្ធិពេញលេញ។

លោកស្រីបញ្ជាក់ថា ចំពោះបញ្ហានេះ យើងសូមគាំទ្រផងដែរ នូវប្រសាសន៍របស់សម្តេច​នាយករដ្ឋ មន្ត្រី ហ៊ុន សែន ដែលបានអំពាវនាវកាលពីពេលកន្លងទៅ កុំឲ្យមានការរើសអើង ចំពោះក្រុមមនុស្សស្រឡាញ់ភេទដូចគ្នា និង មនុស្ស​ភេទទី៣។ ហើយនេះជាការឆ្លុះបញ្ចាំង របស់ថ្នាក់ដឹកនាំប្រទេសរួចជាស្រេច មិនបានរើសអើង ចំពោះ​​ក្រុម​មនុស្ស​ប្រភេទនេះឡើយ។ចំណែក អ្នកស្រី Marie Dominique Parent អនុតំណាង UN-OHCHR បានឲ្យដឹងដែរថា មាន​ប្រទេសចំនួន១៦ហើយ នៅលើពិភពលោកបាន ប្រកាសទទួលស្គាល់ការរៀបការរវាង​ភេទដូចគ្នា។ ក្នុងនោះ​ប្រទេស​​នៅតំបន់អាស៊ី មានដូច ជាប្រទេសថៃ និងវៀតណាម ក៏កំពុង​តែពិភាក្សាលើការបង្កើតច្បាប់សម្រាប់ ក្រុម​មនុស្ស​ស្រឡាញ់ភេទដូចគ្នានេះដែរ។

លោក អ៊ុក ផល្លី តំណាងអ្នកស្រលាញ់ភេទដូចគ្នា បានលើកពីបញ្ហាប្រឈមជាច្រើននៅ​ក្នុងសង្គម និង គ្រួសារ ដែល​ពួក​គេបានជួបប្រទះ  និងបានស្នើដោយទទូចដល់រដ្ឋាភិបាល​ទាំងអស់ឲ្យចាត់វិធានការដើម្បីលុបបំបាត់ ស្ទិកម៉ា និង​ការ​រើសអើងនានាចំពោះក្រុមមនុស្ស ស្រលាញ់ភេទដូចគ្នា និង អ្នកប្តូរភេទនេះ ហើយក៏ត្រូវបង្កើតផងដែរនូវបរិយា​​កាសសង្គម និងគតិយុត្តិដែលធានាដល់ការគោរពសិទ្ធិមនុស្ស និងផ្តល់លទ្ធភាពឲ្យទទួលបានជាសកល នូវការបង្ការ ការគាំទ្រ កិច្ចគាំពារ  និងការព្យាបាលជំងឺអេដស៍។ចំណែកស្ថាប័នសន្ធិសញ្ញាសិទ្ធិមនុស្ស អ.ស.ប.ដែលមាន​​តួនាទី​តាម​​​ឃ្លាំមើលរដ្ឋភាគីនានា ក្នុងការអនុវត្តកាតព្វកិច្ចរបស់ខ្លួនក្រោមសិទ្ធសញ្ញា សិទ្ធិមនុស្សអន្តរជាតិ បានកំណត់​យ៉ាង​​មុតមាំថា​រដ្ឋភាគីទាំងឡាយមានការតព្វកិច្ចក្រោមបទបញ្ញត្តិនៃសិទ្ធិ​សញ្ញាដែលមានស្រាប់នានា​​ក្នុងការកា​រ​ពារ​ជន​​​ទាំង​​ឡាយនោះ(ក្រុមមនុស្សស្រីស្រឡាញ់ស្រី  ប្រុសស្រឡាញ់ប្រុស មនុស្សស្រ​ឡាញ់​ភេទទាំងពីរ និងមនុស្ស​​ប្ដូរ​​ភេទ LGBT )ពីអំពើហិង្សា និងការរើសអើងដោយ​ឈរលើ​ហេតុផលនៃទំនាក់ទំនងផ្លូវភេទ។

ដូចគ្នានេះដែរ អ្នករាយការណ៍ពិសេស អ្នកជំនាញឯករាជ និងក្រុមការងារនានាដែលត្រូវបាន​តែង​តាំង​ដោយ​ក្រុម​ប្រឹក្សា​សិទ្ធិមនុស្ស អ.ស.ប. បានចេញរបាយការណ៍ និងសេចក្តីអំពាវនាវ ផ្សេងៗដោយគូសបញ្ជាក់ពីភាព​​​ងាយ​រង​គ្រោះ នៃក្រុមអ្នកស្រលាញ់ភេទដូចគ្នា និង LGBT ដោយការរំលោភសិទ្ធិមនុស្ស និងអំពាវនាវឲ្យរដ្ឋនានាលុបចោល​​ឬធ្វើកំណែទម្រង់ច្បាប់ និងគោលនយោបាយទាំងឡាយណាដែលមានលក្ខណៈរើសអើង។បើទោះជាមានការគាំទ្រ​ពីច្បាប់អន្តរជាតិ អង្គការសិទ្ធមនុស្សយ៉ាងនេះក៏ដោយ ក៏នៅមាន​ប្រទេសច្រើនជាង៧០ មានច្បាប់ដែល​បានកំ​ណត់​ថា ការស្រលាញ់ភេទដូចគ្នា ជាបទល្មើស នាំឲ្យមនុស្សរាប់លាននាក់ត្រូវប្រឈមនិងការឃាត់ខ្លួន ការដាក់ពន្ធនា​គារ ហើយនៅក្នុង​ករណីខ្លះអាចឈានដល់ការប្រហារជីវិតទៀតក៏មាន៕

ដោយ៖ ស.ស្អាត