ខេត្តបន្ទាយមានជ័យ៖ ខេត្តបន្ទាយមានជ័យ កំពុងតែប្រឈមនឹងគ្រោះទឹកជំនន់ជាលើកទី២ បន្ទាប់ពីខេត្តមួយនេះ ធ្លាប់បានរងគ្រោះទឹកជំនន់ម្តងរួចមកហើយ កាលពីចុងខែកក្កដា ឆ្នាំ២០១៣។ នៅពេលថ្មីៗនេះ ប្រជាពលរដ្ឋ៣០៤គ្រួសារសរុបចំនួន០៣ភូមិក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ និងមានការជួយជ្រោមជ្រែងពីអាជ្ញាធរមូលដ្ឋានស្រុក-ខេត្ត បានធ្វើការជម្លៀសប្រជាពលរដ្ឋទាំងនោះចេញពីលំនៅដ្ឋាន មកស្នាក់នៅទីទួលសុវត្ថិភាពជាបណ្តោះអាសន្ន ដើម្បីបញ្ចៀសពីការរងគ្រោះថ្នាក់ដល់អាយុជីវិតគ្រាដែលទឹកជំនន់ហូរធ្លាក់ពីប្រទេសថៃយ៉ាងគំហុក ឲ្យលំនៅដ្ឋានពួកគាត់ត្រូវទឹកជំនន់ជន់លិច។
បើតាមការបញ្ជាក់ឲ្យដឹងពីលោក យិន ប៊ុនរុំ ប្រធានមន្ទីរធនធានទឹកនិងឧត្តុនិយមខេត្ត បានប្រាប់ឲ្យដឹងថា៖ ទឹកជំនន់ជន់លិចលំនៅដ្ឋានប្រជាពលរដ្ឋនៅឃុំអូរបីជាន់ និងនៅសង្កាត់ប៉ោយប៉ែត គឺរងគ្រោះដោយទឹកជំនន់ហូរធ្លាក់ពីប្រទេសថៃ ចាប់តាំងពីល្ងាចថ្ងៃទី២២ ខែកញ្ញា ឆ្នាំ២០១៣ រហូតមកដល់ថ្ងៃទី២៣ ខែកញ្ញា នេះគឺគេសង្កេតឃើញ ទឹកជំនន់ហាក់បីដូចជា មានលំនឹងបន្តិចមិនមានការកើនឡើងនោះទេ។ ទឹកជំនន់នេះ ក៏នៅមិនទាន់មានផលប៉ះពាល់ដំណាំកសិកម្មប្រជាពលរដ្ឋនៅឡើយដែរ។
លោកបានបញ្ជាក់ថា៖ ទឹកជំនន់កើតឡើងនៅក្នុងខេត្តបន្ទាយមានជ័យភាគច្រើរងគ្រោះពីទឹកហូរធ្លាក់មកពីប្រទេសថៃ ចំណែកទឹកភ្លៀងនៅក្នុងស្រុកខ្មែរមិនមានការព្រួយបារម្មណ៍នោះទេ។ ហើយនៅពេលនេះប្រជាពលរដ្ឋកំពុងមានការព្រួយបារម្មណ៍ ដោយខាងភាគីថៃបានផ្តល់ដំណឹងដល់អាជ្ញាធរខេត្តបន្ទាយមានជ័យ គឺនៅក្នុងប្រទេសថៃកំពុងតែរងគ្រោះទឹកជំនន់ធ្ងន់ធ្ងរ ក្នុងនោះភាគីថៃគេនឹងបើកទ្វារទឹកហូរធ្លាក់មកប្រទេសកម្ពុជាយើងនៅថ្ងៃនេះរឺថ្ងៃស្អែក។ លោកបន្ថែមថា៖ នៅពេលនេះ មន្ទីរជំនាញនិងអាជ្ញាធរមូលដ្ឋាន បានចាត់វិធានការបើកទ្វារទឹកទំនប់ធារាសាស្ត្រសរុបជាង៥០០កន្លែងរួចហើយ ដើម្បីបង្ហូររំដោះទឹក ធ្លាក់ទៅផ្នែកខាងក្រោមឲ្យបានឆាប់រហ័ស។ មិនតែប៉ុណ្ណោះ អាជ្ញាធរខេត្ត ស្រុក ក្រុងបានត្រៀម ការ៉ុង គ្រឿងចក្រ និង មធ្យោបាយសម្ភារៈផ្សេងៗ ទៀតសម្រាប់ជម្លៀសប្រជាពលរដ្ឋទៅរក ទីទួលសុវត្ថិភាពនិងសម្រាប់ត្រៀមទប់ទល់ទៅតាមស្ថានភាពជាក់ស្តែង ដែលកើតឡើង៕ដោយៈ អភិរក្ស