ភ្នំពេញ៖ អគារមជ្ឈមណ្ឌលចក្ខុរោគមិត្តភាពកម្ពុជា-កូរ៉េ​ ដែលមានតម្លៃ៥លានដុល្លារកន្លះ នឹងក្លាយជា​គម្រោងគំរូ​​និងជានិមិត្តរូបនៃ​កិច្ចសហប្រតិបត្តិ​ការ​រវាង​ប្រទេស​​​ទំាងពីរ។ ជាងនេះទៅទៀត តាមរយៈទំនាក់ទំនង​ទាំងនេះបាន​​ជួយ​ធ្វើឲ្យកិច្ចសហប្រតិបត្តិការលើការអភិវឌ្ឍន៍កាន់​តែមានសន្ទុះគួរឲ្យកត់សំគាល់ ដោយក្នុងនោះ​ជំនួយ​ដែល​​ប្រទេស​​កូរ៉េបានផ្តល់ឲ្យប្រទេសកម្ពុជាកើនឡើងដល់ប្រមាណ​ជាជាង១០០​លាន​​ដុល្លា​គិតមក​ទល់​បច្ចុប្បន្ន ​។​

លោក សាស្រ្តាចារ្យ លូ លីឃាង ប្រធានមន្ទីរពេទ្យព្រះអង្គឌួងបានលើកឡើងថា ការសម្រេចកសាងមជ្ឈ​មណ្ឌល​​ចក្ខុ​​រោគមិត្តភាពកម្ពុជា-កូរ៉េនៅក្នុងបរិវេណមន្ទីរពេទ្យអង្គឌួងនេះ ជាការចង្អុរបង្ហាញរបស់ក្រសួង​សុខាភិបាល​ និង​​មាន​ការគាំទ្រផ្តល់ជំនួយពីប្រទេសកូរ៉េ តាមរយៈ Koica ប្រចាំកម្ពុជា ដែលឆ្លុះបញ្ចាំពីការយក​ចិត្តទុកដាក់លើកស្ទួយ​​វិស័យចក្ខុរោគឲ្យមានលក្ខណៈទំនើប និងមានគុណភាពកាន់តែប្រសើរនៅថ្ងៃខាងមុខ ។​​

លោក គីមយ៉ង់ម៉ុក​ប្រធានទីភ្នាក់ងារសហប្រតិបត្តិការអន្តរជាតិកូរ៉េ បានមានប្រសាសន៍ថា ប្រទេសកម្ពុជា​បានកំពុ​ង​​យកចិត្តដាក់ទៅលើបញ្ហាចក្ខុរោគ ដោយ​បាន​បង្កើត​ផែនការ​ជាតិ​ទប់ស្កាត់ភាពពិការភ្នែក(Cambodia’s National Plan​ for Prevention Blindness) ដែល​បាន​ផ្តោត​សំខាន់ទៅលើ​ការបណ្តុះបណ្តាលអ្នកឯកទេស​ព្យាបាល ការបង្រីក​ហេដ្ឋា​​រចនាសម្ព័ន្ធ ការបង្កើត​ទំនាក់​នំនង​កិច្ចសហការទាំងក្នុងនិងក្រៅប្រទេស និងការអប់រំជាទូទៅជាដើម ។​

ទន្ទឹមនឹងនេះគម្រោងសាង​សង់​​មជ្ឈមណ្ឌលចក្ខុរោគមិត្តភាពកម្ពុជា-កូរ៉េ​ ត្រូវបានបង្កើតឡើង​ស្របតាមគោល​ដៅ​​ខាង​លើ ដែលបានឆ្លងតាមការពិភាក្សានិងកិច្ចសហការយ៉ាងជិតស្និទ្ធរវាងប្រទេស​ទាំង​ពីរ។​ វិស័យសុខាភិបាល​ដើរ​​តួរយ៉ាងសំខាន់ក្នុងការធានាឲ្យបាននូវ​ការអភិវឌ្ឍន៍​សង្គមប្រកប​ដោយ​និរន្តរភាព និងការគាំទ្រជីវភាពរស់នៅ​របស់​​ប្រជាជន។ ស្របទៅនឹងតម្រូវការចាំបាច់នេះមជ្ឈមណ្ឌល​ចក្ខុ​រោគ​មិត្តភាពកម្ពុជា-កូរ៉េដ៏ទំនើប​នេះនឹងជួយផ្តល់​នូវ​​សេ​វាព្យាបាល​ឯកទេសផ្នែកភ្នែក ដែលនឹង​ជួយ​ទប់ស្កាត់ភាពពិការភ្នែកក្នុងប្រទេសកម្ពុជាជាក់ជាមិនខាន ។​

