ភ្នំពេញ៖កិច្ចប្រជុំកំពូលរវាងគណបក្សប្រជាជនកម្ពុជានិងគណបក្សសង្គ្រោះជាតិជិត៥ម៉ោងបានបញ្ចប់កាលពីម៉ោងប្រមាណ១និង៣០នាទីដោយព្រមព្រៀងគ្នាចំនួន៣ចំណុច។ បន្ទាប់ពីកិច្ចប្រជុំគណបក្សទាំងពីរបានចេញសេចក្តីប្រកាសរួមគ្នាមួយ ដែលសេចក្តីប្រកាសរួមនៃលទ្ធផលកិច្ចប្រជុំត្រូវបានប្រកាសដោយលោកប្រាក់សុខុនតំណាងគណបក្សប្រជាជនកម្ពុជានិងលោកយឹមសុវណ្ណតំណាងគណបក្សសង្គ្រោះជាតិក្នុងសន្និសីទកាសែតនៅរដ្ឋសភានាម៉ោងជិត២រសៀលនេះ។
.jpg)
សេចក្តីប្រកាសរួមនៃកិច្ចប្រជុំកំពូលរបស់គណបក្សប្រជាជនកម្ពុជាដឹកនាំដោយសម្តេចហ៊ុនសែននិងគណបក្សសង្គ្រោះជាតិដឹកនាំដោយលោកសមរង្ស៊ីបានលើកឡើងថាកិច្ចប្រជុំរកដំណោះស្រាយលើបញ្ហាប្រទេសជាតិនាព្រឹកថ្ងៃទី១៦ខែកញ្ញាឆ្នាំ២០១៣ស្របតាមព្រះរាជតំរិះរបស់ព្រះមហាក្សត្រកាលពីថ្ងៃទី១៤ខែកញ្ញាឆ្នាំ២០១៣។ចំណុចទាំងបីដែលបានឯកភាពគ្នាមាន៖
១- ភាគីទាំងពីរឯកភាពគ្នាគោរពនិងអនុវត្តដោយហ្មត់ចត់តាមព្រះរាជសាររបស់ព្រះមហាក្សត្រកាលថ្ងៃទី១៦ខែកញ្ញាឆ្នាំ២០១៣ដែលព្រះអង្គអំពាវនាវចំពោះជនរួមជាតិទាំងមូលដែលជាក្រុមបាតុករនិងក្រុមសមត្ថកិច្ចសូមបញ្ឈប់ការប្រើអំពើហិង្សាតាមរូបភាពណាក៏ដោយដូចជាការគប់ដុំថ្មនិងការប្រើប្រាស់អាវុធដែលបណ្តាលអោយបងប្អូនទាំងអស់គ្នាទទួលរងរបួសឬបាត់បង់ជីវិតនិងបណ្តាលឲ្យមានគ្រោះថ្នាក់ធ្ងន់ធ្ងរដល់សង្គមជាតិទាំងមូលហើយងាកមកប្រកាន់យកប្រពៃណីអហិង្សាខិតខំយោគយល់គ្នារាប់អានគ្នាជាខ្មែរដូចគ្នានិងអត់ធ្មត់ជាអតិបរមាដើម្បីបញ្ជៀសអស្ថិរភាពនៃជាតិយើងព្រមទាំងរក្សាភាពថ្លៃថ្នូរនិងភាពស្ងាត់ស្ងៀមដើម្បីទុកឱកាសរកដំណោះស្រាយបញ្ហាជាតិយើងទាំងអស់គ្នា។
២-ភាគីទាំងពីរព្រមព្រៀងគ្នានឹងបង្កើតយន្តការមួយដើម្បីកែទម្រង់ការបោះឆ្នោតនាពេលខាងមុខ។
៣-ភាគីទាំងពីរនឹងបន្តជួបចរចាគ្នាតទៅទៀតតាមគ្រប់កម្រិតដើម្បីដោះស្រាយបញ្ហារបស់ជាតិ។
សេចក្តីប្រកាសរួមពីលទ្ធផលនៃកិច្ចប្រជុំកំពូលរវាងគណបក្សប្រជាជនកម្ពុជានិងគណបក្សសង្គ្រោះជាតិត្រូវបានចុះហត្ថលេខាដោយសម្តេចហ៊ុនសែនលោកសខេងលោកសាយឈុំនៅខាងគណបក្សប្រជាជនកម្ពុជានិងខាងគណបក្សសង្គ្រោះជាតិចុះហត្ថលេខាដោយលោកសមរង្ស៊ីលោកកឹមសុខានិងលោកប៉ុលហំម៕ដោយ៖ ស.ស្អាត