ភ្នំពេញ៖ សម្តេចប្រធានរដ្ឋសភានៃព្រះរាជាណាចក្រកម្ពុជា នៅល្ងាចថ្ងៃទី១០ ខែមករាម្សិលមិញ បានដឹកនាំគណៈប្រតិភូជាន់ខ្ពស់នៃរដ្ឋសភាទៅចូលរួមប្រជុំសភាអាស៊ី-ប៉ាស៊ីហ្វិក (APPF) លើកទី២២ ដែលប្រព្រឹត្តទៅចាប់ពីថ្ងៃទី ១១ដល់ថ្ងៃទី១៦ ខែមករា នៅទីក្រុងព្យេតូវ៉ាតាឡា នៃប្រទេសម៉ិកស៊ិក។
.jpg)
អញ្ជើញចូលរួមជូនដំណើរ សម្តេចពញាចក្រី ហេង សំរិន ដល់ព្រលានយន្តហោះអន្តរជាតិភ្នំពេញរួមមាន៖ លោក ងួន ញ៉ិល អនុប្រធានទី១រដ្ឋសភា, លោកស្រី ឃួន សុដារី អនុប្រធានទី២រដ្ឋសភា, សមាជិក សមាជិការដ្ឋសភា, រួមនិងមន្ត្រីជាន់ខ្ពស់នៃអគ្គលេខាធិការដ្ឋានរដ្ឋសភាជាច្រើនរូបទៀត ។
សេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភា បានឲ្យដឹងថា វេទិកា សភាអាស៊ី-ប៉ាស៊ីហ្វិក លើកទី២២ ប្រចាំឆ្នាំ២០១៤នេះ គឺផ្តោតលើប្រធានបទស្តីពីបញ្ហានយោបាយនិងសន្តិសុខ,បញ្ហាសេដ្ឋកិច្ច និងពាណិជ្ជកម្ម, និងកិច្ចសហប្រតិបត្តិការក្នុងតំបន់អាស៊ី-ប៉ាស៊ីហ្វិក។
វេទិកាសភាអាស៊ី-ប៉ាស៊ីហ្វិកគឺជាក្រុមនៃបណ្ដាសមាជិកសភា មកពីតំបន់អាស៊ី-ប៉ាស៊ីហ្វិក ដែលត្រូវបានបង្កើតឡើងនៅក្នុងឆ្នាំ១៩៩៣ដោយអតីតនាយករដ្ឋមន្ត្រីជប៉ុន លោកយ៉ាស៊ូហ៊ីរ៉ូ ណាកាសូណេ ក្នុង គោលបំណងរឹតចំណងសាមគ្គីភាព សហប្រតិបត្តិការរវាងសភានៃបណ្ដាប្រទេសក្នុងតំបន់អាស៊ី-ប៉ាស៊ីហ្វិក។ គិតចាប់តាំងពថ្ងៃបង្កើតរហូតមកដល់ពីនេះ គឺប្រទេសចំនួន ២៧ហើយ ដែលបានចូលរួមជាសមាជិក និងមានប្រទេសដែលជាអ្នកសង្កេតការណ៍ចំនួន១។ព្រះរាជាណាចក្រកម្ពុជា បានចូលជាសមាជិកនៅឆ្នាំ១៩៩៥ក្នុងអំឡុងពេលកិច្ចប្រជុំប្រចាំឆ្នាំលើកទី៣នា ទីក្រុងអាកាពូលប្រទេសម៉ិកស៊ិក។
ថ្នាក់ដឹកនាំឬ ក៏តំណាងជាន់ខ្ពស់នៃរដ្ឋសភាកម្ពុជា តែងតែទៅចូលរួមដើម្បីដកយកបទពិសោធន៍ និងឡើងធ្វើកិច្ចអន្តរាគមន៍នានាដែលពាក់ព័ន្ធទៅនឹងបញ្ហាប្រឈម នៅក្នុងតំបន់ដូចជា៖ បញ្ហាសន្តិសុខ ស្ថិរភាព វិបុលភាពនៃសេដ្ឋកិច្ច និងការអភិវឌ្ឍប្រកបដោយនិរន្តរភាពជាដើម។
