ភ្នំពេញៈ ប្រជាពលរដ្ឋដែលរស់នៅ និងធ្វើដំណើរ តាមបណ្តាយផ្លូវសូឡា ឬផ្លូវ២០០៤បានអំពាវនាវដល់អ្នកគ្រប់គ្រងសាងសង់ផ្លូវឯកជន និងអាជ្ញាធរពាក់ព័ន្ធមេត្តាពន្លឿននៃការជួសជុល ព្រោះផ្លូវមួយនេះ មានសភាពហុយជាខ្លាំង ជាហេតុបណ្តាលឱ្យផលប៉ះពាល់បរិស្ថានជុំវិញ ឬជាការបង្កឱ្យមាន គ្រោះថ្នាក់ចរាចរណ៍គ្រប់វិនាទី។
ប្រសិនបើលោកអ្នកបានធ្វើដំណើរនៅលើផ្លូវ២០០៤ ឬហៅថាផ្លូវសូឡា ដែលផ្លូវមួយនេះ គឺជាផ្លូវដែលតម្រូវឲ្យរថយន្តគ្រប់ប្រភេទដែលធ្វើដំណើរឆ្លងកាត់ត្រូវបង់ថវិកាព្រោះជាផ្លូវដែលគ្រប់គ្រង ដោយឯកជននោះ លោកអ្នកនឹងជួបប្រទះនូវការលំបាកក្នុងការធ្វើដំណើរ ដោយសារផ្លូវមួយនេះនៅពេលដែលមានភ្លៀងគឺមានការជន់លិចយ៉ាងខ្លាំង ព្រោះប្រព័ន្ធលូបង្ហូរទឹកមានតិចនិងតូចៗ។
នៅពេលរាំងភ្លៀងបែរជាមានដីហុយយ៉ាងខ្លាំង ជាពិសេសមានជង្ហុកជាច្រើនកន្លែងទៀតផង ធ្វើឲ្យប្រជាពលរដ្ឋ ដែលធ្វើដំណើរឆ្លងកាត់ផ្លូវមួយនេះ បានសម្តែងការរិះគន់យ៉ាងខ្លាំង ទោះបីជាផ្លូវមួយ នេះមានការជួសជុលកែសម្រួលបានខ្លះហើយក្តី ក៏ប៉ុន្តែខណៈពេលនេះបញ្ហាប្រឈម គឺផ្លួវខាងលើនេះមាន សភាពហុយជាខ្លាំង។
លោក លី វណ្ណា ដែលជាសន្តិសុខយាមនៅខាងមុខរោងចក្រមួយកន្លែងនៅតាមបណ្តោយផ្លូវ២០០៤ ឬហៅថាផ្លូវសូឡាបានឲ្យដឹងថា កន្លងមកផ្លូវនេះ មានជង្ហុកច្រើន ហើយធ្វើឲ្យអ្នកធ្វើដំណើរជួបគ្រោះថ្នាក់ជាញឹកញាប់ ប៉ុន្តែនាពេលនេះ ឃើញមានការជួសជុលឈូសឆាយខ្លះដែលជាហេតុធ្វើហុយ ហើយការជួសជុលនេះ ហាក់ដូចជាមិនធ្វើឲ្យបានឆាប់រហ័សសោះ លោកបានសំណូមពរឲ្យអាជ្ញាធរមូលដ្ឋាន អ្នកគ្រប់គ្រងផ្លូវ ជាពិសេសមន្ត្រីពាក់ព័ន្ធមេត្តាចុះទៅពិនិត្យមើល និងជួយរៀបចំសណ្តាប់ធ្នាប់ផង។
ប្រាប់អ្នកសារព័ត៌មានយើងស្រដៀងនឹងលោក វណ្ណាដែរ លោក ហ៊ាង ជាអ្នកប្រកបមុខរបរលក់ភេសជ្ជៈ និងម្ហូបបាយ បានឲ្យដឹងថា កន្លងមក លោកឃើញមានរថយន្តចុះមកស្រោចទឹកកុំឲ្យហុយដែរតែ មិនមានប្រសិទ្ធភាពសោះ។ លោកបានបញ្ជាក់ថាការហុយដីនេះពិតជាធ្វើ ឲ្យខូចសុខភាពណាស់ ជាពិសេសក៏ប៉ះពាល់ដល់ការលក់ដូររបស់គាត់ដែរ។
ជុំវិញបញ្ហាខាងលើនេះ អ្នកសារព័ត៌មានយើងបានទាក់ទងទៅកាន់លោក សាំ ពិសិទ្ធ ប្រធានមន្ទីរសាធារណរាជធានីដើម្បីចង់ដឹងថា តើនឹងមានវិធានការយ៉ាងណា ដើម្បីជួយសម្រួលអំពីបញ្ហាប្រជាពលរដ្ឋរិះគន់ដោយលោក សាំ ពិសិទ្ធ បានឲ្យដឹងថា ផ្លូវ២០០៤ មានគម្រោងបើកសម្ពោធការដ្ឋាននាពេលខាងមុខនេះហើយ ក៏ប៉ុន្តែមិនទាន់ដឹងថា ពេលណាទេ រីឯបញ្ហាដីហុយវិញចាំលោកទាក់ទងឲ្យអ្នកពាក់ព័ន្ធចុះទៅស្រោចទឹកកុំឲ្យហុយ។ ដោយ៖ ភីនរ៉ា
គួរសម្រាបថា ការសំណូមពរពីសំណាក់ប្រជាពលរដ្ឋឲ្យមន្រ្តីពាក់ព័ន្ធជួយកែសម្រួល និងជួសជុលផ្លូវដែលកំពុងរងការខូចខាតនេះ គឺដើម្បីជួយទប់ស្កាត់ការខូចសុខភាពរបស់ប្រជាពលរដ្ឋដោយសារដីហុយ ជាពិសេសក៏ដើម្បីចូលរួមការបន្ថយគ្រោះថ្នាក់ចរាចរណ៍ផងដែរ។
ដោយ៖ ភីនរ៉ា