ភ្នំពេញ៖អង្គការ​សង្គម​ស៊ីវិលបានជំរុញឱ្យរាជរដ្ឋាភិបាល​តម្លើងថ្លៃ​ពន្ធ​លើ​ផលិត​ផល​ថ្នាំ​ជក់ ដោយ​ពួកគេ​យល់ថា ជាការជួយ​កាត់​បន្ថយ និងជួយទប់ស្កាត់​​ការ​ប្រើ​ប្រាស់​ថ្នាំ​ជក់ ជា​ពិសេស​ក្នុង​ចំណោម​យុវជន​និង​កុមារតែម្តង។ ការរីករាលដាលនៃគ្រោះមហន្តរាយដែលបណ្តាលមកពីការប្រើប្រាស់​ថ្នាំជក់​មាន​ប្រទេស ចំនួន១៧៧ក្នុងនោះមានទាំងកម្ពុជាផង បានផ្តល់សច្ចាប័ននិងក្លាយជាសមាជិកនៃអនុសញ្ញា ស្តីពី​ការត្រួត ពិនិត្យ ថ្នាំជក់ ដែលមានចែងពីវិធានការដ៏មានប្រសិទ្ធភាបក្នុងការកាត់បន្ថយការប្រើប្រាស់​ថ្នាំជក់។

លោកវេជ្ជបណ្ឌិត  Ulysses Dorotheoនាយកសម្ព័ន្ធត្រួតពិនិត្យថ្នាំជក់អាស៊ីអគ្នេយ៍ថ្លែងយ៉ាងដូច្នេះ​ក្នុង​សន្និសីទសារព័ត៌មានមួយកាលពីព្រឹកថ្ងៃទី០៣ខែកញ្ញានេះនៅសណ្ឋាគារសាន់វ៉េ ក្នុងរាជធានីភ្នំពេញ​ដែល​មានការចូលរួមពីយុវជនប្រមាណ១០០នាក់ មកពីសាកលវិទ្យាល័យ អង្គការយុវជននិងកាកបាទ​ក្រ​ហម​កម្ពុជាសម្រាប់យុវជនស្តីពី ពន្ធលើផលិតផលថ្នាំជក់ សហការរៀបចំដោយអង្គការ​សម្ព័ន្ធ​ត្រួត ​ពិ​និត្យ​ថ្នាំជក់អាស៊ីអគេ្នយ៍អង្គការ​ចលនា ​ដើម្បី​សុខភាព​កម្ពុជានិង​អង្គការ​សុខភាព​​ពិភព​លោកប្រចាំកម្ពុជា ។

វេជ្ជបណ្ឌិតរូបនេះ បានអះអាងថា ការតម្លើងពន្ធលើផលិតផលថ្នាំជក់មិននាំឲ្យប៉ះ​ពាល់​ដល់កំណើន​​សេដ្ឋកិច្ច​ឡើយ ផ្ទុយទៅវិញវាមានប្រសិទ្ធភាពជួយការពារកុមារ យុវជន និងប្រជាពល​រដ្ឋ​ក្រីក្រពីការ​ចាប់​ផ្តើមជក់បារី ក៏ដូចជាលើកទឹកចិត្ត​ឲ្យអ្នកដែលជក់បារីស្រាប់លះបង់​ការ​ជក់​​បារី ព្រមទាំងជួយ​បង្កើនថវិកា​ជាតិ តាមរយៈ ចំណូលពន្ធដែលកើនឡើងទៀតផង។

        លោកបន្តទៀតថា ថ្នាំជក់ជាផលិតផលតែមួយគត់ ដែលបណ្តាលឲ្យពាក់កណ្តាលនៃអ្នកប្រើប្រាស់​ផលិត​ផល​នេះស្លាប់ ព្រោះវាបង្កឲ្យកើតជំងឺធ្ងន់ធ្ងររាប់ពាន់មុខមានដូចជា៖ ជំងឺ​មហារីក​ សួត​ជំងឺ​ដាច់សរសៃ ឈាមខួរក្បាល និងជំងឺដាច់សរសៃឈាមបេះដូងជាដើម។

