ភ្នំពេញ៖ មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀន បានជម្រុញឲ្យមន្រ្តីថ្នាក់ក្រោមរបស់ខ្លួនជួយបន្តប្រឹងប្រែងយកចិត្តទុកដាក់ក្នុងការដោះស្រាយបញ្ហាគ្រឿងញៀនក្នុងរយៈពេល៣ឆ្នាំខាងមុខ ។ ដោយសារតែ បញ្ហាគ្រឿងញៀននៅប្រទេសកម្ពុជា ក៏ដូចជាលើពិភពលោកក្តី ត្រូវគេមើលឃើញថា នៅតែមានបញ្ហាប្រឈមនៅឡើយ ។
ថ្ងៃទី ៤ ធ្នូ ២០១៣ នេះ អគ្គលេខាធិការដ្ឋានអាជ្ញាធរជាតិប្រយុទ្ធ ប្រឆាំងគ្រឿងញៀន បានបើកកិច្ចប្រជុំផ្សព្វផ្សាយផែនការជាតិ៣ឆ្នាំស្តីពី «ការត្រួតពិនិត្យគ្រឿងញៀន២០១៣ ដល់គ្រាដែលឆ្នាំ២០១៥» ជាឆ្នាំដែលប្រទេសទាំង១០របស់អាស៊ានប្តេជ្ញាឲ្យអាស៊ានគ្មានគ្រឿងញៀន។
ថ្លែងក្នុងកិច្ចប្រជុំនោះ លោក កៅ ខុនដារ៉ា អនុប្រធានអាជ្ញាធរជាតិប្រយុទ្ធ ប្រឆាំងគ្រឿងញៀន បានលើកឡើងជាច្រើនពីចំនុចសំខាន់ៗ៥ចំនុច ដែលពាក់ព័ន្ធនឹងការកាត់បន្ថយតម្រូវការគ្រឿងញៀន ការកាត់បន្ថយការផ្គត់ផ្គង់, ការព្យាបាលនីតិសម្បទា, និងការធ្វើសមាហរណកម្ម ,ការពង្រឹងប្រសិទ្ធភាពអនុវត្តច្បាប់ កិច្ចសហប្រតិបត្តិការអន្តរជាតិ បង្កើតវិធានការយុទ្ធសាស្ត្រ ជាប្រព័ន្ធនិងបណ្តុះសកម្មភាពសម្រាប់ឆ្លើយតបនឹងបញ្ហាគ្រឿងញៀន ការទទួលខុសត្រូវរបស់ក្រសួង ស្ថាប័នពាក់ព័ន្ធ, ធនធានមធ្យោបាយ ថវិកា និងភាពជាម្ចាស់ការជាដើម។
លោក កៅ ខុនដារ៉ា អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា ផែនការនេះ ដើរតួជាត្រីវិស័យ សំរាប់ចង្អុលទិសដៅ ទៅគ្រប់ក្រសួង ស្ថាប័ន សមាជិកអាជ្ញាធរជាតិប្រយុទ្ធប្រឆាំងគ្រឿងញៀន ទាំងថ្នាក់ជាតិ និងថ្នាក់ក្រោមជាតិ ស្ថាប័នពាក់ព័ន្ធ ព្រមទាំងដៃគូអភិវឌ្ឍន៍ជាតិ និងអន្តរជាតិនានា យកទៅអនុវត្តអោយកាន់តែមានប្រសិទ្ធិភាព។
លោកបានអះអាងថា «វានឹងក្លាយជាឯកសារគោលតែមួយគត់សំរាប់ការងារកាត់បន្ថយ និងឈានទៅលុបបំបាត់ទាំងស្រុងនូវការដាំដុះ ការផលិត ការរក្សាទុក ការជួញដូរ ការចែកចាយ និងការប្រើបំពានគ្រឿងញៀននៅកម្ពុជា ព្រមទាំងរួមចំណែកក្នុងការអនុវត្តគោលនយោបាយ យុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល អាណត្តិទី៥ នៃរដ្ឋសភា ឲ្យទទួលបានជោគជ័យ»។
លោកកៅ ខុនដារ៉ា បានអំពាវនាវផងដែរ ចំពោះបណ្តាប្រទេសជាមិត្ត អង្គការសហប្រជាជាតិ អង្គការជាតិ និងអន្តរជាតិ សូមបន្តជួយឧបត្ថម្ភគាំទ្រ ទាំងផ្នែកបច្ចេកទេស និងថវិកាដល់ក្រសួង ស្ថាប័ន អង្គភាព និងអង្គការ ដែលធ្វើការលើវិស័យគ្រឿងញៀនបន្ថែមទៀត ដើម្បីរួមគ្នាអនុវត្តផែនការជាតិ ៣ឆ្នាំ ស្តីពីការត្រួតពិនិត្យគ្រឿងញៀន ២០១៣-២០១៥ នេះ អោយទទួលបានជោគជ័យ និងមានប្រសិទ្ធភាពខ្ពស់ ។
