ភ្នំពេញ៖ នៅព្រឹកមិញ សម្តេចនាយករដ្ឋមន្ត្រី ហ៊ុន សែន បានថ្លែងទៅកាន់ក្រុមអ្នកកាសែតថា គណបក្សប្រជាជនកម្ពុជា នៅតែរក្សាគោលជំហរចរចាជាមួយគណបក្សសង្គ្រោះជាតិ និងព្រមព្រៀងផ្តល់តំណែងជាអនុប្រធានរដ្ឋសភា១ ប្រធានគណៈកម្មការ៤ និងអនុប្រធានគណៈកម្មការ៥ ដល់គណបក្សសង្គ្រោះជាតិ។ឮសម្តេចតេជោ ហ៊ុន សែន នាយករដ្ឋមន្ត្រី បានបង្ហើបថា គណបក្សប្រជាជនកម្ពុជាដែលឈ្នះឆ្នោតយល់ព្រមផ្តល់តំណែងជាអនុប្រធានរដ្ឋសភា១ ប្រធានគណៈកម្មការ ៤ និងអនុប្រធានគណៈកម្មការ ៥ ដល់គណបក្សសង្គ្រោះជាតិ នៅក្នុងរដ្ឋសភា។ប៉ុន្តែត្រូវឆ្លងកាត់ការបោះឆ្នោតនៅរដ្ឋសភាសិន សម្តេចមិនហ៊ានធានាថា សមាជិកសភាទាំងអស់របស់គណបក្សប្រជាជនកម្ពុជាសម្រេចបែបណានោះទេ។
សម្តេចនាយករដ្ឋមន្រ្តីបញ្ជាក់ថា មុននឹងឈានដល់ការចរចាណាមួយ ទាល់តែសមាជិកសភាគណបក្សសង្គ្រោះជាតិ ចូលស្បថក្នុងព្រះបរមរាជវាំងជាមុនសិន។ ហើយសមាជិកសភារបស់គណបក្សសង្គ្រោះជាតិ មានត្រឹមតែ៥៥រូបទេ មិនមែន៦៣រូប ដូចគណបក្សប្រឆាំង បានប្រកាសនោះឡើយ។សម្តេចនាយករដ្ឋមន្ត្រីបានប្រកាសថា ការជាប់គាំងមិនអាចបន្តកិច្ចចរចារវាងគណបក្សប្រជាជនកម្ពុជានិងគណបក្សសង្គ្រោះជាតិកន្លងមក ដោយសារតែគណបក្សសង្គ្រោះជាតិ ទាមទារយកតំណែងប្រធានរដ្ឋសភា។ ប៉ុន្តែគណបក្សប្រជាជនកម្ពុជាមិនអាចឲ្យគណបក្សដែលមានសំឡេងភាគតិចក្នុងរដ្ឋសភាកាន់កាប់ជាប្រធានរដ្ឋសភាបានទេ។សម្តេចព្រមានដល់គណបក្សសង្គ្រោះជាតិ កុំឲ្យប្រព្រឹត្តហួសពីច្បាប់ ដែលឈានទៅប្រកាសជ័យជម្នះ នៅរដ្ឋសភារហូតដល់៦៣រូបឬក៏អាចឈានទៅបង្កើតរដ្ឋាភិបាលថ្មីមួយទៀតជាដើមនោះ៕
ដោយ៖ ស.ស្អាត