ភ្នំពេញ: គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានបូកសរុបលទ្ធនៃការចុះឈ្មោះអ្នកបោះ ឆ្នោតថ្មី គិតត្រឹមថ្ងៃទី២១ខែតុលាម្សិលមិញ បានចំនួន១៧៤,១០៥នាក់។ប៉ុន្តែការចុះឈ្មោះនេះត្រូវបាន គ.ជ.ប
ប្រកាសពន្យាពេលបីថ្ងៃបន្ថែមទៀតសម្រាប់ខេត្តដែលរងគ្រោះដោយទឹកជំនន់ធ្ងន់ធ្ងរ ។
គណៈកម្មាធិការជាតិរៀបចំការបោះឆ្នោតបានបើកយុទ្ធនាការចុះឆ្នោតថ្មីក្នុងបញ្ជីបច្ចុប្បន្នភាពឆ្នាំ២០១៣ ចាប់ពីថ្ងៃទី០១ដល់ថ្ងៃទី ២០ខែតុលានិងបានចេញផ្សាយលទ្ធផលបូកសរុបនៃការចុះឈ្មោះនេះ ជាសាធារណៈនៅថ្ងៃទី២១ខែតុលាបានបង្ហាញថា ចំនួនអ្ន កចុះឈ្មោះថ្មីមាន១៧៤,១០៥នាក់នៅក្នុងឃុំ-សង្កាត់ចំនួន១៦១៦ក្នុងចំណោមឃុំ-សង្កាត់ចំនួន១៦៣៣នៅទូទាំងប្រទេស បានកែ តម្រូវឈ្មោះចំនួន១៧,២០២នាក់ និងបានលុបឈ្មោះចំនួន៩៨,៤៦៨នាក់ ។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានអោយដឹង នៅថ្ងៃទី២២ខែតុលាថា ការចុះឈ្មោះនឹងត្រូវពន្យាពេលដល់ថ្ងៃទី២៣តុលា សម្រាប់១០ខេត្តស្មើនឹង២១១ឃុំ-សង្កាត់ដែលត្រូវបានលិចលង់ដោយទឹកជំនន់ ។
.JPG)
ដោយឡែកខេត្តបាត់ដំបងមួយមានចំនួន១០២ឃុំ-សង្កាត់។តាមតួលេខនេះ លោក កំណត់ថា ខេត្តបាត់ដំបងមានផលប៉ះពាលខ្លាំងជាងគេលើដំណើរការចុះឈ្មោះបោះឆ្នោត។ម្យ៉ាងទៀតបើតាមលោក ទេព នីថា ដដែលដំណើរការចុះឈ្មោះនេះក៏មិនបានច្រើនដូចឆ្នាំដែលត្រូវបោះឆ្នោតនោះដែរ ព្រោះឆ្នាំបោះឆ្នោតសកម្មជនគណបក្សនយោបាយបានចុះគ្រប់ច្រកល្ហកដើម្បីគៀងគរប្រជាជនអោយទៅចុះឈ្មោះ ។
គួរបញ្ជាក់ថា ចំនួនអ្នកមានសិទ្ធិបោះឆ្នោតក្នុងបញ្ជីរបស់ គ.ជ.ប សម្រាប់នីតិកាលទី៥ដែលបានប្រព្រឹត្តិទៅកាលពីថ្ងៃទី២៨ខែកក្កដាឆ្នាំ២០១៣មានចំនួនជាង៩លាន៦សែននាក់។ យ៉ាងណាក៏ដោយបញ្ជីឈ្មោះអ្នកបោះឆ្នោតនៅតែជាប្រធានបទក្តៅនៅឡើយសម្រាប់គណកប្សប្រឆាំងដែលតែងតែរិះគន់ទៅលើប្រព័ន្ធបោះឆ្នោតដែលរៀបចំឡើងដោយគ.ជ.បនោះ៕ ដោយ៖ រតនា