ជារៀងរាល់ឆ្នាំ រដ្ឋសភាកម្ពុជា ក៏តែងបានលើកយកពីបញ្ហានយោបាយនៅក្នុងប្រទេសកម្ពុជា បង្ហាញប្រាប់ដល់ប្រទេសជាសមាជិកពីវឌ្ឍនភាព និងបញ្ហាប្រឈមផងដែរ ដូចជាការពង្រឹងច្បាប់នីតិរដ្ឋឲ្យមានអភិបាលកិច្ចល្អការប្រយុទ្ធប្រឆាំងអំពើពុករលួយ ការគោរពសិទ្ធមនុស្សការកសាងសន្តិភាពប្រជាធិបតេយ្យ និងការអភិវឌ្ឍ ប្រទេស និងមានដំណោះស្រាយរាល់គ្រប់បញ្ហា។គួររំឭកថាវេទិកាសភាអាស៊ី-ប៉ាស៊ីហ្វិក លើកទី២១កាលពីឆ្នាំ២០១៣ ត្រូវបានធ្វើឡើងនៅទីក្រុងវ្ល៉ាឌីវ៉ូស្តក់នៃប្រទេសរុស្ស៊ី ដោយមានគណៈប្រតិភូចូលរួមចំនួន៣២៨រូប មកពីប្រទេសចំនួន២៣ នៃសមាជិក អាស៊ី-ប៉ាស៊ីហ្វិក និងប្រទេសដែលជាអ្នកសង្កេតការណ៍ចំនួន១។
កិច្ចប្រជុំលើកនោះ បានពិភាក្សាលើរបៀបវារៈសំខាន់ៗដូចជា៖ ទី១.បញ្ហាស្តីពីសន្តិសុខ និងស្ថិរភាពក្នុងតំបន់អាស៊ី-ប៉ាស៊ីហ្វិក, ការពង្រឹងលទ្ធិប្រជាធិបតេយ្យ, ការគោរពបូរណភាព, និងការប្រមើលមើលការបង្កើតប្រព័ន្ធបណ្តុំសន្តិសុខតំបន់។ ទី២.បញ្ហាស្តីពីសមាសភាពរបស់សភាស្តីពីកិច្ចសហប្រតិបត្តិការ ពាណិជ្ជកម្មនិងសេដ្ឋកិច្ច និងដំណើរការសមាហរណកម្មនៅក្នុងតំបន់អាស៊ី-ប៉ាស៊ីហ្វិក ដោយយោងលើបែបបទរបស់អង្គការពាណិជ្ជកម្មពិភពលោក(WTO)។
ទី៣. បញ្ហាស្តីពីកិច្ចសហប្រតិបត្តិការក្នុងការបង្ការ និងការគ្រប់គ្រងគ្រោះមហន្តរាយ និងកិច្ចការពារបរិស្ថាន។និងទី៤.ការប្រជុំផែនការសកម្មភាពសម្រាប់អនាគតរបស់សភាអាស៊ី-ប៉ាស៊ីហ្វិក។ប្រទេសសមាជិកដែលបានចូលរួមបានអនុម័តនូវសេចក្តីសម្រេចចិត្ត ចំនួន១៤ ចំណុចនោះ គឺមានការទាក់ទងនឹងកិច្ចសហប្រតិបត្តិការក្នុងតំបន់អាស៊ី-ប៉ាស៊ីហ្វិក លើបញ្ហានយោបាយ សន្តិសុខ សេដ្ឋកិច្ច ពាណិជ្ជកម្មក្នុងតំបន់ក៏ដូចជាអន្តរជាតិ។
រាល់ការឯកភាពអនុម័តរួមគ្នានេះ គឺដោយមើលឃើញថា វាជាឯកសារគោលនៃគំនិតផ្ដួចផ្ដើមក្នុងដំណើរការច្បាប់ ដែលនឹងជួយ ជំរុញឲ្យសភា និងរដ្ឋាភិបាលនានានៃប្រទេសជាសមាជិកទាំងអស់បន្តពង្រឹង និងពង្រីកការគាំទ្រថ្នាក់តំបន់ក្នុងការប្រយុទ្ធប្រឆាំងលើបញ្ហា ប្រឈមនានាក្នុងតំបន់។ ប្រទេសដែលជាសមាជិកក៏បានអនុម័តយល់ព្រមឲ្យប្រទេសម៉ិកស៊ិកទទួលធ្វើ ជាម្ចាស់ផ្ទះសម្រាប់កិច្ចប្រជុំសភាអាស៊ី-ប៉ាស៊ីហ្វិក លើកទី២២ នៅខែមករា ឆ្នាំ២០១៤ និង ទទួលយកសំណើរបស់ប្រទស អេក្វាឌ័រ (Ecuador) ក្នុងការទទួលរៀបចំកិច្ចប្រជុំប្រចាំឆ្នាំលើកទី២៣
នាឆ្នាំ២០១៥៕ដោយ ៖ សស្អាត