*បាតុកម្មអហឹង្សារនៅទីលានប្រជាធិបតេយ្យថ្ងៃ០៧កញ្ញាខាងមុខនេះមិនមានការដង្ហែលជាក្បួនទេ!
ភ្នំពេញ៖អាជ្ញាធររាជធានីដឹកនាំដោយលោក ឃួង ស្រេង អភិបាលរងរាជធានីភ្នំពេញកាលពីល្ងាចថ្ងៃទី០៣កញ្ញា២០១៣ បានបើកកិច្ចប្រជុំពិភាក្សាមួយជាមួយគណបក្សសង្គ្រោះជាតិដើម្បីស្វែងរកចំណុចវិជ្ជមានមួយក្នុងការរួមគ្នាលើការររក្សា អោយបានសន្តិសុខ សុវត្ថិភាពក្នុងការធ្វើបាតុកម្មអហឹង្សារនៅទីលានប្រជាធិបតេយ្យថ្ងៃ០៧កញ្ញាខាងមុខ ហើយការធ្វើបាតុកម្មអហឹង្សារនោះ តាមការស្នើរសុំរបស់បក្សសង្គ្រោះជាតិមានការចូលពីអ្នកគាំទ្រចំនួន២ម៉ឺននាក់ តែការធ្វើបាតុកម្មនេះបានសំរេចគ្នាថា មិនមានការដង្ហែលជាក្បួននោះទេ គឺធ្វើឡើងនៅតែក្នុងទីលាននេះតែម្តង ក្រោមការការពារសន្តិសុខ សុវត្ថិភាពពីសមត្ថកិច្ចយ៉ាងតឹងរឹងបំផុត។
ក្នុងកិច្ចប្រជុំនេះវត្តមានមកពីគណបក្សសង្គ្រោះជាតិមាន៣រូប ក្នុងនោះរួមមានលោកហូរ វ៉ាន់ លោកម៉ៅ ម៉ូលីវណ្ណ និងលោកម៉ន ផល្លា ។ ចំណែកខាងអាជ្ញាធរាជធានីមាន លោក ឃួង ស្រេង អភិបាលរងរាជធានីភ្នំពេញ លោកឧត្តមសេនីយ៍ជួន សុវណ្ណ ស្នងការនគរបាលរាជធានី មេដឹកនាំកងរាជអាវុធហត្ថរាជធានីភ្នំពេញនិងកងកម្លាំងពាក់ពន្ធ័មួយចំនួន។
ក្នុងកិច្ចប្រជុំពិភាក្សានោះក៏បានប្រឈមនិងការតឹងសសៃកដាក់គ្នាមួយប្រាវផងដែរ ដែលភាពតឹងសសៃកដាក់គ្នានោះ ផ្តើមចេញពីមន្ត្រីរបស់បក្សប្រឆាំងលើកឡើងខុសពីអ្វីដែលត្រូវលើកយកមកពិភាក្សាក្នុងកិច្ចប្រជុំនេះ។ ប៉ុន្តែបានសម្របសម្រួលគ្នាល្អឡើងវិញ ដោយធ្វើយ៉ាងណាអោយមហាបាតុកម្មនេះទទួលបានជោគជ័យនិងគ្មានហានិភ័យអ្វីកើតឡើយ។
ក្រោយកិច្ចប្រជុំប្រមាណជាង៣ម៉ោងជាលទ្ធផល គឺបានសំរេចអោយមានការធ្វើបាតុកម្មអហឹង្សារនៅក្នុងទីលានប្រជាធិបតេយ្យ ចាប់ផ្តើមពីម៉ោ៧ព្រឹកដល់ម៉ោង១២ថ្ងៃត្រង់ថ្ងៃទី៧កញ្ញា ហើយច្រកចេញចូលមួយចំនួនត្រូវបានបិទ ដោយទុកតែច្រកចំនួន៣ប៉ុណ្ណោះសំរេចចេញចូលទៅក្នុងទីលានប្រជាធិបតេយ្យ។ ការសំរេចបែបនេះគឺដើម្បីរក្សាអោយបាននូវសន្តិសុខ សុវត្ថិភាព សណ្តាប់ធ្នាប់ល្អនៅក្នុងពិធីនោះ។
