ភ្នំពេញ៖ ដោយយោងទៅលើកំណើនភ្ញៀវទេសចរណ៍អន្តរជាតិ ពីមួយឆ្នាំទៅមួយឆ្នាំ ក្រសួងទេសចរណ៍កម្ពុជា បាន​​រំពឹងទុកថា នៅឆ្នាំ២០២០ ព្រះរាជាណាចក្រកម្ពុជានឹងទទួល​បានភ្ញៀវទេសចរណ៍អន្តរជាតិ​ប្រមាណ៧​លាន​នាក់មកទស្សនា នឹងនាំចំណូលទេសចរណ៍​ប្រមាណ៥០០០លានដុល្លារចាក់ចូលក្នុងចរន្តសេដ្ឋកិច្ចកម្ពុជា។

លោក ថោង ខុន រដ្ឋមន្រ្តីក្រសួងទសចរណ៍ បានថ្លែងយ៉ាងដូច្នេះនៅក្នុងកម្មវិធីប្រកាសផ្សព្វ​ផ្សាយ​ជាផ្លូវការនូវកា​រ​រៀប​​ចំពិធីបុណ្យសមុទ្រ ដែលនឹងប្រព្រឹត្តទៅរយៈពេល៣​ថ្ងៃចាប់ពី​ថ្ងៃទី៦-៨ខែធ្នូឆ្នាំ២០១៣នៅខេត្តកែប កាលពី​ល្ងាច​​​ថ្ងៃទី៧​ខែវិច្ឆិកានាសណ្ឋាគារណាហ្កាវើល ដោយមានការចូលរួមពីដៃគូរ​វិស័យ​ឯកជន សិល្បៈករ សិល្បៈការិនី និងស្ថាបប័នពាក់ព័ន្ធ​ជាច្រើនរូប។

លោករដ្ឋមន្រ្តីថោង ខុន បានមានប្រសាសន៍ថា ប៉ុន្មានឆ្នាំចុងក្រោយនេះ កម្ពុជាទទួលបាន​កំណើនភ្ញៀវទេសចរណ៍​មួយយ៉ាងល្អ ពី១៧ទៅ២០ភាគរយ ជាក់ស្តែងនៅឆ្នាំ២០១២កម្ពុជា ទទួលបានទេសចរណ៍អន្តរជាតិ ៣,៥លាននាក់ ក្នុងកំណើន២៤.៥ភាគរយធៀបនឹងឆ្នាំ២០១១ ហើយសម្រាប់រយៈពេល៩ខែដើមឆ្នាំ២០១៣នេះ កម្ពុជាទទួលបាន​ទេសចរណ៍​អន្តរជាតិ ជាង៣លាន៥ម៉ឺននាក់ ក្នុងកំណើន១៩ភាគរយ ធៀបទៅនឹងរយ់ពេលដូចគ្នាឆ្នាំ២០១២។

លោករដ្ឋមន្រ្តីបន្តថា សម្រាប់ឆ្នាំ២០១២ទាំងមូលយើងរំពឹងថានឹងទទួលបានទេសចរណ៍​អន្តរជាតិប្រមាណ​៤-៤,២​លាន​នាក់ ហើយនៅឆ្នាំ២០២០យើងរំពឹងថានឹងទទួលបានទេស​ចរណ៍អន្តរជាតិប្រមាណ៧​លាននាក់មកទស្សនា​កម្ពុជា ក្នុងនោះ៥០ភាគរយគឺនឹងទៅទស្សនា ប្រាសាទអង្គរវត្តខេត្តសៀមរាប ​។

លោក ​ថោង ខុន បានបញ្ជាក់ថា បន្ទាប់ពីការរៀបចំពិធីបុណ្យសមុទ្រ លើកទី២នៅខេត្តកែប ឆ្នាំ២០១៣នេះ វិស័យ​ទេសចរណ៍​នៃព្រះរាជាណាចក្រកម្ពុជាជាពិសេសទេសចរណ៍នៅតាម​តំបន់ឆ្នេរនឹងមានសំទុះរីកចំរើន​កាន់តែខ្លាំងក្លា​ថែមទៀត ឆ្លើយតបនឹងគោលនយោបាយ​អភិវឌ្ឍន៍ដាក់ចេញក្នុងអាណត្តិទី៥របស់រាជរដ្ឋាភិបាល​ដែលដឹកនាំដោយ​សម្តេចតេជោ ហ៊ុន សែន នាយករដ្ឋមន្រ្តី ។

ក្នុងឱកាសបើកនោះដែរ លោករដ្ឋមន្រ្តីបានឲ្យដឹងទៀតថា ដោយសារកំណើនទេសចរណ៍ដ៏ ខ្លាំងក្លានេះ ​រាជ​រដ្ឋា​ភិ​បាល​បាន​គូស​វាសទុកជាមុនថា នៅឆ្នាំ២០២០ភ្ញៀសទេសចរណ៍​នឹង​សំរុកទៅទស្សនាអង្គរវត្ត យ៉ាងតិច៨លាននាក់ រួមទាំងអ្នកទេសចរណ៍ក្នុងស្រុកផង ។ ដូច្នេះ លើសពីឆ្នាំ២០២០អាកាសយានដ្ឋានរបស់យើងនេះ នឹងមិនអាចដាក់​បាន​ទៀតនោះទេ គឺ​នៅ​ឆ្នាំ​២០២៣នឹងត្រូវមានតារាងយន្តហោះ២ថ្មី ទាំងនៅខេត្តសៀមរាប និង ​ភ្នំពេញ។ ដោយ​ឡែក​សំរាប់តារាងយន្តហោះថ្មីរបស់ភ្នំពេញ គឺសម្តេចតេជោបានតំណត់យកដី១០០០​ហិកតា នៅខេត្ត​កំពង់ឆ្នាំង​ដើម្បី​ធ្វើ ដែលគ្រោងនឹងចាប់ផ្តើមស្ថាបនាក្នុងអំឡុងឆ្នាំ២០១៧ឬ​២០១៨​ខាងមុខនេះតទៅ។

សូមបញ្ជាក់ថា កម្ពុជាបានកំណត់យកខេត្ត៤នៃតំបន់ឆ្នេរសមុទ្រមាន ខេត្តកែប កំពត ព្រះសីហនុ និងខេត្តកោះកុង ជា​គោលដៅទេសចរណ៍តំបន់ឆ្នេរ​ ដែលនឹងត្រូវបានគេទទួល​ស្គាល់កាន់តែច្បាស់ថាជាគោលដៅ​ទេសចរណ៍តំបន់​ឆ្នេរលំដាប់ពិភពលោកមួយក្នុងតំបន់ សមស្របជាសមាជិកក្លិបឆ្នេរសមុទ្រដែលស្អាតជាងគេនៅលើពិភពលោក៕ ដោយ ៖ សស្អាត