ភ្នំពេញ៖នៅឆ្នាំ២០១៣ ការនាំចេញអង្ករសរីរាង្គរបស់ប្រជាកសិករកម្ពុជា ទៅកាន់សហរដ្ឋអាមេរិក មានចំនួន២៤០តោន ដែលនៅក្នុងនោះមានពាក់កណ្តាលជាអង្ករសម្រូប និងពាក់កណ្តាលទៀតជា អង្ករសម្រិត។លោក យ៉ង សាំងកុមារ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (CEDAC)បានឲ្យដឹងនៅព្រឹកថ្ងៃសុក្រ ទី២០ កញ្ញា នាទីស្នាក់ការCEDACថា នៅឆ្នាំ២០១៣ អង្ករសរីរាង្គ ដែលកម្ពុជា បាននាំចេញទៅកាន់ប្រទេសអាមេរិក តាមរយៈអង្គការCEDACមានចំនួន១២កុងទីន័រ (មួយកុងទីន័រមានទម្ងន់២០តោន) ដែលក្នុងមួយតោនមានតម្លៃជាង១ពាន់ដុល្លារ។
លោក បានបន្តទៀតថា ទីផ្សារនាំចេញអង្ករសរីរាង្គ ដែលធំជាងគេរបស់កម្ពុជា គឺសហរដ្ឋអាមេរិក ហើយទីផ្សារអឺរ៉ុប ទើបតែធ្វើការនាំចេញ កាលពីឆ្នាំទៅ ចំពោះការផ្គត់ផ្គងវិញ អង្ករសរីរាង្គ មិនទាន់មានការផ្គត់ផ្គង់តាមតម្រូវការ របស់អ្នកបញ្ជាទិញនោះទេ។លោក បានបន្ថែមទៀតថា នៅឆ្នាំ២០២២ ក្រុមការងារCEDACនឹងពង្រីកសមាជិកឲ្យបានចំនួនជាង១សែនគ្រួសារ និងចងក្រងជាសហគមន៍តូចៗ នៅតាមភូមិនីមួយៗ ដោយបំពាក់ម៉ាស៊ីនកិនស្រូវតូចៗផងដែរ។ចំពោះការនាំចេញអង្ករសរីរាង្គនេះ លោក នឹងជំរុញប្រជាកសិករសកម្ម ជាសមាជិកចំនួនជាង១ពាន់គ្រួសារ និងបន្តជំរុញប្រជាកសិករដទៃទៀត ឲ្យខិតខំបង្កើនទិន្នផលស្រូវប្រភេទនេះ ឲ្យបានច្រើនតាមដែលអាចធ្វើទៅបាន និងបានកំណត់ទំហំ នៃការនាំចេញនៅឆ្នាំក្រោយ (ឆ្នាំ២០១៤) ឲ្យបានជាង១ម៉ឺនតោន ក្នុងមួយឆ្នាំ ដើម្បីកាត់បន្ថយភាពក្រីក្រ។គួរបញ្ជាក់ថា ការធ្វើស្រូវតាមបែប ស្រូវសរីរាង្គបង្កើតឡើងនៅឆ្នាំ២០០៤ និងមានសជិកសកម្មមានជាង១ពាន់គ្រួសារ នៅតាមបណ្តាលខេត្តកំពង់ឆ្នាំង កំពង់ស្ពឺ តាកែវ កំពត់ ព្រៃវែង និងកំពង់ចាម និងខេត្តដទៃទៀត៕
ដោយៈ គង់ រតនា