ភ្នំពេញ៖ នាយកដ្ឋានរដ្ឋបាលមូលដ្ឋាននៃក្រសួងមហាផ្ទៃនៅព្រឹកថ្ងៃទី០៧ខែវិច្ឆិកានេះ បានបើកកិច្ចប្រជុំបូកសរុបសមិទ្ធផលការងារប្រចាំឆ្នាំ២០១៣ និងរៀបចំផែនការសកម្មភាពឆ្នាំ២០១៤ ដោយមានការចូលរួមពីមន្ត្រីក្រុមប្រឹក្សាថ្នាក់ឃុំ សង្កាត់គោលដៅចំនួន៣៤៦ ស្រុកចំនួន ៤៨ នៃខេត្តចំនួន ០៧ នៅក្នុងព្រះរាជាណាចក្រកម្ពុជា ។
ពិធីនេះបានប្រព្រឹត្តទៅក្រោមវត្តមានលោក ឌុច សុន អគ្គនាយកដ្ឋានរដ្ឋបាលមូលដ្ឋាន នៃក្រសួងមហាផ្ទៃ និងមានការចូលរួមពីលោក Dr.Derveeuw Mac តំណាងមូលនិធិសហប្រជាជាតិ(UNFPA) ដែលជាអង្គការផ្តល់មូលនិធិគាំទ្រផ្នែកថវិកាដល់កិច្ចអភិវឌ្ឍន៍ ឃុំ សង្កាត់គោលដៅនៃខេត្តទាំ៧ ។លោក ឌុច សុន ថ្លែងថា កិច្ចប្រជុំនេះដើម្បីវាយតម្លៃសមិទ្ធផលការងារ ដែលនាយកដ្ឋានរដ្ឋបាលមូលដ្ឋានបានអនុវត្តនិងក្រុមការងារនានា ដែលបាននឹងកំពុងអនុវត្តជាមួយនាយកដ្ឋានក្នុងឆ្នាំ២០១៣ និងផ្តល់ឱកាសដល់មន្ត្រី និងថ្នាក់ដឹកនាំក្នុងនាយកដ្ឋាន សមាជិកក្រុមការងារដែលជាដៃគូរការងាររបស់នាយកដ្ឋាន និងទីប្រឹក្សាដែលកំពុងគាំទ្រនាយកដ្ឋាន បានចូលរួមពិភាក្សាផ្លាស់ប្តូរទស្សនៈ ចែករំលែកបទពិសោធន៍ និងរៀនសូត្រពីគ្នាទៅវិញទៅមកលើកិច្ចការដែលនាយកដ្ឋានបានអនុវត្តក្នុងឆ្នាំ២០១៣ និងរៀបចំផែនការសកម្មភាពការងារសម្រាប់ឆ្នាំ២០១៤បន្ត។លោក ឌុច សុន បានបញ្ជាក់ថា រាជរដ្ឋាភិបាលដំណើរការកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកាន់តែមានលក្ខណៈទូលំទូលាយជាងមុន សំដៅកែសម្រួលរចនាសម្ព័ន្ធ និងប្រព័ន្ធនៅរដ្ឋបាលថ្នាក់ក្រោមជាតិទាំងមូល គឺរដ្ឋបាលនៅថ្នាក់រាជធានី ខេត្តក្រុង ស្រុកខណ្ឌ។ ដូច្នេះធ្វើឲ្យមានការផ្លាស់ប្តូរនូវខ្សែរគណនេយ្យភាព និងប្រព័ន្ធគាំទ្រពីថ្នាក់ជាតិទៅថ្នាក់រដ្ឋបាលក្រោមជាតិនានា និងពីថ្នាក់រដ្ឋបាលនានានៅថ្នាក់ក្រោមជាតិមកថ្នាក់ជាតិ។ ពោលគឺរដ្ឋបាលថ្នាក់ក្រុងស្រុកនិងឃុំសង្កាត់ក្នុងការអនុវត្តការងារ ការកសាងផែនការអភិវឌ្ឍន៍ការរៀបចំកម្មវិធីវិនិយោគការអនុវត្តគម្រោង និង