បាត់ដំបង ៖ តំបន់អភិរក្សឡូត៍នេសាទលេខ១ និងតំបន់អភិរក្សឡូត៍លេខ២ ដែលគ្រប់គ្រងដោយមន្រ្តីសង្កាត់ រដ្ឋបាលជលផលក្បាលតោល និងមន្រ្តីសង្កាត់ជលផលកំពង់ប្រហុក ស្ថិតក្នុងឃុំកោះជីវំាង ស្រុកឯកភ្នំ នៅតែមានបទល្មើសនេសាទក្នុងរដូវហាមឃាត់ជាប្រចាំ។ នេះបើតាមការអះអាងពីប្រជាពលរដ្ឋក្នុងភូមិក្បាលតោល ភូមិព្រែកទាល់និងភូមិពាក់កន្ទេល ជាមួយគ្នានោះពួកគាត់បានរិះគន់ដល់មន្រ្តីជំនាញថា បង្រ្កាបបានតែអ្នក នេសាទតូចតាច រីឯឈ្មួញនេសាទធំៗមិនអាចបង្រ្កាបបាន ព្រោះពួកគេហាក់ដូចជាដឹងព័ត៌មាន មុនអាចនិយាយបានថា ពួកគេមានខ្សែស្រឡាយជាមួនមន្រ្តី។
ប្រជាពលរដ្ឋខាងលើនិយាយថា ពួកគាត់លួចដាក់ស្បៃមុងជាង១០ម៉ែត្រ ក៏ត្រូវមន្រ្តីទាំងនោះដឹងភ្លាម ហើយចាប់យកភ្លែត ។ ប៉ុន្តែសំរាប់ឈ្មួញធំៗដែលគេដាក់ស្បៃមុងពណ៌ខ្មៅឬពណ៌ក្រហម ចាប់ពី១០០០ម៉ែត្រដល់ទៅ៣០០០ ម៉ែត្រ មិនធ្លាប់បានឃើញមន្រ្តីសង្កាត់ជលផលខាងលើចុះចាប់បានសម្រេចម្តងណាឡើយ។
ប្រជាពលរដ្ឋបានរិះគន់មន្រ្តីទាំង២សង្កាត់នោះថា អាចមានការឃុបឃិតនិងលួចផ្តល់ព័ត៌មានឲ្យដឹង មុននឹងចុះទៅបង្រ្កាបតំបន់ទាំង៣ភូមិខាងលើនោះ។ ប្រជាពលរដ្ឋដដែលបានបន្តថា ការចុះបង្រ្កាបទ្រង់ទ្រាយធំៗរបស់មន្រ្តីជំនាញហាក់បីដូចជាក្រុមឈ្មួញធំៗដឹងដំណឹងមុន រួចនំាគ្នាពន្លិចស្បៃមុង ចូលទៅក្នុងទឹកធ្វើឲ្យមន្រ្តី ទាំងនោះមើលមិនឃើញនិងមិនដឹងពីទីកន្លែងពួកគេដាក់។ ក្រោយពីមន្រ្តីទាំង២សង្កាត់នោះឡើងមកវិញ គឺក្រុមឈ្មួញទាំងនោះចាប់ផ្តើមលើកស្បៃមុងនិងបង្គោលឡើងវិញ។ដោយឡែកអ្នកនេសាទតូចតាចជាលក្ខណៈគ្រួសារគឺរត់មិនដែលរួចម្តងណាទេ ព្រោះគ្មាននរណាប្រាប់ព័ត៌មានមុន។
ប្រជាពលរដ្ឋបានបន្តការរិះគន់ថា ពួកគេមានឱកាសប្រមូលលុយបានច្រើនក្នុងរដូវបិទនេសាទនេះ ព្រោះពួកគេជាអ្នកផ្តល់ភ្លើងខៀវដល់ឈ្មួញអ្នកនេសាទធំៗទាំងនោះ។ ចំណែកការចុះទៅបង្រ្កាបម្តងៗគឺជាយុទ្ធសាស្រ្តគោះទឹកឲ្យត្រីរត់ចូលស៊ងប៉ុណ្ណោះ មិនមែនបង្រ្កាបដើម្បីឲ្យមច្ឆាជាតិកើនឡើងនៅរដូវហាមឃាត់នោះទេ។
ករណីនេសាទក្នុងរដូវហាមឃាត់ គឺវាខុសធ្ងន់ធ្ងរណាស់ទៅហើយ រីឯអ្វីដែលកាន់តែខុសធ្ងន់ជាងនេះទៅទៀតគឺ ពួកឈ្មួញធំៗនេសាទក្នុងដែនអភិរក្សឡូត៍លេខ១និងនិងឡូត៍លេខ២។ ហើយការដែលឈ្មួញធ្វើបែបនេះបាន ព្រោះតែមន្រ្តីសង្កាត់ជលផលតំបន់នោះបើកដៃដើម្បីលាភសក្ការៈ មិនខ្វល់ពីដែនអភិរក្សឬក៏រដូវត្រីពងកូននោះទេឲ្យតែធ្វើមានធ្វើបានសំរាប់បុគ្គល។ បើបណ្តែតបណ្តោយតែរបៀបនេះ ច្បាស់ជាអ្នកស្រុកទាំងនោះគ្មានត្រីទទួលទានទេ ហើយត្រីកម្រមួយចំនួនទៀតនឹងដាច់ពូជជាមិនខាន។
ប្រជាពលរដ្ឋសំណូមពរក្រសួង ឬ នាយកដ្ឋានជំនាញ មេត្តាចុះទៅត្រួតពិនិត្យមើលការងារមន្រ្តីជលផលនៅសង្កាត់ទាំង២ខាងលើនោះផង ជៀសវាងក្របីបាត់ទើបធ្វើរបងដល់ពេលប្រឡងទើបខំប្រឹងរៀន។ ជុំវិញការលើកឡើងរបស់ប្រជាពលរដ្ឋនេះ យើងមិនអាចសុំការពន្យល់ពីមន្រ្តីសង្កាត់ជលផលទំាង២នោះបានទេ៕
ដោយ ៖ សស្អាត