កណ្តាល ៖ យុវជនម្នាក់បានរងរបួសដាច់ដៃម្ខាងធ្លាក់ទៅលើទ្រូងផ្លូវ និងអ្នករួមដំណើរ២នាក់ទៀតរងរបួសស្រាល ខណៈដែលជនរងគ្រោះបើកម៉ូតូ ជ្រុលទៅបុកម៉ូតូសណ្តោងរ៉ឺម៉កមួយគ្រឿង កាលពីវេលាម៉ោង២និង៣០នាទី រំលងអធ្រាត្រ ថ្ងៃទី១០ ខែវិច្ឆិកា ឆ្នាំ២០១៣ លើកំណាត់ផ្លូវជាតិលេខ២១A ចំណុចគោលដៅK១១ ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ។
.jpg)
នគរបាលចរាចរណ៍ក្រុងតាខ្មៅបានឲ្យដឹងថា ជនរងគ្រោះមានឈ្មោះ ឆែម ឆៃ ភេទប្រុស អាយុ១៨ឆ្នាំមានទីលំនៅភូមិកោះខ្សាច់ទន្លាកើត ឃុំកោះខ្សាច់ទន្លា ស្រុកស្អាង ខេត្តកណ្តាល បើកបរម៉ូតូម៉ាកស្មាស់រេវ៉ូ សេ១១០ ពណ៌ខ្មៅ ពាក់ស្លាកលេខភ្នំពេញ 1AC-4881 និង អ្នករួមដំណើរ២នាក់ទៀតរងរបួសស្រាលពុំត្រូវបានស្គាល់អត្តសញ្ញាណនោះទេ ។ ចំណែកភាគីម្ខាងទៀត ម្ចាស់រ៉ឺម៉កពុំត្រូវបានស្គាល់អត្តសញ្ញាណដែរ ជាប្រភេទម៉ូតូសណ្តោងរ៉ឺម៉ក ក្រោយពីកើតហេតុបានគេចខ្លួនបាត់ ។
.jpg)
ប្រភពព័ត៌មាននគរបាលចរាចរណ៍ដដែលបានបន្តថា នៅមុនពេលកើតហេតុជនរងគ្រោះបានជិះម៉ូតូរបស់គេម៉ាកស្មាស់ រេវ៉ូ ឌុបគ្នា២នាក់តាមបណ្តោយផ្លូវជាតិលេខ២១A ក្នុង ទិសដៅពីជើងទៅត្បូងដោយល្បឿនលឿន។ លុះបើកមកដល់ចំណុចកើតហេតុក៍បានជ្រុលទៅបុកជាមួយម៉ូតូសណ្តោង ដែលគេមិនស្គាល់ម៉ាក និងអ្នកបើកបរបណ្តាលឲ្យយុវជនខាងជាអ្នកបើកបរម៉ូតូរងរបួសដាច់ដៃម្ខាង ធ្លាក់ទៅលើផ្លូវគួរឲ្យសង្វេគបំផុត និងអ្នករួមដំណើរ២នាក់ទៀតរងរបួសស្រាល ។
ប្រភពដដែលបានបន្តថា ក្រោយពីមានហេតុការណ៍កើតឡើងអ្នកបើកម៉ូតូសណ្តោងរឺម៉កបានបើក ម៉ូតូគេចបាត់ពីកន្លែងកើតហេតុដោយបន្សល់ទុកតែជនរងគ្រោះនិងម៉ូតូ។ជនរងគ្រោះត្រូវបានដឹកយកទៅសង្គ្រោះនៅមន្ទីរពេទ្យ
។ ចំណែក ម៉ូតូត្រូវបានសមត្ថកិច្ចនគរបាលនាំយកទៅរក្សាទុកនៅអធិការដ្ឋាននគរបាលក្រុងតាខ្មៅ៕ដោយ៖ មករា