ភ្នំពេញ៖ អ្នកឯកទេសមកពីមន្ទីរពេទ្យក្វាងចូវទំនើបផ្នែកមហារីក បានចែករំលែកបទពិសោធន៍ និងបច្ចេកវិទ្យា​ថ្មីៗ​ទាក់ទងនិងការព្យាបាលជម្ងឺមហារីកដល់គ្រូពេទ្យកម្ពុជា និងសិក្ខាកាមផ្សេងមួយចំនួន​ទៀតឲ្យយល់កាន់តែ​ច្បាស់​ពីរ​បៀប ព្យាបាលជម្ងឺប្រភេទនេះឲ្យកាន់តែមានប្រសិទ្ធភាពខ្ពស់។ លោក ចាង ឆឹង តំណាងមន្ទីរពេទ្យក្វាងចូវទំនើប ផ្នែកមហារីក បានថ្លែងក្នុងសិក្ខាសាលាផ្លាស់ប្តូរបទពិសោធន៍ បច្ចេកវិទ្យាព្យាបាល ជម្ងឺមហារីកនៅថ្ងៃសៅរ៍កន្លង​ទៅនេះថា ការជួបជុំប្រឹក្សាគ្នានេះធ្វើឡើងក្នុងគោលបំណងចែករំលែក និងផ្លាស់ប្តូរនូវបទពិសោធន៍ ក៏ដូចជា​បច្ចេក​វិទ្យាថ្មីៗទំនើបមួយចំនួនពីអ្នកឯកទេសមកពីប្រទេសចិន ក្នុងការព្យាបាលជម្ងឺមហារីកដល់គ្រូពេទ្យកម្ពុជា។

រដ្ឋ​លេខា​​ធិការ​​​ក្រសួងសុខាភិបាលលោកវេជ្ជបណ្ឌិត តែ គុយស៊ាង មានប្រសាសន៍ថា ការជួបជុំគ្នាផ្លាស់ប្តូរគំនិត​យោបល់​ពីអ្នកឯកទេសគឺពិតជាបានរួមចំណែកយ៉ាងសំខាន់ ក្នុងការផ្តល់ឱកាសឲ្យក្រុមគ្រូពេទ្យដែល​បំរើការ​ក្នុង​វិស័យសាធារណៈ ក៏ដូចជាវិស័យឯកជនបានទទួលនូវបទពិសោធន៍ និងបច្ចេកវិទ្យាថ្មីៗ ឲ្យគ្នាទៅវិញទៅមក និង​ស្វែងយល់អំពីបញ្ហាប្រឈមនៃជម្ងឺមហារីកដែលកើតមានកន្លងមក។ លោករដ្ឋលេខាធិការបន្តថា តាមការសិក្សា​បង្ហាញ​ថាជម្ងឺមហារីកជាជម្ងឺទី៣ដែលមានកំណើន ជាលំដាប់ពីមួយឆ្នាំទៅមួយឆ្នាំ បន្ទាប់ពីជំងឺទឹកនោមផ្អែម និង​លើសឈាម ដែលត្រូវយកចិត្តទុកឲ្យបានខ្លាំងក្លាក្នុងការបង្កានិងព្យាបាលឲ្យបានខ្លាំងក្លា ។ លោកវេជ្ជ​បណ្ឌិត​រូប​នេះ​បញ្ជាក់ថា ចាប់តាំងពីឆ្នាំ២០០៨រហូតមកដល់ពេលនេះប្រជាជនជាងជាង១២០០០នាក់កើតជម្ងឺមហារីក ហើយ​ជម្ងឺនេះ កើតអាចបណ្តាលមកពីការប្រើប្រាស់ជាតិគីមី និងដោយសារតែវិទ្យាសាស្ត្រមានការរីកចំរើន ព្រម​កក្តា​ប្រែ​ប្រួលអាកាសធាតុក៏ជាមូលហេតុនាំឲ្យកើតមានជម្ងឺប្រភេទនេះដែរ។

ជម្ងឺមហារីកដែលកើតលើបុរសភាគច្រើន មានជម្ងឺមហារីកសួត មហារីកប្រូស្តាត ចំណែកស្រ្តីមហារីកសុដន់ ស្បូន មាត់ស្បូន ដៃស្បូន ក្រពះ ពោះវៀន ។ល។ សូមបញ្ជាក់ថា មន្ទីរពេទ្យក្វាងចូវទំនើប​ផ្នែកជម្ងឺមហារីក​ទទួល​បាន​ការ​អនុញ្ញាត និងត្រួតពិនិត្យដោយក្រសួងសុខាភិបាលនៃប្រទេសចិន គឺជាអង្គភាពសមាជិកនៃសមាគម​ប្រឆាំង​មហារីក​​ប្រទេសចិននិងបានឈរជើងលំដាប់នាំមុខគេក្នុងពិភពលោក ចំពោះវិស័យឯកទេសព្យាបាលមហារីក ជា​ពិសេស​ក្នុងមូលដ្ឋានបច្ចេកវិទ្យា វិធីចាក់បញ្ចូលបិទសរសៃឈាម ការចាក់បញ្ចូលគ្រាប់អនុភាគអ៊ីយ៉ូដ វិធីចិញ្ចឹម​កោសិកា ប្រឆាំងមហារីក និងវិធីកករំលាយ និងការប្រើវេជ្ជសាស្រ្តចិនបុរាណដែលមានប្រវត្តិយូរលង់​រាប់ពាន់​ឆ្នាំ​មក​ហើយនោះ។ បានបង្កើតការិយាល័យតំណាងរបស់ខ្លួនចំនួន៩មាន៖ នៅប្រទេសកម្ពុជា,វៀតណាម ,ថៃ ,ហ្វីលីពីន​និង​បង់​ក្លាដេស បានទទួលព្យាបាលអ្នកជម្ងឺមហារីកជូនប្រជាជនមកពីគ្រប់បណ្តាប្រទេស ៕

ដោយ៖ ស.​ស្អាត