ភ្នំពេញ៖ ប្រទេសកម្ពុជា បានទទួលជំនួយ និងកម្ចីអភិវឌ្ឍន៍ពីរបរទេស មានចំនួនសរុបប្រមាណ ១,៥ពាន់លានដុល្លារ ដែលរួមមានជំនួយសុទ្ធតាមកម្មវិធីប្រចាំប្រទេស ឬជំនួយ (CPA) មានចំនួន ៩២៦លានដុល្លាអាមេរិក ស្មើនឹង៦២%។ រីឯជំនួយសរុបក្នុងឆ្នាំ២០១២នោះ មានចំនួនប្រមាណជាងពាក់កណ្តាលនៃថវិកាជាតិសរុបក្នុងឆ្នាំ២០១២ ដែលស្មើនឹង ២,៧ ពាន់លានដុល្លា ដើម្បីធានាឱ្យមានការប្រើប្រាស់ជំនួយ និងកម្ចីទាំងនេះប្រព្រឹត្តទៅប្រកបដោយតម្លាភាព និងប្រសិទ្ធិ។
.JPG)
នាយកប្រតិបត្ដិរងនៃវេទិកាអង្គការមិនមែនរដ្ឋាភិបាលស្ដីពីកម្ពុជា លោក តឹក វណ្ណារ៉ា បានមានថ្លែងអះអាងនៅថ្ងៃទី ៥ វិច្ឆិកា នេះក្នុងសិក្ខាសាលាមួយស្តីពី «ប្រព័ន្ធព័ត៌មាន និងប្រសិទ្ធិផលនៃហិរញ្ញប្បទានប្រតិបត្តិការអភិវឌ្ឍន៍នៅកម្ពុជាថា សក្ខិាសាលនេះ បានដោយផ្តោតលើលទ្ធផលនៃការសិក្សាស្រាវជ្រាវកន្លងមកលើប្រព័ន្ធព័ត៌មាន និងប្រសិទ្ធផលនៃជំនួយបរទេសនៅក្នុងប្រទេសកម្ពុជា និងទាក់ទងនឹងកង្វះខាតមួយចំនួននៃលំហូរព័ត៌មាននៃជំនួយដល់សាធារណជន។
លោក តឹក វណ្ណារ៉ា បានបន្ថែមទៀតថា ប្រព័ន្ធព័ត៌មាន និងប្រសិទ្ធិផលនៃហិរញ្ញប្បទាន គឺជាលទ្ធផលនៃការស្រាវជ្រាវ និងការសម្របសម្រួលរបស់វេទិកានៃអង្គការមិនមែនរដ្ឋាភិបាល ស្ដីពីកម្ពុជាក្នុងកិច្ចសហការជាមួយនឹងសមាគមសេដ្ឋកិច្ចកម្ពុជា។ តម្លាភាពនៃព័ត៌មានហិរញ្ញប្បទាន នៅតែជារបៀបវារៈសំខាន់សម្រាប់ការពិភាក្សា ដើម្បីកែលម្អបន្ថែមទៀត។
ស្របពេលជាមួយគ្នានេះផងដែរ ចលនាជាសកលបានគាំទ្រលើដំណើរការនេះ ដោយកថាខណ្ឌទី២៣និងទី២៤ នៃឯកសារភាពជាដៃគូប៊ូសាន (ឆ្នាំ២០១១) បានគាំទ្ររបៀបវារៈ ស្តីពីតម្លាភាព ដោយបញ្ជាក់ថា អត្ថន័យដែលបានចុះក្នុងផែនការសកម្មភាពទីក្រុងអាក្រា នៅតែមានសុពលភាពដែលតម្រូវឲ្យភាគីពាក់ព័ន្ធនឹងជំនួយទាំងអស់ផ្តល់ព័ត៌មានអំពីផែនការចំណាយ និងអនុវត្តគម្រោងទៅដល់ប្រទេសដៃគូត្រឹមឆ្នាំ២០១៣។
.jpg)
