ភ្នំពេញ៖ ប្រធាននាយកដ្ឋានជលសាស្ត្រនៃក្រសួងធនធានទឹកនិងឧត្តុនិយមលោកម៉ៅ ហាក់ បានឱ្យដឹងថា
ក្នុងរយៈពេលប៉ុន្មានថ្ងៃខាងមុខនេះស្ថានភាពទឹកទន្លេនៅប្រទេសកម្ពុជានឹងមានការកើនឡើងដោយហូរចូល
តាមបណ្ដាព្រែកស្ទឹងបឹងមួយចំនួននៅតាមតំបន់វាលទំនាបអមសងខាងទន្លេដូច្នេះប្រជាពលរដ្ឋដែលរស់នៅ
តាមបណ្ដោយដងទន្លេមេគង្គទន្លេសាបទន្លេបាសាក់ត្រូវរួសរាន់ប្រមូលផលឲ្យបានទាន់ពេលវេលាជៀសវាង
ការលិចលង់។
លោកម៉ៅ ហាក់បានបញ្ជាក់ថាដោយប្រទេសកម្ពុជាទទួលឥទ្ធិពលរបស់ប្រព័ន្ធសម្ពាធទាបដែលបានបង្កឲ្យ
មានភ្លៀងធ្លាក់យ៉ាងច្រើននៅតំបន់អាងទន្លេមេគង្គក្នុងប្រទេសថៃនិងប្រទេសឡាវដែលបានជះឥទ្ធិពលដល់
ប្រទេសកម្ពុជាដោយមានភ្លៀងធ្លាក់ពីតិចទៅមធ្យមដែលល្អប្រសើដល់ការបង្កបង្កើនកសិកម្ម និងធ្វើឲ្យទឹក
ទន្លេមេគង្គទន្លេសាបទន្លេបាសាក់មានការកើនឡើងដោយហូរចូលទៅក្នុងព្រែកស្ទឹងបឹងបួរមួយចំនួននៅ
រយៈពេល៤ទៅ៥ថ្ងៃខាងមុខនេះ។
លោកម៉ៅ ហាក់ បានបន្ថែមថាចំពោះការហក់ឡើងនូវទឹកទន្លេមេគង្គនេះមិនទាន់ដល់កំរិតព្រួយបារម្ភនោះទេ
គ្រាន់តែហូរចូលទៅក្នុងតំបន់ទំនាបៗតែប៉ុណ្ណោះព្រោះថារដូវនេះជារដូវទឹកឡើងផងដូច្នេះសូមប្រជាពលរដ្ឋ
ដែលរស់នៅតាមបណ្ដោយដងទន្លេមេគង្គទន្លេសាបទន្លេបាសាក់ត្រូវរួសរាន់ប្រមូលផលឲ្យបានទាន់ពេល
វេលា។
មន្រ្តីរូបនោះបន្តថា ទឹកទន្លេបាននឹងកំពុងហក់ឡើងប៉ុន្តែការហកើឡើងនេះវាមិនទាន់ដល់កំរិតយើងត្រូវព្រួយ
បារម្ភនោះទេគ្រាន់ទេការហក់ឡើងនេះជាការហក់ឡើងជាគ្រាដំបូងតែតំបន់ដែលទាបៗអាចហូរចូលបន្តិច
បន្តួចប៉ុន្តែពុំមានការប៉ះពាល់អ្វីនោះទេជាធម្មតាខែនេះទឹកតែងតែហូរចូលតាមហ្នឹងហើយការជូនដំណឹង
របស់យើងនេះឲ្យគាត់ត្រៀមនិងដឹងថាទឹកចាប់ផ្ដើមឡើង។ប៉ុន្តែទឹកឡើងនោះឲ្យគាត់មានការប្រុងប្រយ័ត្ន
ផងដែរដូចជាដំណាំដែលនៅសេសសល់ត្រូវឲ្យពួកគាត់ប្រមូលឲ្យបានរួចរាល់ទើបប្រសើរ។
យ៉ាងណាក៏ដោយ លោកម៉ៅហាក់ក៏បានរំលឹកថានៅថ្ងៃទី២៨ខែកក្កដាជាថ្ងៃបោះឆ្នោតនោះក៏នឹងមានភ្លៀង
ធ្លាក់ច្រើនរឺតិចនៅតាមតំបន់មួយចំនួនផងដែរដូច្នេះសូមបងប្អូនត្រៀមលក្ខណៈឲ្យបានគ្រប់គ្រាន់ក្នុងការ
អញ្ជើញទៅបោះឆ្នោតដោយមានអាវភ្លៀងរឺឆ័ត្រសម្រាប់ត្រៀម ម៉្យាងត្រូវអញ្ជើញទៅបោះឆ្នោតឲ្យបានគ្រប់ៗ
គ្នា ព្រោះជាកាតព្វកិច្ចរបស់ពលរដ្ឋកម្ពុជាគ្រប់រូប៕
ដោយ៖ ស,ស្អាត