ភ្នំពេញ៖ សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានៃព្រះរាជាណាចក្រកម្ពុជា និងក្រុមគ្រួសារ នៅព្រឹកថ្ងៃទី១រោជខែភទ្របទ ត្រូវនឹងថ្ងៃទី២០ ខែកញ្ញា ឆ្នាំ២០១៣នេះបាននិមន្តសម្តេចព្រះសង្ឃរាជទាំងពីរគណៈនិងព្រះសង្ឃចំនួន៨២អង្គ រៀបចំពិធីកាន់បិណ្ឌវេនសូត្រមន្តដាឆ្លងបង្សុកូលឧទ្ទិសកុសលផលបុណ្យទៅតាមទំនៀមទំលាប់ព្រះពុទ្ធសាសនា នៅភូមិគ្រឹះចំការមន ។
ពិធីនេះក៏មានការអញ្ញើញចូលរួមពីថ្នាក់ដឹកនាំ មន្ត្រីរាជការ បុគ្គិលនៃអគ្គលេខាធិការដ្ឋានព្រឹទ្ធសភា ព្រមទាំងញាតិមិត្ត ឧបាសក ឧបាសិការជិតឆ្ងាយជាច្រើននាក់ទៀត។បន្ទាប់ពីសួត្រមន្តនមស្សកាថ្វាយព្រះរតនត្រៃយ៍តាមទំនៀមទំលាប់រួចមក សម្តេច ព្រមទាំងបុត្រា បុត្រី និងក្រុមគ្រួសារ បានអញ្ជើញនាំយកចង្ហាន់ និងទេយ្យទាន មាន បាយសម្លរ នំចំណី មី ផ្លែឈើ ទឹកដោះគោ ត្រីខ ស្ករស ទឹកក្រូច ទឹកបរិសុទ្ធ ព្រមទាំងបច្ច័យ២.០០០,០០០រៀល លាងផាប៉ាន់១លាង អង្ករ ១០០គីឡូក្រាម ដាក់បាត និងប្រគេនព្រះសង្ឃដើម្បីឧទ្ទិសមហាកុសលជូនដល់បុព្វការីជនញ្ញាតិការទាំង៧សណ្តានដែលបានរំលាយក្ខ័ន្ធទៅកាន់លោកខាងមុខថ្ងៃនេះអញ្ជើញមកទទួលមហាកុសលពីសម្តេច ព្រមទាំងបុត្រា បុត្រី ក្រុមគ្រួសាររបស់លោក។និងបានអញ្ជើញទៅសោយសុខក្នុងគតិភពកុំបីឃ្លាងឃ្លាតឡើយ ព្រមទាំងឲ្យបានសមប្រកបដោយសេចក្តីសុខសប្បាយ និងរីកចម្រើនត្រជាក់ត្រជុំកើតមានដល់កូនចៅដែលរស់នៅ៕ដោយ៖ សស្អាត