លោក វណ្ណារ៉ា បានអះអាងថា ប្រព័ន្ធព័ត៌មានជំនួយ គឺជាប្រព័ន្ធទិន្នន័យ ដែលមាននៅក្នុងក្រុមប្រឹក្សាអភិវឌ្ឍន៍កម្ពុជា ដែលមាននៅក្នុងរាជរដ្ឋាភិបាល ជាពិសេសជំនួយពីបរទេស ដែលនៅក្នុងប្រទេសកម្ពុជាយើងទាំងមូល ការផ្តល់ទាក់ទងទៅនឹងសាធារណជន ដើម្បីឲ្យពួកគាត់យល់ពីជំនួយនៅក្នុងប្រទេសដើម្បីឲ្យពួកគាត់ដឹង និងចូលរួមចំណែកក្នុងការអភិវឌ្ឍន៍គំរោងជំនួយទាំងអស់ ជាពិសេសប្រជាពលរដ្ឋអាចចូលរួមតាមដាន ដែលកំពុងធ្វើការអភិវឌ្ឍន៍ប្រទេសកម្ពុជា។
បើតាមលើកឡើងរបស់លោក វណ្ណារ៉ា បានប្រាប់ឱ្យដឹងទៀតថា ជំនួយបានដើរតួសំខាន់ ក្នុងការងារនីតិសម្បទានិងអភិវឌ្ឍន៍ប្រទេសកម្ពុជា ជាក់ស្ដែងគឺភាពពឹងផ្អែកជាបន្ដលើមូលនិធិជំនួយ ដើម្បីគាំទ្រកម្មវិធីកំណែទម្រង់ និងកម្មវិធីវិនិយោគសាធារណៈនានារបស់រាជរដ្ឋាភិបាលកម្ពុជា។
យ៉ាងនេះក្តីលោកបញ្ជាក់ថា ប្រសិនបើគ្មានយន្តការទេនោះ ស្ថាបន័ត្រួតពិនិត្យ អង្គការសង្គមស៊ីវិលប្រពន្ធ័ផ្សព្វផ្សាយនិងសាធារណជនទូទៅមិនអាចចូលរួមប្រកបដោយប្រសិទ្ធិភាពនៅក្នុងដំណើរការធ្វើសេចក្តីសម្រេចចិត្ត ហើយអ្នកពាក់ពន្ធ័ទាំងនេះក៏មិនអាចទាមទារឲ្យស្ថាបន័នីតិប្រតិបត្តិមានគណនេយ្យភាពចំពោះការប្រើប្រាស់ធនធានសាធារណៈនេះបានឡើយ។
ទាក់ទិនទៅនឹងជំនួយ និងកម្ចីជាទឹកប្រាក់ទាំងនេះដែរ នគរធំមិនអាចសុំការបំភ្លឺបានទេ ពីថ្នាក់ដឹកនាំជំនាញនៃក្រុមប្រឹក្សាអភិវឌ្ឍកម្ពុជា ដោយរវល់ជាប់ប្រជុំក្នុងវេទិកាជាតិលើកទី៣ ស្ដីពីការប្រែប្រួលអាកាសធាតុនៅវិមានសន្តិភាព។ យ៉ាងនេះក្តី តំណាងរាជរដ្ឋាភិបាលបានបង្ហាញពីការគាំទ្រលើរបាយការណ៍នេះរួចហើយ ក្នុងនោះមកពីក្រុមប្រឹក្សាអភិវឌ្ឍកម្ពុជា៖ ក្រសួងផែនការ និងក្រសួងសេដ្ឋកិច្ច និងហិរញ្ញវត្ថុ តាមរយៈផ្តល់ធាតុចូលនានាចាប់តាំងពីពេលចាប់ផ្តើមសិក្សាស្រាវជ្រាវលើប្រធានបទនេះមកម្លេះ។ បន្ទាប់ពីទទួលបានលទ្ធពីការស្រាវជ្រាវនេះ ក្រុមសង្គម ស៊ីវិលដែលមានជំនាញលើវិស័យនេះបានរួមគ្នាបានស្វែងរកដំណោះស្រាយពីភាពចន្លោះប្រហោងនានាដែលបានរកឃើញ ហើយលើកជាអនុសាសន៍ដែលគ្រោងផ្ញើរទៅកាន់់់់់់់់់់់រាជរដ្ឋាភិបាល និងដៃគូអភិវឌ្ឍន៍នាពេលឆាប់ៗនេះ៕ ដោយ៖ មករា