ភ្នំពេញ៖ មានការជួបជុំគ្នាមួយពីសំណាក់ក្រុមគ្រូពេទ្យនៅរាជធានីភ្នំពេញ ដើម្បីបង្ហាញនូវរបប​គំហើញ ឬ មគ្គុទេស​ថ្មីៗ ដែលពួកគាត់បានសិក្សាស្រាវជ្រាវ ក៏ដូចជាបទពិសោធន៍​ដែលពួកគាត់មាន មកចែករំលែកឲ្យគ្នាទៅវិញទៅមក សម្រាប់ជាទុនក្នុងការព្យាបាលជំងឺ​លើសឈាម និងជំងឺទឹកនោម​ផ្អែម​ឲ្យកាន់តែមានប្រសិទ្ធិភាព ។

លោក សាស្រ្តាចារ្យវេជ្ជបណ្ឌិត សុខ ជួ ប្រធានផ្នែកជំងឺបេះដូងនៃមន្ទីរពេទ្យកាល់ម៉ែត្រ បានឲ្យ​ដឹងកាលពីថ្ងៃទី០២​វិច្ឆិកា​កន្លងទៅនេះ​ថា ជំងឺលើសឈាមជាឃាតករលាក់មុខ ដែល​បាន​សម្លាប់​មនុស្សរាប់ម៉ឺននាក់ក្នុង១ថ្ងៃនៅ​លើ​ពិភព​លោក ។​ ដោយឡែកនៅក្នុងប្រទេស​កម្ពុជាជំងឺលើសឈាម បានសម្លាប់មនុស្ស១ពាន់នាក់ ស្មើនិង១២,៣​ភាគ​រយ​​ក្នុងមួយថ្ងៃ ក្នុងនោះអ្នករស់នៅទីក្រុង​មាន​ចំនួន១៦,៩ភាគរយ និងអ្នករស់នៅជនបទមានចំនួន​១០ភាគ​រយ។

ទាក់ទិននិងហានិភ័យខ្ពស់នៃជំងឺលើសឈាម លោក វេជ្ជបណ្ឌិត សុខ ជួ បានបង្ហាញផ្លូវ​ដ៏ល្អ​​សម្រាប់ប្រជាពល​រដ្ឋ​គ្រប់​រូបត្រូវតែទៅជួបលោកគ្រូពេទ្យឯកទេស ដើម្បីធ្វើរោគវិនិច្ឆ័យ តាំងតែពីមិនទាន់មានរោគសញ្ញា មានន័យថា ទៅ​ឆែក​មុនកុំចាំដល់ឈឺបានទៅពិនិត្យនោះ ពិសេសមនុស្សស្រីលើសពីអាយុ៥០ឆ្នាំ និងមនុស្ស​ប្រុសលើសពីអាយុ​៤៥​ឆ្នាំ​ឡើងទៅ​ត្រូវ​ទៅជួប​លោកគ្រូ​ពេទ្យដើម្បីឆែករោគក្នុងខ្លួន។ ជាមួយគ្នានេះលោកសុំឲ្យពលរដ្ឋទាំងអស់ប្តូរ ទំលាប់​ពី​ទិញថ្នាំនៅតាមហ្វាម៉េស៊ី (ឱសថស្ថាន) មកទទួលទាននៅពេលយើងឈឺ យើង​ត្រលប់​ទៅធ្វើដូចប្រជាជនជឿន​លឿន​នៅ​លើពិភពលោកគឺជួបជាមួយគ្រូពេទ្យ ដើម្បីធ្វើរោគ​វិនិច្ឆ័យមុននិងប្រើប្រាស់ថ្នាំពេទ្យ។

លោកវេជ្ជបណ្ឌិតបញ្ជាក់ថា ជំងឺលើសឈាមគ្មានរោគសញ្ញានិងមូលហេតុពិតប្រាកដទេ គឺមានតែកត្តាគ្រោះថ្នាក់​ដែល​បណ្តាលមកពីការជក់បារី អាយុច្រើន ទឹកនោមផ្អែម ការធាត់ ពេក និងការនៅស្រណុកខ្លាំងពេក វាអាច​បណ្តាល​​ឲ្យស្ទះសសៃឈាមខួរក្បាល គាំងបេះដូង ស្លាប់មួយចំហៀងខ្លួន ឬខូចតម្រងនោមជាដើម ។បើទោះជាមាន​ហានិភ័យខ្ពស់នៃជំងឺលើសឈាមយ៉ាងនេះក៏ដោយ លោកវេជ្ជបណ្ឌិតបាន​បង្ហាញពីវិធីដែលអាចជួយកាត់​បន្ថយ​​បាន​ខ្លះ គឺប្រជាពលរដ្ឋត្រូវកាត់បន្ថយការទទួលទានប្រៃ ហើយត្រូវបរិភោគមុខម្ហូបបែបខ្មែរយើងមានបន្លែច្រើន ជា​មួយ​ត្រី កុំឲ្យឡើងទំងន់ខ្លាំងពេក កុំផឹកស្រាច្រើន កុំជក់បារី ពិសេសគឺត្រូវហាត់ប្រាណជាប្រចាំ។

សូមបញ្ជាក់ថា នៅក្នុងរបាយការណ៍របស់អង្គការសុខភាពពិភពលោក​បានបង្ហាញថា នៅ​ក្នុងចំណោមប្រជាជន​កម្ពុជា​​១០០ពាន់នាក់ មានប្រជាជន១២៨នាក់បានស្លាប់ដោយសារ​ជំងឺ​ស្ទះសរសៃបេះដូង ជារៀងរាល់ឆ្នាំ ដែលជាតួ​រ​លេខ​មួយដ៏ខ្ពស់ជាងគេក្នុងតំបន់ និងគួរឲ្យព្រួយ​បារម្យ ។ ចំពោះជំងឺលើសឈាមវិញ បើតាមតួរ​លេខដែលបង្ហាញ​ដោយ​ក្រសួងសុខាភិបាល បានបង្ហាញថា មានប្រហែលជាជិត១២ភាគរយនៃប្រជាជន​កម្ពុជាបានស្លាប់​ដោយជំងឺ​លើស​​ឈាម ហើយនៅតំបន់ខ្លះមានរហូតដល់២៥ភាគរយឯណ្ណោះ៕ ដោយ៖ ស.ស្អាត