        លោកស្រី Bungon​ Ritthiphakdee នាយិការសហព័ន្ធត្រួតពិនិត្យថ្នាំជកអាស៊ីអាគ្នេយ៍​បានលើកឡើង​ពីហេតុផលមួយចំនួនក្រៅពីការផ្សាយពាណិជ្ជកម្ម និងការផ្សព្វផ្សាយលក់​ផលិត​ផល​ថ្នាំ​ជក់ថា ក្រុមហ៊ុន​ថ្នាំជក់បានប្រើ​យុទ្ធសាស្ត្រជាច្រើនពី​ការ​លក់​ផលិតផល​ថ្នាំ​ជក់​របស់ខ្លួនក្នុង​​ត​ម្លៃ​ថោកបំផុត នាំឲ្យមនុស្ស​ពេញវ័យកម្ពុជា ២ លាននាក់ក្លាយ​ជា​អ្នក​ប្រើ​ប្រាស់​ផលិត​​ផល​​ថ្នាំ​ជក់​នេះ។

        លោកវេជ្ជបណ្ឌិត យ៉ិន ដារ៉ាវុធ តំណាងអង្គការសុខភាពពិភពលោកប្រចាំនៅកម្ពុជាបានថ្លែងប្រាប់ ក្រុមអ្នកសារព័ត៌មានថា នៅកម្ពុជាប្រជាពលរដ្ឋដែលមានចំណូលតិចជាង ឬ ស្មើ ២ដុល្លារ ក្នុងមួយថ្ងៃ បាន​ចំណាយលុយអស់ជាង៤១លានដុល្លារលើការទិញបារី ខណៈដែល​អ្នក​មាន​​​ចំណូល​ច្រើនជាង២ដុល្លារ ក្នុងមួយថ្ងៃ ចំណាយអស់តែជិត២១លានដុល្លារលើការ​ទិញ​​បារីក្នុង​មួយ​ឆ្នាំ។

        តំណាងអង្គការសុខភាពពិភពលោកប្រចាំនៅកម្ពុជារូបនេះបានបន្តទៀតថា ក្នុងមួយថ្ងៃៗ អ្នក​ស្លាប់​ដោយការប្រើថ្នាំជក់មានចំនួនជាមធ្យមពី២៨នាក់ទៅ២៩នាក់ ដែលភាគច្រើនមកពីជំងឺមហារីកមាត់និង​ជំងឺមហារីកផ្សេងៗទៀត។ ចំណែកប្រជាពលរដ្ឋនៅទូទាំងពិភពលោក ដែលស្លាប់ដោយការប្រើប្រាស់ថ្នាំជក់​នេះមានចំនួន៦លាននាក់ ហើយក្នុងចំនួននេះដែរ មានមនុស្ស៦សែននាក់បានស្លាប់ដោយសារការ​ស្រូប​ផ្សែង​ថ្នាំជក់។

        លោកបានបញ្ជាក់ថា ប្រទេសកម្ពុជាយើង បានយកពន្ធអាករលើផលិតផលថ្នាំជក់តែ១០% តែប៉ុណ្ណោះ ប៉ុន្តែចង់ឲ្យមានការកាត់បន្ថយការប្រើប្រាស់ថ្នាំជក់ឲ្យមកនៅចំនួនតិចនោះ គឺកម្ពុជាត្រូវតម្លើងថ្លៃពន្ធលើ​ផលិត​ផល​ថ្នាំជក់នេះរហូតទៅដល់ពី១៥ភាគរយទៅ២០ភាគរយ ឬក៏៣០ភាគរយ ទើបកាត់បន្ថយអ្នកជក់បារី ឬក៏អ្នកប្រើប្រាស់ថ្នាំជក់មកកម្រិតទាបបាន។   

យោងតាមរបាយការណ៍ចុងក្រោយរបស់អង្គការសុខភាពពិភពលោកបង្ហាញថា នៅទូទាំងពិភពលោកមាន​មនុស្ស៦លាននាក់បានស្លាប់ជារៀងរាល់ឆ្នាំ ដោយសារជំងឺ ដែលទាក់ទងនឹងថ្នាំជក់នេះ។ ក្នុងនោះជាង៦ សែននាក់បានស្លាប់ដោយសារការស្រូបផ្សែងថ្នាំជកពីគេ។ ដោយ​ឡែកនៅកម្ពុជាមាន​មនុស្សប្រមាណ​១ម៉ឺន​នាក់​ស្លាប់ជារៀងរាល់ឆ្នាំដោយ​សារ​ជំងឺ​ទាក់​ទង​នឹង​ថ្នាំ​ជក់​នោះ៕

ដោយ ៖​សស្អាត