ភ្នំពេញ៖ រដ្ឋាភិបាលសម្រេចបង្កើនទុន២៦លានដុល្លារអាមេរិកដល់មូលនិធិទ្រង់ទ្រង់និងអភិវ ឌ្ឍន៍វិស័យកសិកម្ម ដើម្បីពង្រីកការផ្តល់ឥណទានដល់វិស័យស្រូវអង្គរ នៅកម្ពុជា និងជំរុញការនាំអង្ករចេញឱ្យបានជាង១លានតោននៅឆ្នាំ២០១៥។ ទឹកប្រាក់២៦លានដុល្លារនេះជាមូលនិធិឥណទានរបស់រដ្ឋាភិបាល ដើម្បីបន្ថែមដល់មូលនិធិទ្រទ្រង់និងអភិវឌ្ឍន៍វិស័យកសិកម្ម ក្នុងការគៀងគរ និងទាក់ទាញធនាគារពាណិជ្ជក្នុងវិស័យស្រូវអង្ករ ផ្តល់លទ្ធភាពបន្ថែមទៀតដល់ក្រុមហ៊ុនម៉ាស៊ីនកិនស្រូវ ខ្ចីឥណទាន វិនិយោគរបស់ ពួកគេ។
ធានាគារអភិវឌ្ឍន៍ជនបទបានធ្វើកិច្ចជាច្រើនខាងវិស័យស្រូវអង្ករនេះ ជាមួយរោងម៉ាស៊ីនកិនស្រូវក្នុងប្រទេសកម្ពុជា។លោក សុន គន្ធរ ប្រធានធនាគារអភិវឌ្ឍន៍ជនបទបានថ្លែងតាមទូរស័ព្ទនៅថ្ងៃទី២៥កុម្ភៈនេះ ថា រដ្ឋាភិបាលតាមរយៈក្រសួងសេដ្ឋកិច្ច បានផ្តល់២៦លានដុល្លារ បន្ថែមលើប្រាក់៣៦លានដុល្លារដែលបានប្រើប្រាស់កន្លងមក។មូលហេតុនៃការផ្តល់នេះ ត្រូវបានលោក សុន គន្ធរ បញ្ជាក់ថា ដោយសារមូលនិធិទ្រទ្រង់និងអភិវឌ្ឍន៍កសិកម្មនៅខ្វះទុនច្រើន។
កាលពីថ្ងៃម្សិលមិញ ក្រសួងសេដ្ឋកិច្ចនិងហិរញ្ញវត្ថុ បានប្រជុំក្រុមប្រឹក្សាគោលនយោបាយនៃមូលនិធិទ្រទ្រង់ និងអភិវឌ្ឍន៍វិស័យកសិកម្មដើម្បីពិនិត្យលើវឌ្ឍនភាពនៃការប្រើប្រាស់មូលនិធិដែលបានប្រើប្រាស់កាលពីឆ្នាំមុន និងលើកទិសដៅដើម្បីអនុវត្តបន្ត។
សេចក្តីប្រកាសព័ត៌មានរបស់ក្រសួងសេដ្ឋកិច្ចបង្ហាញថា ក្នុងឆ្នាំ២០១៣ ឥណទាននៅក្នុងដៃអតិថិជនជំពាក់មានចំនួន៣៣.៣១០ពាន់ដុលា្លរអាមេរិក តួលេខនេះកើនឡើងប្រមាណ១២ភាគរយ បើប្រៀបធៀបឆ្នាំ២០១២ដែលឥណទាននេះ បានផ្តល់ទៅឱ្យសម្ព័ន្ធសមាគមរោងម៉ាស៊ីនកិនស្រូវ ទាំង៨ខេត្តដែលមានរោងម៉ាស៊ីនកិនស្រូវចំនួន៦៩ជាសមាជិក។នេះមិនទាន់រាប់បញ្ចូលរោងម៉ាស៊ីនកែច្នៃនាំអង្ករចេញចំនួន៨ផង។
ឥណទានចំនួន៣៣.៣១០ពាន់ដុលា្លរអាមេរិកនោះ បានបែងចែកសម្រាប់ទិញស្រូវបាន៨០ពាន់តោន និងគាំទ្រគម្រោងវិនិយោគរយៈពេលវែង ដូចសាងសង់ឃ្លាំង ឡសម្ងួត និងម៉ាស៊ីនកិនកែច្នៃអង្ករ។
គួរបញ្ជាក់ថា រាជរដ្ឋាភិបាលបានចេញអនុក្រឹត្យមួយកាលពីឆ្នាំ២០០៩ បង្កើតមូលនិធិទ្រង់ទ្រង់និងអភិវឌ្ឍន៍វិស័យស្រូវអង្ករ ដើម្បីអនុវត្តគោលនយោបាយ ក្នុងការជំរុញផលិតកម្មស្រូវនិងការនាំអង្ករចេញ ដើម្បីផ្តល់លទ្ធភាពដល់រោងម៉ាស៊ីនកិនស្រូវទទួលបានឥណទានពីស្ថានប័នហិរញ្ញវត្ថុយកទៅពង្រីកអាជីវកម្មរបស់ខ្លួន៕ ដោយ៖ រតនា