លោក ហូរ វ៉ាន់ បានជម្រាបជូនអង្គប្រជុំពីគោលបំណងនៃការធ្វើបាតុកម្មនេះថា៖ ជាមហាបាតុកម្មអហិង្សា ដោយស្មឹងស្មាត សុំសន្ដិភាព ដែលគណបក្សសង្គ្រោះជាតិអះអាងថា ធ្វើឡើងដើម្បីទាម ទារឲ្យបង្កើតគណៈកម្មការពិសេសឯករាជ្យ ដើម្បីស៊ើបអង្កេតរកការពិត និងយុត្តិធម៌នៃលទ្ធផលបោះឆ្នោត។ អង្គប្រជុំបានសម្រេចមហាបាតុកម្មនឹងចាប់ផ្ដើមនៅម៉ោង៧ព្រឹក ហើយបញ្ចប់ទៅវិញយ៉ាងយូរនៅម៉ោង១២ថ្ងៃត្រង់ និងគ្មានការដង្ហែក្បួនចល័ត ក្រោយការធ្វើបាតុកម្មនោះទេ ។ តំណាងស្របច្បាប់របស់គណបក្សសង្គ្រោះជាតិចំនួន៣នាក់ គឺលោកហូរ វ៉ាន់, លោកម៉ៅ មុនីវណ្ណ, និងលោកគួយ ប៊ុនរឿន ដែលបានចុះហត្ថលេខាលើសំណើសុំធ្វើបាតុកម្ម ត្រូវទទួលខុសត្រូវទាំងស្រុងចំពោះការរៀបចំមហា បាតុកម្មនេះ។ ចំពោះរបៀប វិរៈឡើងផ្លែងរបស់ប្រធានគណបក្សសង្គ្រោះជាតិ ទៅកាន់អ្នក ចូលរួមគំាទ្រគឺ មានចំនួន១៧ចំណុច ដែលអ្នកជំនាញតំណាងគណបក្សបាន បង្ហោះតាម ហ្វឹបសាយនិងហ្វឹះប៊ុកទៅជាមុនរួចហើយ។
លោក ជួន សុវណ្ណ ស្នងការនគរបាលរាជធានីភ្នំពេញដែលទទួលខុសត្រូវ ផ្នែកសន្ដិសុខ នោះទំាងស្រុងបានបញ្ជាក់ថា៖ គណបក្សសង្គ្រោះជាតិ ត្រូវធានាកិច្ចការពារសន្តិសុខសុវ ត្ថិភាពផ្ទៃក្នុងមហាបាតុកម្មឲ្យ បានល្អ ពិសេសគឺការសម្រួលចរាចរណ៍ជូនប្រជាពលរដ្ឋ។ ដោយចំពោះ កិច្ចការពារសន្តិសុខ សុវត្ថិភាពនៅខាងក្រៅ ជាការទទួលខុសត្រូវរបស់សមត្ថកិច្ច និង អាជ្ញាធររាជធានី។ ជាងនេះទៅទៀត ដើម្បីងាយស្រួលក្នុងការដោះស្រាយនូវបញ្ហាបន្ទាន់ផ្សេងៗ គណបក្សសង្គ្រោះជាតិត្រូវរៀបចំក្រុមការងារដើម្បីទាក់ទងជាមួយ សមត្ថកិច្ច។ ដោយឡែក ចំពោះចំនួនអ្នកចូលរួមដែលគណបក្សសង្គ្រោះជាតិស្នើសុំឲ្យ បាន២ម៉ឺននាក់ សាលារាជធានីភ្នំពេញមិនអាចសម្រេចបានទេ គឺត្រូវស្នើសុំទៅក្រសួងមហាផ្ទៃជាមុនសិន។
លោកសម រង្ស៊ី ប្រធានគណបក្សសង្គ្រោះជាតិ បានប្រកាសពីទម្រង់មហាបាតុកម្មអហិង្សា និងសន្តិវិធីថា៖ ជាពិធីស្មឹងស្មាធ បួងសួង ដើម្បីសន្តិភាព ទាំងផ្លូវកាយនិងផ្លូវចិត្ត។ជាពិធីស្មឹងស្មាធ បួងសួងក៏ពិតមែន តែលោកកឹម សុខាអនុប្រធានគណបក្សសង្គ្រោះជាតិ បានបញ្ជាក់ថា វានៅតែជាមហាបាតុកម្ម។គ្រាន់តែមហាបាតុកម្មនេះធ្វើឡើងក្នុងរូបភាពអហិង្សា ដោយសន្តិវិធី ដែលនឹងប្រព្រឹត្តទៅនៅថ្ងៃទី៧ ខែកញ្ញាខាងមុខ។ ប្រមុខបក្សប្រ ឆាំងបានបញ្ជាក់ថា សកម្មជនគណបក្សសង្គ្រោះជាតិនឹង កាន់តែធូប ទៀន និងផ្កាប៉ុណ្ណោះ នៅក្នុងមហាបាតុកម្មនេះ៕
ដោយ ៖ សស្អាត