ភ្នំពេញ៖អង្គសមាជវិសមញ្ញរបស់គណបក្ស ហ៊្វុន ស៊ិនប៉ិច នៅថ្ងៃស្អែកនេះនឹងមានសមាជិក​ចូលរួមចំនួន
៤០០០នាក់ មកពីគ្រប់ខេត្ត-ក្រុង ក្នុងនោះសមាជិកនៃអង្គសមាជនឹងលើកដៃ​គាំទ្រ​សម្តេចព្រះអនុជនរោត្តម អារុណរស្មី ជាបុត្រីពៅរបស់ព្រះមហាវីរៈក្សត្រ សម្តេចព្រះ នរោត្តម សីហនុ ធ្វើជាប្រធានគណបក្ស ដើម្បីបន្ត
កេរ្តិ៍មរតករបស់ព្រះបិតា ។
លោកឧបនាយករដ្ឋមន្រ្តី ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច ថ្លែងប្រាប់អ្នក សារព័ត៌មាននៅ
គេហដ្ឋានរបស់លោកនារសៀលថ្ងៃទី២២ ខែមីនា ឆ្នាំ២០១៣នេះថា សមាជ​វិសាមញ្ញរបស់គណបក្សនឹង
ប្រព្រឹត្តឡើងនៅថ្ងៃទី២៣ ខែមីនា នឹងកែទម្រង់លក្ខន្តិកៈ​បក្ស​មួយចំនួន ហើយនឹងលើក សម្តេចព្រះអនុជ
នរោត្តម អារុណរស្មីជាប្រធានបក្សមិនតែ​ប៉ុណ្ណោះ អង្គសមាជក៏នឹងថ្លែងអំពីកិច្ចសហប្រតិបត្តិការរវាងគណ
បក្ស ហ៊្វុនស៊ិនប៉ិច និងគណបក្សប្រជាជនកម្ពុជាដែលជាដៃគូរក្នុងជួរាជរដ្ឋាភិបាល ផងដែរ។
លោកឧបនាយករដ្ឋមន្រ្តី ញឹក ប៊ុនឆៃ បានបន្តថា យើងចង់បាន សម្តេចព្រះអនុជនរោត្តម អារុណរស្មី ធ្វើជា
ប្រធាន ព្រោះព្រះអង្គជា រាជបុត្រីពៅ របស់សម្តេចឪ សម្តេចតា ហើយគណ​បក្ស​ហ៊្វុនស៊ិនប៉ិច សម្តេចព្រះ
នរោត្តម សីហនុជាអ្នកបង្កើតឡើង កាលថ្ងៃទី២១ មីនា ឆ្នាំ​១៩៨១នឹងបានប្រម៉ែប្រមូលពីចលនាអ្នកស្នេហា
ជាតិទាំងអស់ដែលស្រលាញ់របប​រាជា​និយមរួបរួមគ្នា។ ធ្វើដូច្នេះយើងចង់បង្ហាញឲ្យសាធារណជនមើលឃើញថា សម្តេចរាជបុត្រី ព្រះអនុជនរោត្តម អារុណរស្មី ដើម្បីមកដឹកនាំដោយទទូលខុសត្រូវគណបក្សនេះ ដែលជាកេរ្តិ៍ ដំណែលរបស់ព្រះបិតា សម្តេចឱសម្តេចតា សម្តេចតាទួតនៃយើង។
ជាមួយគ្នានេះ លោកឧបនាយករដ្ឋមន្រ្តី ញឹក ប៊ុនឆៃ ក៏បានលើកឡើងទៀតថា គណបក្ស​ហ៊្វុនស៊ិនប៉ិច មានគោលនយោបាយលើកកម្ពស់ស្ត្រីជាអ្នកដឹកនាំឲ្យ បានច្រើនជាងបក្សដទៃ ដូច្នេះការយាងសម្តេច អារុណរស្មី មកធ្វើជាប្រធាននេះក៏ចង់បញ្ជាក់ថា គណបក្សហ៊្វុនស៊ិនប៉ិច ពិតជាបានផ្តល់តម្លៃយ៉ាងពិត
ប្រាកដដល់ស្ត្រីធ្វើជាអ្នកដឹកនាំដូចបណ្តាប្រទេសនៅលើពិភពលោកទាំងមូលដែរ។
លោកឧបនាយករដ្ឋមន្រ្តីបញ្ជាក់ថា បន្ទាប់ពីសម្តេច អារុណរស្មី ធ្វើជាប្រធានដឹកនាំ​គណបក្សហើយនោះ គណបក្សនេះនឹងមិនមានគម្រោងជ្រើសរើសបក្សទេ ប៉ុន្តែនឹង មានត្រឹមតែព្រឹទ្ធបុរស និង អគ្គលេខា
ធិការបក្សតែប៉ុណ្ណោះ។
លោកបានរំលឹកថា កាលពីពេលកន្លងទៅថ្មីៗនេះ សម្តេចនាយករដ្ឋមន្រ្តី ហ៊ុន សែន បាន​ប្រកាស​ជាសាធា
រណៈថា គណបក្សប្រជាជននៅតែជ្រើសរើសគណបក្ស​រាជានិយម​ហ៊្វុនស៊ិនប៉ិច ជាដៃគួររដ្ឋាភិបាលចម្រុះក្នុង
រាជរដ្ឋាភិបាលដដែល​បើទោះបីណាគណបក្សមួយ​នេះនៅសល់តែមួយកៅអីក្នុងរដ្ឋសភាក៏ដោយ។
យ៉ាងណាក៏ដោយ លោកញឹក ប៊ុនឆៃ រំពឹងថា គណបក្សហ៊្វុនស៊ិនប៉ិចក្រោយពីច្របាច់បញ្ចូល​គ្នា​នឹងទទូលបាន
ការគាំទ្រ​ច្រើន ម៉្យាងពេលនេះយើងមានលក្ខន្តិកៈ និងគោល នយោបាយ​ដែល​មាន​លក្ខណៈបង្រួបបង្រួមជាតិ និងស្រលាញ់របបរាជានិយមនិងប្រជាជនពិតប្រាកដ៕

ដោយ៖ ស.ស្អាត