ភ្នំពេញ៖ អង្គការក្រៅរដ្ឋាភិបាលជាតិនិងអន្តរជាតិចំនួន៩ដែលបម្រើការក្នុងប្រទេសកម្ពុជា ទទួលបាននូវ​វិញ្ញា​​បន​​​​​បត្រ​​​​ស្តីពីអភិបាលកិច្ចល្អ និងការអនុវត្តប្រកបដោយវិជ្ជាជីវៈ ពីគណៈកម្មាធិការ​អនុម័ត​​​ការអនុវត្តក្រម​នៃអង្គ​​ការមិនមែនរដ្ឋាភិបាល ហៅកាត់ថា NCCC។ ថ្លែងក្នុងពិធីបិទកម្មវិធីប្រគល់វិញ្ញាបនបត្រអភិបាលកិច្ចល្អ និងការ​​អនុវត្តប្រក​បដោយវិជ្ជាជីវៈដល់អង្គការក្រៅរដ្ឋាភិបាលកាលពីថ្ងៃទី២៧ខែកញ្ញា ឯកឧត្តម យី វា​ស​​នា អគ្គលេខា​​ធិការគណៈកម្មាធិការជាតិប៉ារ៉ាឡាំកម្ពុជានិងជានាយកប្រតិបត្តិនៃមជ្ឈម​ណ្ឌលជាតិនៃជនពិការ បានមាន​​ប្រសាសន៍​ថា ការលើកកម្ពស់ គណនេយ្យភាព និងអភិបាលកិច្ចល្អ និ​ង​​កា​រប្រតិបត្តិប្រកបដោយវិជ្ជាជីវៈ​​គឺជា​​ផ្នែក​មួយដ៏សំខាន់នៅក្នុងគោលនយោបាយរ​បស់រដ្ឋាភិបាល។ លោកបន្តថា ការរីកចម្រើនទាំងអស់​នៅក្នុង​​សង្គម​​គឺអាស្រ័យលើ គណនេយ្យភាព និងអភិបាលកិច្ចល្អ ទាំងនៅក្នុងស្ថាប័នរដ្ឋាភិបាល​និងអង្គការ​ក្រៅរដ្ឋា​ភិ​​បាល។ជាមួយគ្នានេះដែរ លោក សឿង សារឿន នាយកប្រតិ​បត្តិអង្គការគណៈ​កម្មាធិការសហប្រតិបត្តិការដើម្បី​​កម្ពុជា បាន​​​ប្រាប់អ្នកសារព័ត៌មានថា ការទទួ​ល​បានវិញ្ញា​បនបត្រនេះ វាគឺជារឿងមោទនៈភាពបំផុតចំពោះ​​បណ្តា​​អង្គការ​ទាំង​នោះ​ ព្រោះ​​ថា ការទទួ​​​លបាននូវវិញ្ញាបនបត្រនេះ លុះត្រាតែបណ្តាអង្គការទាំងនោះ​បានឆ្លង​​កា​ត់​​នូវការ​វាយតម្លៃដ៏ស៊ីជម្រៅ និងគ្រប់ជ្រុងជ្រោយទៅលើការប្រតិបត្តិរបស់អង្គការទាំងនោះ។​

លោក ឈិត សំអាត នាយកប្រតិបត្តិអង្គការវេទិកានៃអង្គការមិនមែនរដ្ឋាភិបាលស្តី​ពីកម្ពុជាដែលជា​អង្គការ​មួយ​​ទទួលបានវិញ្ញាបនបត្រជាលើកទី២នោះបានមានប្រសាស​ន៍ថា អង្គការក្រៅរដ្ឋាភិបាលអាចលើកពីចំណុច​​អវិជ្ជមាន​របស់រដ្ឋាភិបាលបាន លុះត្រាតែអង្គការខ្លួនឯងនោះ មានភាពស្អាតស្អំពីខ្លួនឯងសិន។ លោកថា ចំពោះ​​​​​​អង្គការNGO Forum របស់លោកទទួលបានវិញ្ញាបនបត្រជាលើកទីពីរនេះ ដោយសារមានយ​ន្តការ​ដើម្បី​អោយ​​មាន​តម្លាភាពតាំងពីមុនការបង្កើតអោយមានវិញ្ញាបនបត្រនេះមកម្លេះ។​

គួរបញ្ជាក់ថា អង្គការចំនួន៩ ដែលត្រូវទទួលបានវិញ្ញាបនបត្រនោះ រួមមាន៖ អង្គការសកម្មភាព​ព្រះពុទ្ធ​​សាសនា​​​​ដើម្បី​អភិវឌ្ឍសង្គម អង្គការកម្ពុជាអប់រំ និងថែទាំជំងឺអេដស៍​ អង្គការសម្ព័ន្ធសកម្មភាព ដើម្បី​កសាងជន​​បទឡើងវិញ អង្គការ វី អេស អូ ប្រចាំប្រទេសកម្ពុជា អង្គការភូមិខ្ញុំ អង្គការអាស៊ានអៅរីជបំរើកម្ពុជា អង្គការមូល​​និធិ​សិទ្ធិកុមារ  អង្គការទ្រទ្រង់កសិករជនបទ និងអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា៕​

ដោយ៖ រតនា