ភ្នំពេញ៖ នៅរសៀលថ្ងៃទី១០ខែតុលាម្សិលមិញនេះនៅលើកំណាត់ផ្លូវមុន្នីរ៉េតចាប់ពីគល់ស្ពានអាកាសស្ទឹងមានជ័យរហូតដល់ស្ពានចំការដូងមានការកកស្ទះចរាចរពេញមួយល្ងាចដោយសាររថយន្តកុងតែន័ររថយន្តដឹកទំនិញធំៗរថយន្តដឹកនិងក្រឡុកស៊ីម៉ងដែលមានទីតាំងនៅជិតវត្តនន្នមុនីឈប់សំចតនៅតាមបណ្តោយផ្លូវនេះជារៀងរាល់ថ្ងៃ។
ប្រជាពលរដ្ឋដែលមានលំនៅដ្ឋាននៅតាមបណ្តោយកំណាត់ផ្លូវខាងលើបាននាំគ្នារអ៊ូរទាំថានៅពេលមានរថយន្តដឹកស៊ីងម៉ងស៍ដែលមានប្រវែងវែងៗទាំងនោះបត់ចេញឬចូលពីទីតាំងរបស់គេម្តងៗតែងតែបង្ករឲ្យមានការកកស្ទះជាប្រចាំគ្រាន់តែស្ទះយូរឬឆាប់តែប៉ុណ្ណោះ។ដោយឡែកនៅរសៀលថ្ងៃព្រហស្បត្តិនេះមានរថយន្តប្រភេទដឹកខ្នាតធំៗនិងរថយន្តតូចធំគ្រប់ប្រភេទបានកកស្ទះលើកំណាត់ផ្លូវនេះមិនអាចធ្វើចរាចរបាន។
ប្រជាពលរដ្ឋបាននាំគ្នាលើកឡើងថាបើទោះជាមានសារាចរណ៍ណែនាំឬសេចក្តីប្រកាសព័ត៌មានរបស់សាលារាជធានីភ្នំពេញមិនអនុញ្ញាតិឲ្យរថយន្តធុនធំឬប្រភេទសណ្តោងរឺម៉ក់ធ្វើចរាចរណ៍នៅពេលថ្ងៃគឺចាប់ពីម៉ោង៦ព្រឹករហូតដល់ម៉ោង៩យប់នោះជាច្រើនលើកច្រើនសារក៏ហើយក៏ដោយក៏គេនៅតែឃើញមានរថយន្តដែលត្រូវហាមឃាត់ប្រភេទខាងលើនេះធ្វើចរាចរណ៍ជារៀងរាល់ថ្ងៃនិងតែងតែបង្ករបញ្ហាកកស្ទះនិងគ្រោះថ្នាក់ជារើយៗនៅក្នុងរាជធានីភ្នំពេញ។
ប្រជាពលរដ្ឋបាននាំគ្នានិយាយបែបរិះគន់ចំពោះមន្រ្តីនគរបាលចរាចផ្លូវគោគថារថយន្តធំៗទាំងអស់នោះអាចធ្វើចរាចរណ៍ចូលមកក្នុងរាជធានីបានគឺដោយសារការឃុបឃិតគ្នាពីមន្រ្តីប៉ូលិសចរាចរណ៍យកលុយពីឡានទាំងនោះជាថ្នូរនៃការចូលក្រុងពេលថ្ងៃដោយមិនបានគិតពីការប៉ះពាល់សណ្តាប់ធ្នាប់ឬធ្វើឲ្យមានការកកស្ទះចរាចរណ៍ក្នុងក្រុងនោះឡើយ។ប្រជាពលរដ្ឋអំពាវនាវដល់អភិបាលរាជធានីភ្នំពេញលោកប៉ាសិជាតិវង្សសូមចាត់វិធានការណ៍ចំពោះមន្រ្តីក្រោមឱវាទដែលមិនអនុវត្តតាមសេចក្តីណែនាំឬសារាចរណ៍ណែនាំរបស់សាលារាជធានីភ្នំពេញពិសេសក្រុមហ៊ុនដឹកជញ្ជូនដែលមិនគោរពតាមការណែនាំខាងលើនោះដើម្បីបញ្ជៀសបាននូវការកកស្ទះចរាចរណ៍ក្នុងក្រុងនារដូវវស្សានេះ៕
ដោយ៖ សស្អាត