លោកជំទាវ អ៊ីវ ស្រ៊ី អគ្គលេខាធិការរងនៃអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ថា ផែនការជាតិ៣ឆ្នាំ នៃការត្រួតពិនិត្យគ្រឿងញៀននាពេលខាងមុខនេះ ជាឯកសារគោល និងត្រីវិស័យចង្អុលសម្រាប់កាត់បន្ថយនិងឈានទៅលុបបំបាត់ទាំងស្រុងនូវការដាំដុះ ការផលិត ការរក្សាទុក ការជួញដូរ ការចែកចាយ និងការប្រើបំពានគ្រឿងញៀននៅកម្ពុជា ។បញ្ហាប្រឈមគឺក្រោយពីគ្រឿង ញៀនត្រូវកែច្នៃនៅកម្ពុជាគឺយុវជនបានក្លាយជាមុខសញ្ញានៃការ ប្រើប្រាស់ ក្នុងនោះមានអ្នកប៉ះពាល់ប្រមាណពី៥ទៅ៦ពាន់នាក់ ដែលត្រូវការព្យាបាល ។ កន្លងមក អាជ្ញាធរក៏បានជម្រុញឲ្យកម្ពុជាបង្កើតការព្យាបាលតាមមណ្ឌលចំនួន១៣ និងបានទទួលការព្យាបាលប្រមាណ២ពាន់នាក់នោះហើយ ។
កន្លងមកនេះ សមត្ថកិច្ច បានដាក់ ចេញនូវការអប់រំតាមមូលដ្ឋាននិងពង្រឹងការអនុវត្តច្បាប់ ស្របតាមគោលនយោបាយ ភូមិឃុំមានសុវត្ថិភាព។គួររម្លឹកថា ផែនការនេះដែរ មានគោលដៅបន្តអនុវត្តទិសដៅទាំងឡាយដែលមិនទាន់បាន សម្រេចនៅក្នុងពេលអនុវត្តផែនការជាតិ៥ឆ្នាំ២០០៦ដល់២០១០ និងបន្តដោះស្រាយបញ្ហាប្រឈម នានាដូចមានចែងក្នុងផែនការយុទ្ធសាស្ត្រអភិវឌ្ឍន៍ជាតិបច្ចុប្បន្ន កម្ម ព្រមទាំងរួមចំណែកក្នុងការ អនុវត្តឲ្យមានប្រសិទ្ធភាពនូវសេចក្តីថ្លែងការណ៍របស់ថ្នាក់ដឹកនាំ អាស៊ាន អាស៊ានគ្មានគ្រឿងញៀននៅ ឆ្នាំ២០១៥។
បើយោងទៅតាមផែនការជាតិ៣ឆ្នាំខាងមុខនេះបានបង្ហាញឱ្យដឹងដែរថា កម្ពុជាជាប្រទេសមួយក្នុងចំនោមប្រទេសជាច្រើនក្នុងតំបន់ដែលទទួល រងគ្រោះដោយសារគ្រឿងញៀនគ្រប់ប្រភេទទាំងគ្រឿងញៀនធម្មជាតិនិងសំយោគ ដែលឆ្លងកាត់មកពីតំបន់ត្រីកោណមាសចូលមក ក្នុងប្រទេស និងនាំចេញទៅកាន់ប្រទេសនានាក្នុងតំបន់ ។ក្រៅពីនោះ មានក្រុមឧក្រិដ្ឋជនគ្រឿងញៀនអន្តរជាតិបានប៉ុនប៉ងប្រើប្រាស់កម្ពុជាជាកន្លែងសម្រាប់ចម្រាញ់ ផលិតសារធាតុគីមីផ្សំគ្រឿងញៀនដើម្បីនាំចេញទៅបរទេស ។ ទោះជាយ៉ាងណា អាជ្ញាធរ ក៏បានពង្រឹងការត្រួតពិនិត្យការនាំចូលសារធាតុគីមីផ្សំ របស់រោងចក្រ ចំនួនជាង ៨០០កន្លែងនៅកម្ពុជា ជៀសវាងការបន្លំយកមកកែច្នៃគ្រឿងញៀន។
មាត្រា ៣៣ នៃច្បាប់ព្រះរាជណាចក្រកម្ពុជាចែងថា ជនណាប្រព្រឹត្តដោយចេតនាល្មើសនឹងបទប្បញ្ញត្តិនៃច្បាប់នេះ និងបទបញ្ជាទាក់ទងនឹងការ ស្នើផ្តល់អោយការដាក់លក់ ការ ចែកចាយ ការធ្វើរបរជើងសារ ការលក់ ការប្រគល់ឱ្យ ទោះក្នុងឋានជាអ្វីក៏ដោយ ការផ្ញើការបញ្ជូន ការដឹកជញ្ជូន ការទិញ ការរក្សាទុក រឺការប្រើប្រាស់គ្រឿងញៀនដែលបន្ដាលអោយមានគ្រោះថ្នាក់ធ្ងន់ធ្ងរ ត្រូវផ្តន្ទាទោសដាក់ពន្ធនាគារពី១០ឆ្នាំ ដល់២០ឆ្នាំ និងផ្តន្ទាទោស ពិន័យ ជាប្រាក់ពី ១០.០០០.០០០៛០០ (ដប់លានរៀល) ដល់ ៥០.០០០.០០០៛០០ (ហាសិប លានរៀល) រឺផ្តន្ទាទោសណាមួយក្នុងទោសទាំងពីរនេះ៕ ដោយ៖ ភីនរ៉ា