ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានបង្ហាញរបាយការណ៍ប្រចាំឆ្នាំ២០១៣របស់ខ្លួនថា ការងារបង្កបង្កើនផលស្រូវរដូវប្រាំងឆ្នាំ២០១៣-២០១៤ មានល្បឿនយឺតជាងឆ្នាំមុន ដែលរហូតមកទល់ពេលនេះទើបអនុវត្តន៍បានចំនួន ១៩២.១៧០ ហិកតាស្មើនឹង៥០,៩០% នៃផែនការ ៣៨៣.៦៤០ហិកតា។ នេះបើយោងតាមរបាយការណ៍ប្រចាំឆ្នាំរបស់ ក្រសួងកសិកម្ម រុក្ខាប្រមាញ់ និងនេសាទ។
របាយការណ៍ដដែលបានវាយតម្លៃទៅលើស្ថានភាពលូតលាស់នៃដំណាំ និងការត្រៀមនានា លទ្ធផលប៉ាន់ស្មានដំណាំស្រូវរដូវប្រាំង ២០១៣-២០១៤ នឹងអាចសម្រេចបានផ្ទៃដីដាំដុះសរុប ៤៧២.៤៨៣ ហិកតាស្មើនឹង១២៣,១៦% តិចជាងឆ្នាំមុនចំនួន ២៣.១៦៥ ហិកតាក្នុងនោះផ្ទៃដីប្រមូលផលប៉ាន់ស្មានសរុបចំនួន ៤៧២.២៣២ ហិកតា ដែល នឹងមានបរិមាណផលសរុបចំនួន ២.០៨០.៤០៥ តោន ក្នុងកម្រិត ទិន្នផល ប៉ាន់ស្មានជាមធ្យម ៤,៤០៥ តោនក្នុងមួយហិកតា (ទិន្នផលឆ្នាំមុន៤,៣៤៩តោនក្នុងមួយហិកតា)។
ដោយឡែកការប្រមូលផលស្រូវរដូវវស្សាឆ្នាំ ២០១៣ សម្រេចបានលើផ្ទៃដីចំនួន ២ .៤៨៥.៥៥៩ ហិកតា លើសរដូវវស្សាឆ្នាំ ២០១២ ចំនួន ៧២៧ ហិកតា ក្នុងនោះទិន្នផលជា មធ្យមចំនួន ២,៩២១ តោនក្នុងមួយ ហិកតាលើសឆ្នាំមុនចំនួន ៤៩ គីឡូក្រាមក្នុងមួយហិកតា និងបរិមាណផលសរុបចំនួន ៧.២៥៩.៩៨៩ តោនលើសឆ្នាំមុនចំនួន ១២៣.៨៥០ តោន។
លទ្ធផលប៉ាន់ស្មានតុល្យភាពស្បៀងប្រចាំឆ្នាំ ២០១៣-២០១៤ សម្រេចបាន ៩.៣៤០.៣៩០ តោនក្នុង នោះកាត់ចេញ ១៣% សម្រាប់ទុកពូជ ចំណីសត្វ និងបាត់បង់ដោយ ការប្រមូលផល ១.២១៤.២៥១ តោន ស្រូវ នៅសល់ជាស្បៀង ៨.១២៦.១៤០ តោន សរុប បរិមាណស្រូវគិតជាអង្ករ ៦៤% ស្មើ ៥.២០០.៧២៩ តោន តម្រូវការអង្ករជាស្បៀងសម្រាប់ប្រជាជនចំនួន ១៤.៩៥០.១៩៦ នាក់ ២.១៣៧.៨៧៨ តោន អតិរេកអង្ករសម្រាប់បម្រើឲ្យ គោលដៅនាំចេញ ៣.០៦២.៨៥១តោន អតិរេកស្រូវ ៤.៧៨៥.៧០៥តោន។
គួរកត់សម្គាល់ថា រាជជ្ឋាភិបាលកម្ពុជាបានកំណត់យកឆ្នាំ ២០១៥ ជាឆ្នាំគោល ដើម្បី ជំរុញការផលិត ស្រូវឲ្យបានច្រើនជាង ៤ លានតោន និងគិតជាបរិមាណអង្ករសម្រាប់នាំចេញជាផ្លូវការត្រូវសម្រេច ឲ្យបាន យ៉ាងតិច ១ លានតោន ។ បើពិនិត្យលើអតិរេកស្រូវសម្រេចបាន ក្នុងឆ្នាំ ២០១៣ មានរហូតដល់ជាង ៤,៧៨ លានតោនគឺលើសផែនការកំណត់ ដែលនេះជា ជោគជ័យមួយគួរជាទីមោទនៈបំផុតសម្រាប់ កម្ពុជាក្នុងការ ជំរុញផលិតកម្មដំណាំស្រូវ ។ ដោយ ឡែកក្នុងឆ្នាំ ២០១៣ បរិមាណនាំចេញអង្ករបានកើនដល់ចំនួន ៣៧៨.៨៥៦ តោន ដែលក្នុងឆ្នាំ ២០១២ មានតែ ២០៥.៧១៧ តោនប៉ុណ្ណោះ ( មានកំណើន១៧៣.១៣៩តោនឬ៨៤,១% ) ដោយបាននាំចេញទៅកាន់ទិសដៅចំនួន ៦៦ ប្រទេស៕ដោយៈ ភីនរ៉ា