ភ្នំពេញ៖ កម្លាំងសមត្ថកិច្ចចម្រុះ នៅវេលាម៉ោង ១១ និង ៣០នាទី ព្រឹកថ្ងៃទី០៤ មករានេះ បានចុះធ្វើការរុះរើរៀបចំ សណ្តាប់​ធ្នាប់សាធារណៈនិងបោសសំអាតនៅទីលាន​ប្រជាធិ​បតេយ្យ​​​ ហើយក៏ចាប់ផ្ដើម​បំបែកក្រុម​បាតុករនៅ​ទីលាន​​ប្រជាធិបតេយ្យ ។ នៅវេលាម៉ោង ១១ និង៤០នាទី ក្រុមបាតុករជាច្រើននាក់ បាននាំគ្នាចាកចេញពីទី​លាន​ប្រជាធិប​​តេយ្យ ។

ជាមួយគ្នានេះ កម្លាំងសមត្ថកិច្ចត្រូវបានបញ្ជូនជាបន្ដបន្ទាប់ទៅកាន់ទីលានប្រជាធិបតេយ្យ ដើម្បី​​​រុះរើរោងស្នាក់នៅ​របស់ក្រុមបាតុករ ។ ដោយកម្លាំងសមត្ថកិច្ចហ៊ុំព័ទ្ធពីផ្លូវភ្លោះ​សហព័ន្ធ​រុស្ស៊ី ដោយមិនអនុញ្ញាតឲ្យមានការឆ្លងកាត់ និងបានពង្រាយកម្លាំងនៅលើទីលានប្រជាធិប​តេយ្យក្នុងបំណងការពារមិនឲ្យក្រុមបាតុករចូលទៅកាន់ទីនេះជាថ្មី រហូតមានការវិលត្រឡប់​ទៅ​រកភាព​ប្រក្រតីឡើងវិញ ។​ដោយឡែកនៅពេលបន្ទាប់​នោះក្រុមសណ្តាប់​ធ្នាប់រាជធានី​ភ្នំពេញបានចាប់ផ្តើមលាងសំអាតនិងរៀបចំទី​លាន​ប្រជា​​ធិបតេយ្យឲ្យមានសណ្តាប់ធ្នាប់ និងអនាម័យឡើងវិញ ដើម្បី​ភ្ញៀវជាតិ និងអន្តរជាតិបានទស្សនានិងដើរ​កំ​សាន្តផង ។

យ៉ាងណាក៏ដោយប្រតិបត្តិការផ្លេកបន្ទោររបស់អាជ្ញាធររាជធានីភ្នំពេញ បានបញ្ចប់ហើយ ក្រោយ​​​ពេលចូលកាន់​កាប់​​ទាំង​ស្រុងទីលានប្រជាធិបតេយ្យ ដោយប្រើពេលវេលាត្រឹមតែ ជាង១៥នាទី។មកដល់ម៉ោង​នេះនៅ​លើទី​លាន​ប្រជាធិបតេយ្យគ្មានកម្លាំងបាតុករទៀតទេ គឺ គ្រប់គ្រងដោយ​កម្លាំងអាជ្ញាធរទាំង​ស្រុង។ប្រភពព័ត៌មាន​មួយបាន​បង្ហាញ​ថា នៅវេលាម៉ោង ១២ និង១៣នាទី លោក សម រង្ស៊ី និង​លោក កឹម សុខា ចូលទៅកាន់ស្ថានទូត​អាម៉េរិក​ដែលនៅ​ក្បែទីលានប្រជាធិបតេយ្យនោះ ដើម្បីសុំការអន្តរាគម សម្រាប់លទ្ធផលយ៉ាងណា​នោះគេនៅមិន​ទាន់​ដឹង​ច្បាស់នៅឡើយទេ៕​ដោយ៖ សស្អាត