ភ្នំពេញ៖ ស្រ្តីជាអ្នកអនាម័យរោងចក្រកាត់ដេរម្នាក់ ដើរឆ្លងផ្លូវចូលធ្វើការ ត្រូវម៉ូតូមួយគ្រឿង ជិះលឿនពេក ប្រញាប់ទៅធ្វើការ បានទៅបុក បណ្តាលឲ្យបោកក្បាលស្លាប់នៅកន្លែងកើតហេតុ កាលពីវេលាម៉ោង៦ និង១៥នាទីព្រឹក ថ្ងៃទី២៤ កុម្ភៈ ផ្លូវជាតិលេខ២ ក្រុម២១ ភូមិព្រែកតាឡុង២ សង្កាត់ចាក់អង្រែលើ ខណ្ឌមានជ័យ ។
ប្រភព័ត៌មានពីអ្នកបើកម៉ូតូបង្កមានឈ្មោះ គុណ វ៉ាន ភេទប្រុស អាយុ២៣ឆ្នាំជាកម្មករលក់ ទំនិញនៅផ្សារអូឡាំពិក ស្នាក់នៅជាមួយថៅកែនៅសង្កាត់អូឡាំពិក ខណ្ឌចំការមន មានស្រុកកំណើតនៅ ភូមិពោធិរៀងខាងជើង ឃុំពោធិរៀង ស្រុកកំពង់លាវ ខេត្តព្រៃវែង មានឲ្យដឹងថា មុនពេលកើតហេតុខ្លួនជិះម៉ូតូម៉ាកសេ១២៥ ពណ៌ខ្មៅ ស៊េរី២០០៦ ឡើងស៊េរី២០១៣ ពាក់ស្លាកលេខ ភ្នំពេញ 1N 9668 ក្នុងគោលបំណងទៅមើលការប្រគុំតន្រ្តី នៅទីក្រុងតាខ្មៅ កាលពីយប់មិញ យប់ជ្រៅពេក បានជិះទៅដេកផ្ទះបងប្អូន នៅតាខ្មៅ ចាំព្រឹកឡើងទើបត្រឡប់មកធ្វើការវិញ ។
លុះពេលព្រឹកឡើង ជិះម៉ូតូតែម្នាក់ឯង ដឹកកង់ម៉ូតូចំនួន២ នៅខាងមុខ ក្នុងល្បឿនលឿន ទិសដៅពីត្បូងទៅជើង បានជិះវ៉ារថយន្តកូរ៉ូឡាមួយគ្រឿង ដែលបានបន្ថយល្បឿន ឲ្យអ្នកថ្មើរជើងទៅមុខ ស្រាប់តែម៉ូតូជិះវ៉ា ទៅបុកពេញទំហឹង បណ្តាលឲ្យប៉ើងឡើងទៅលើធ្លាក់បោកក្បាលស្លាប់ ភ្លាមៗតែម្តង ។
ស្រ្តីរងគ្រោះដែលស្លាប់មានឈ្មោះ ឃឹម សុខា អាយុ៤៥ឆ្នាំ ជាអ្នកអនាម័យក្នុងរោងចក្រផាក ស្រ៊ុន ជាស្រ្តីមេម៉ាយ មានទីលំនៅភូមិសៀមរាប ឃុំសៀមរាប ស្រុកកណ្តាលស្ទឹង ខេត្តកណ្តាល ។ ក្រោយពេលកើតហេតុ សពត្រូវក្មួយស្រីឈ្មោះ ស សុធារ័ត្ន អាយុ៤១ឆ្នាំ ជាគ្រូបង្រៀននៅវិទ្យាល័យព្រែកស្លែង ដឹកយកទៅធ្វើបុណ្យនៅស្រុកកំណើត ។ ចំណែកអ្នកបើកម៉ូតូ ត្រូវសមត្ថកិច្ចឃាត់ខ្លួន យកទៅការិយាល័យនគរបាលចរាចរណ៍ក្រុង រង់ចាំធ្វើការដោះស្រាយតាមផ្លូវច្បាប់ ៕
ដោយៈ ភីនរ៉ា