ម៉្យាងវិញទៀត ​​មជ្ឈមណ្ឌលចក្ខុរោគមិត្តភាពកម្ពុជា-កូរ៉េមិនត្រឹមតែផ្តល់ជូននូវការ​សាងសង់ប៉ុណ្ណោះទេ តែនឹងផ្តល់​​នូវ​​គ្រឿងបរិក្ខាពេទ្យ​និងរួម​បញ្ជូល​នូវកម្មវិធី​បណ្តុះបណ្តាល​សំខាន់ៗ​ដូចជា ការបញ្ជូនក្រុមអ្នក​ជំនាញវិស័យ​សុខា​ភិ​​បាល ​និងផ្តល់វគ្គបណ្តុះបណ្តាលជាដើម។​ ជាពិសេស​គម្រោងនេះទទួលបានការសហការជាមួយមន្ទីរពទ្យភ្នែកគីម​ ​ដែល​ជាមន្ទីរពេទ្យធំមួយរបស់ប្រទេស​កូរ៉េ និងការសហការភាពជាដៃគូរវាងស្ថាប័នរដ្ឋនិងឯកជន ដែលនឹងផ្តល់នូវ​​គ្រឿង​​បរិក្ខាពេទ្យទំនើប​ចុងក្រោយបំផុត និងការពង្រឹងសមត្ថភាពធនធានមនុស្សខាងវិស័យព្យាបាលភ្នែក​ រួមទាំង​​ការ​ធានា​នូវការគ្រប់គ្រងថែរក្សាបន្តប្រកបដោយនិរន្តរភាពផងដែរ ។​

ក្រៅពីគម្រោងសាងសង់មជ្ឈមណ្ឌលចក្ខុរោគមិត្តភាពកម្ពុជា-កូរ៉េ​នេះ នៅមាន​គម្រោងជា​ច្រើន​ទៀតដែល​មាន​​គោល​ដៅ​ជួយអភិវឌ្ឍន៍វិស័យ​សុខាភិបាល​ក្នុង​ប្រទេសកម្ពុជា។ ​ដូចជាគម្រោងសាង​សង់មន្ទីរ​ពេទ្យ​​​​​​​​បង្អែកខេត្ត​​​សៀមរាប​ដែលជួយពង្រឹងផ្នែកសុខភាពមាតា​និងទារក គម្រោង​ពង្រឹង​សមត្ថភាព​​មន្ទីរ​ពេទ្យស្រុក​បាធាយ​ ដើម្បី​ជួយសម្រួលដល់សេវាព្យាបាល​ជូនប្រជាពលរដ្ឋ និង​ជា​ពិសេស​ការ​បញ្ចូន​​ក្រុម​អ្នកស្ម័គ្រចិត្តកូរ៉េ​ផ្នែក​សុខាភិបាល​​ដើម្បីជួយពង្រឹងដល់ការព្យាបាលដល់ប្រជា​ពលរដ្ឋ​តាម​តំបន់​នា​នាក្នុងប្រទេសកម្ពុជា ។​​

លោក វេជ្ជបណ្ឌិត ម៉ម ប៊ុនហេង រដ្ឋមន្រ្តីក្រសួងសុខាភិបាលបានចាត់ទុកការផ្តល់អគារចក្ខុរោគដ៏មានតម្លៃនេះ ជា​​សមិទ្ធិផល​ថ្មីមួយទៀត​នៃកិច្ចសហប្រតិបត្តិការរវាងប្រទេសទាំងពី និងមានសារប្រយោជន៍សំខាន់ណាស់ ហើយ​​បាយ​​ឆ្លើយតបស្របតាមគោលនយោបាយ​សុខាភិបាល ដែលត្រូវបានយកចិត្តទុកដាក់​ពីប្រមុខរាជរដ្ឋាភិបាល​​ចំ​​​ពោះ​​​សុខមាលភាពប្រជាពលរដ្ឋ ។ ជំនួយដ៏ថ្លៃថ្លា​នេះនឹងជួយកាត់​បន្ថយ​ការ​​លំបាករបស់ក្រសួង និងផ្តល់លទ្ធភាព​​​ប​ន្ថែម​ទៀត​ ដល់ពលរដ្ឋកម្ពុជាក្នុងការ​​ទទួលបានសេវាផ្នែកចក្ខុរោគ៕ ដោយ៖ ស.ស្អាត