ការផ្តល់សេវាសាធារណៈនៅថ្នាក់មូលដ្ឋាន។គួររំលឹកផងដែរថា ប៉ុន្មានឆ្នាំកន្លងមកនេះ ក្នុងតួនាទីជាស្ថាប័នសេវាគាំទ្របច្ចេកទេសដល់រដ្ឋបាលឃុំ សង្កាត់ នាយកដ្ឋាននេះបានបំពេញបេសកម្មទទួលបានជោគជ័យធំៗជាច្រើន លើកការរៀបចំលិខិតបទដ្ឋានសម្រាប់ឲ្យក្រុមប្រឹក្សាឃុំ សង្កាត់ អនុវត្ត ជំរុញការផ្ទេរធនធានពីថ្នាក់ជាតិដល់រដ្ឋបាលឃុំសង្កាត់បានទាន់ពេលវេលា ។ ការពង្រឹងសមត្ថភាពសមាជិកក្រុមប្រឹក្សា និងអ្នកពាក់ព័ន្ធអំពីរបៀបរបបការងាររបស់ឃុំសង្កាត់ ការរៀបចំផែនការអភិវឌ្ឍន៍ និងកម្មវិធីវិនិយោគឃុំសង្កាត់ ការរៀបចំគម្រោងថវិកា ការអនុវត្តគម្រោងមូលនិធិឃុំសង្កាត់ ការផ្សព្វផ្សាយអប់រំដល់សាធារណជនឲ្យយល់និងចូលរួមក្នុងការអនុវត្តនយោបាយវិមជ្ឈការនៅឃុំសង្កាត់ ការចូលរួមសម្របសម្រួលជាមួយដៃគូនានាក្នុងការកៀរគរធនធានសម្រាប់សាងសង់អគាររដ្ឋបាលឃុំសង្កាត់និងសម្ព័ន្ធភាពជាតិសមាគមក្រុមប្រឹក្សាឃុំសង្កាត់ គ្រប់គ្រងនិងធ្វើបច្ចុប្បន្នភាពទិន្នន័យនៃការផ្លាស់ប្តូរសមាជិកក្រុមប្រឹក្សាឃុំសង្កាត់ សហការនិងចែករំលែកព័ត៌មានជាមួយសង្គមស៊ីវិល និងសហការជាមួយអង្គភាពប្រឆាំងអំពើពុករលួយក្នុងការជំរុញឲ្យសមាជិកក្រុមប្រឹក្សាឃុំសង្កាត់ប្រកាសទ្រព្យសម្បត្តិ និងបំណុលស្របតាមច្បាប់។
សូមបញ្ជាក់ថា ឆ្នាំកន្លងទៅនេះមូលនិធិសហប្រជាជាតិសម្រាប់ប្រជាជន UNFPA និងក្រសួងមហាផ្ទៃបានចុះហត្ថលេខាលើកិច្ចព្រមព្រៀងមួយ ស្តីពីការឧបត្ថម្ភគាំទ្រថវិកាដល់ឃុំសង្កាត់គោលដៅចំនួន៣៤៦ឃុំ សង្កាត់ ស្រុកចំនួន ៤៨ នៃខេត្តទាំង០៧ សម្រាប់អនុវត្តការលើកកម្ពស់ការងារសេវាសង្គម និងការអភិវឌ្ឍសុខភាពបន្តពូជនិងយេនឌ័រ ។ ខេត្តទាំងនោះរួមមាន ខេត្តស្ទឹងត្រែងមានចំនួន៥ស្រុក៣៤ឃុំសង្កាត់ ខេត្តបន្ទាយមានជ័យមាន៧ស្រុក ៤៥ឃុំសង្កាត់ ខេត្តសៀមរាបមាន ៦ស្រុក ៤៥ឃុំសង្កាត់ ខេត្តព្រះវិហារមាន៨ស្រុក ៥១ឃុំសង្កាត់ ខេត្តកំពង់ចាមមាន៥ស្រុក ៥២ឃុំសង្កាត់ ខេត្តរតនគីរីមាន៩ស្រុក ៥០ឃុំសង្កាត់ និងខេត្តកំពង់ឆ្នាំងមាន៨ស្រុក ៦៩ឃុំសង្កាត់៕
ដោយ៖ ស.ស្អាត