ភ្នំពេញ៖ ចំពេលដែលកម្ពុជា កំពុងជួបនូវបញ្ហាគ្រោះមហន្តរាយដោយ ទឹកជំនន់នោះ ធនាគារ​អភិវឌ្ឍន៍ ​អាស៊ី (ADB) បានប្រកាសថា ខ្លួនត្រៀមផ្ដល់លុយចំនួន៤,៥លានដុល្លារ ដល់គណៈ​កម្មាធិការជាតិ គ្រប់​​គ្រង​​គ្រោះ មហន្តរាយ ដើម្បីប្រើប្រាស់ពង្រឹង សមត្ថភាពរបស់​ស្ថាប័នមួយ​នេះ ឲ្យកាន់តែរឹងមំា​ថែម​ទៀត​​ងាយ​​ដោះស្រាយគ្រោះធម្មជាតិទឹក​ជំនន់នៅកម្ពុជា។​

លោក Peter Blimble នាយករង ADB ប្រចាំកម្ពុជា មានប្រសាសន៍ កាលពីថ្ងៃម្សិលមិញថា ដោយសារ​តែ​​កម្ពុជា កំពុងជួបប្រទះទឹកជំនន់ ទើប ADB ត្រៀមផ្ដល់ទឹកប្រាក់៤,៥ លានដុល្លារ សម្រាប់ជួយពង្រឹង ​សមត្ថ​​ភាព​ដល់ គណៈកម្មាធិការជាតិ គ្រប់គ្រងគ្រោះមហន្តរាយ ដែល​ថវិកា​ទាំងនោះ បានមក​ពីប្រទេ​ស​​ជប៉ុន។​

លោកបន្តថា យើងនឹងអាចជួយ គណៈកម្មាធិការជាតិ គ្រប់គ្រងគ្រោះ មហន្តរាយ ដើម្បីធ្វើការ​ឲ្យបាន​ភាព​​ជិត​ស្និទ្ធ ជាមួយបណ្ដាក្រសួងស្ថាប័នរដ្ឋ ដូចជាក្រសួងធនធានទឹក ក្រសួងអភិវ​វឌ្ឍន៍​ជនបទ ជាដើម​នោះ។ ​គណៈ​កម្មាធិការជាតិមួយនេះ នៅមានចំណុចជាច្រើនដែលត្រូវ​ការ​យើងជួយកែលម្អ ។លោក Peter Blimble​ បញ្ចាក់ថា ADB នឹងបន្តជួយប្រទេសកម្ពុជា តាមរយៈគម្រោងផ្សេងៗ​ទៀត​ ពាក់ព័ន្ធ​នឹងគ្រោះមហន្តរាយ។ ​ដោយឡែកភាគីកម្ពុជាពាក់ព័ន្ធបញ្ហានេះគឺ​គណៈកម្មាធិ​ការជាតិ គ្រប់គ្រង់គ្រោះហន្ត​រាយ មិនអាច​សុំការ​​បភ្លឺ​​​បានជុំវិញព័ត៌មាននេះនៅឡើយ។​

សូមបញ្ជាក់ថា ទាក់ទិននឹងគ្រោះទឹកជំនន់កាលពីឆ្នាំ២០១១ ADB បានអនុវត្តន៍គម្រោងស្តារ​ឡើងវិញ​ជា​​បន្ទាន់ ក្រោយការខូចខាត ដោយគ្រោះទឹកជំនន់ ដែលមាន ទឹកប្រាក់ ចំនួន​៦៧,​១៨ លានដុល្លារ ក្រោម​​ហិរញ្ញប្បទាន របស់ ADB (កម្ចី៥៥លាន ដុល្លារ), រាជ រដ្ឋាភិបាល​អូស្រ្តាលី (ជំនួយឥតសំណង ៥,២៥លាន​​ដុល្លារ) និងរាជ​រដ្ឋាភិ​បាលកម្ពុជា (៦,៩៣ លាន​ដុល្លារ​) កំពុងស្តារឡើងវិញនូវ ហេដ្ឋារចនាសម្ព័ន្ធ ដែល​​ទទួល​​រងការខូចខាត ដោយសារ គ្រោះទឹកជំនន់ កាលពីឆ្នាំ២០១១ នៅក្នុងខេត្ត ដែល​ទទួលរ​ង​ការខូចខាត​​ធ្ងន់​ធ្ងរ​មួយចំនួន៕ ដោយ៖ សស្អាត​