ភ្នំពេញ: នៅឆ្នាំ២០១៤នេះ មជ្ឈមណ្ឌលជាតិផ្តល់ឈាមត្រូវការអំណោមឈាមស្មគ្រ័ចិត្តរហូតដល់ជាង៦ម៉ឺន ប្លោក ពីសប្បុរសជននានា ដើម្បីបំពេញសេចក្តីត្រូវការជួយសង្គ្រោះអាយុជីវិតអ្នកជំងឺនៅទូទាំងប្រទេស។ នេះជាលើកឡើង ពីប្រធានមជ្ឈមណ្ឌលជាតិផ្តល់ឈាម នៅក្នុងសិក្ខាសាលាកាលពីព្រឹកថ្ងៃទី២៧ មករា ឆ្នាំ២០១៤ ស្តីពីតម្រូវការឈាម សម្រាប់សង្គ្រោះអ្នកជម្ងឺនៅសណ្ឋគាររ៉ូយ៉ាល់ភ្នំពេញ។
.jpg)
លោក ហុក គឹមចេង ប្រធានមជ្ឈមណ្ឌលជាតិផ្តល់ឈាមមានប្រសាសន៍ថា ដោយសារតម្រូវការឈាមសម្រាប់ជួយព្យាបាលអ្នកជំងឺនៅទូទាំងប្រទេសកាន់តែកើនឡើងនោះនៅឆ្នាំ២០១៤នេះ មជ្ឈមណ្ឌលជាតិផ្តល់ឈាមនឹងប្រមូលឈាម ពីអ្នកបរិច្ចាគឲ្យបានជាង៦ម៉ឺនប្លោក ដើម្បីឆ្លើយតបឲ្យត្រូវនឹងសេចក្តីត្រូវការ។
លោកប្រធានមជ្ឈមណ្ឌលបញ្ជាក់ថា ចំនួនដែលបានគ្រោងទុកនេះ គឺកើនឡើងជាងឆ្នាំមុនចំនួន១ម៉ឺនប្លោកតែទោះជាយ៉ាងនេះក្តី កម្ពុជានៅមិនទាន់ខ្វះខាតឈាមនៅឡើយទេ ប៉ុន្តែជាការស្វែងរកអ្នកបរិចាគឈាមស្មគ្រ័ចិត្តឲ្យបានកាន់តែច្រើន ដើម្បីស្តុកទុកសម្រាប់ធ្វើការបែងចែកទៅតាមមន្ទីរពេទ្យទាំងអស់នៅទូទាំងប្រទេស សម្រាប់ជួយសង្គ្រោះ និងព្យាបាលអ្នកជំងឺដែលត្រូវការឈាម។ លោកបន្តថា ដើម្បីឲ្យសម្រេចបានតាមផែនការដែលបានគ្រោងទុកនេះ ក្រុមយុវជនគឺជាគោលដៅ ដ៏សំខាន់បំផុតក្នុងការជំរុញលើកទឹកចិត្តផ្តល់អំណោយឈាមឲ្យបានច្រើន នឹងច្រើនដង ព្រោះវាពុំបានធ្វើឲ្យប៉ពាល់ដល់សុខភាព និងអាយុជីវិតអ្នកបរិចាគឡើយ។
លោកបន្ថែមទៀតថា យន្តការនេះ គឺអនុវត្តដោយការផ្តល់អំណោមឈាមដោយស្មគ្រ័ចិត្ត១០០ភាគរយ និងមិនយកកម្រៃ ពិសេស កាត់បន្ថយឲ្យបានការប្រើរូបភាពដោះដូរអំណោយឈាម ឬការទិញដូរជាដើម ដែលនេះគឺជាសកម្មភាពមនុស្សធម៌ដ៏មានតម្លៃមិនអាចកាត់ថ្លៃបានសម្រាប់ជាប្រយោជន៍យ៉ាងសំខាន់ដើម្បីជួយសង្គ្រោះអាយុជីវិតអ្នកជំងឺ ដែលកំពុងត្រូវការជាចាំបាច់។ លោក ហុក គឹមចេង បានអៈអាងថា រហូតមកដល់ពេលនេះ បងប្អូនប្រជាពលរដ្ឋកម្ពុជាកាន់តែយល់ដឹងច្រើន អំពីអត្ថប្រយោជន៍ នៃការផ្តល់អំណោយឈាមដោយស្មគ្រ័ចិត្ត ដែលចំនួនអ្នកផ្តល់អំណោយឈាម បានកើនឡើងជារៀងរាល់ឆ្នាំ។
លោក Yasushi Miyazaki អ្នកជំនាញការមកពីប្រទេសជប៉ុន បានឲ្យដឹងថា ដើម្បីទទួលបាន អំណោយឈាមដោយស្មគ្រ័ចិត្ត ចេញពីស្រទាប់ក្រុមយុវជន ពិសេស និស្សិតដែលកំពុងសិក្សានៅតាមបណ្តាសាកលវិទ្យាល័យ គ្រឹៈឧត្តមសិក្សា ឲ្យបានកាន់តែច្រើននោះ ត្រូវបំផុសចលនាជនបង្គោល ដើម្បីអប់រំផ្សព្វផ្សាយ និងលើកទឹកចិត្តដល់ពួកគេ ផ្លាស់ប្តូរឥរិបទទំលាប់ចាស់ពីការភ័យខ្លាច ឲ្យងាកមកជាការផ្តល់អំណោយឈាម ដោយស្មគ័្រចិត្តវិញម្តង។
លោកបញ្ជាក់ថា នេះជាមធ្យោបាយមួយដ៏ល្អបំផុត ដែលបានអនុវត្តនៅប្រទេសជប៉ុនទទួលបានជោគជ័យ ហើយក្រុមអ្នកទាំងនោះបានធ្វើអំណោមឈាមបានច្រើនដងទៀតផង។គួររំលឹកថា កាលពីឆ្នាំ២០១៣ មជ្ឈមមណ្ឌលជាតិផ្តល់ឈាម បានទទួលអំណោយឈាមពីសប្បុរសជនចំនួន៥០.៣៥៣ប្លោក ហើយបានចែកចាយទៅកាន់មន្ទីរពេទ្យនានានៅទូទាំងប្រទេសវិញមានចំនួន ៤០.៥២៧ប៉ោក៕ ដោយ៖ ភីន រ៉ា